গুৱাহাটী, ২৪ মে’ : বন্ধুত্বই হওক বা শত্ৰুতাই হওক, দুয়োটাই নিৰ্ভেজাল হ’ব লাগে ৷ কাৰোবাৰ লগত বন্ধুত্বই কৰক বা শত্ৰুতাই কৰক, ভালকৈ কৰিবলৈ ক’লে ভূপেন বৰাই ৷ শুকুৰবাৰে নাৰায়ণপুৰত ভূপেন বৰাই কৰিলে এই বিশেষ মন্তব্য ৷
অসমত সাধাৰণ নিৰ্বাচন শেষ হোৱাৰ পিছতে ৰাইজৰ দলৰ সভাপতি তথা বিধায়ক অখিল গগৈ আৰু কংগ্ৰেছৰ মাজত যেন পুনৰ আৰম্ভ হ’ল শত্ৰুতা ৷ তেনে পৰিপ্ৰেক্ষিত্ৰতেই প্ৰদেশ কংগ্ৰেছ সভাপতিগৰাকীয়ে বিধায়কগৰাকীক উদ্দেশ্যি কৰিলে তাৎপৰ্যপূৰ্ণ মন্তব্য ৷ উল্লেখ্য যে কংগ্ৰেছ দলৰ বিৰুদ্ধে শেহতীয়াকৈ কেতবোৰ বিৰূপ মন্তব্য প্ৰকাশ কৰা পৰিলক্ষিত হৈছিল অখিল গগৈয়ে ৷ সেই মন্তব্যসমূহৰ প্ৰতিক্ৰিয়াৰূপে ভূপেন বৰাই শুকুৰবাৰে অখিল গগৈলৈ এখন পত্ৰ প্ৰেৰণ কৰে, য’ত অখিল গগৈক মুখ চম্ভালিবলৈও সকিয়নী প্ৰদান কৰা হয় ৷
ইয়াৰ পিছতে নাৰায়ণপুৰত সাংবাদিকে কৰা প্ৰশ্নোত্তৰত ভূপেন বৰাই কয়, ‘‘অখিল গগৈ ভাঙৰীয়ালৈ আজি ৰাতিপুৱাই এখন পত্ৰ লিখিবলগীয়া হোৱাটো মোৰ বাবে বা মোৰ দলৰ বাবে সৌভাগ্য বুলি ভবা নাই । মই ভাবো দোস্তি পিউৰ হ’ব লাগে, দুছমনিও পিউৰ হ’ব লাগে ৷ দোস্তি-দুছমনি দুয়োটাই পিউৰ হ’ব লাগে । পিছত চাম তেখেতে কি কয় !”
শুকুৰবাৰে অখিল গগৈলৈ প্ৰেৰণ কৰা পত্ৰখনৰ সন্দৰ্ভত প্ৰদেশ কংগ্ৰেছৰ সভাপতিগৰাকীয়ে কয় যে সভাপতি হিচাপে নিজৰ দলৰ নেতা-কৰ্মীৰ প্ৰতি থকা দায়বদ্ধতাৰ বাবেই তেওঁ এই পদক্ষেপ ল’বলৈ বাধ্য হৈছে । সাংবাদিকক বৰাই কয়, “মই পুৱা যেতিয়া মোবাইলটো খুলিছো, আমাৰ দলৰ বিৰুদ্ধে তেখেতে কৰা মন্তব্যৰ প্ৰতিক্ৰিয়া দেখিছো ৷ আমাৰ দলৰ নেতা-কৰ্মী ক্ষোভিত হোৱা বাৰ্তাবোৰ পাইছো ৷ দলৰ সভাপতি হিচাপে এয়া মোৰ নৈতিক দায়িত্ব ৷ প্ৰতিক্ৰিয়া প্ৰকাশ কৰিবলৈ বাধ্য ।”
উল্লেখ্য যে লোকসভা নিৰ্বাচনত কংগ্ৰেছৰ মিত্ৰদল ৰাইজৰ দলৰ সভাপতি অখিল গগৈয়ে অদ্যপি এই প্ৰসংগত প্ৰতিক্ৰিয়া প্ৰকাশ কৰা নাই । অৱশ্যে এই সময়ত স্বাভাৱিকতে এক প্ৰশ্ন উদয় হৈছে যে ভূপেন বৰাই শুকুৰবাৰে দিয়া পত্ৰখনৰ লগতে এই মন্তব্যই বিৰোধী মিত্ৰজোঁটত বাধাৰ সৃষ্টি কৰিব নেকি ?
লগতে পঢ়ক: 'আপোনাৰ বক্তব্যত বিৰক্ত হৈছে কংগ্ৰেছৰ নেতা-কৰ্মী'- অখিল গগৈক ভূপেন বৰাৰ সকীয়নি
