ৰঙিয়া, 4 জুন : দেশজুৰি চলি আছে লোকসভা নিৰ্বাচনৰ ভোটগণনা ৷ ঠায়ে ঠায়ে স্থাপন কৰা ভোটগণনা কেন্দ্ৰসমূহত কটকটীয়া নিৰাপত্তাৰ মাজত চলি আছে ভোটগণনা ৷ এই ভোটগণনাৰ মাজতে এক অভাৱনীয় পৰিস্থিতিৰ সৃষ্টি হয় ৰঙিয়াৰ মহকুমাধিপতি কাৰ্যালয়ত ৷ লোকসভা নিৰ্বাচনৰ ভোটগণনা চলি থকাৰ মাজতে ৰঙিয়াত মহকুমাধিপতি কাৰ্যালয়ত অসম পুলিচৰ দাদাগিৰিৰ খবৰ আহি পৰিছে । প্ৰাপ্ত খবৰ অনুসৰি কৰ্তব্যৰত অৱস্থাত থকা এগৰাকী আৰক্ষী বিষয়াই নিজৰ পদবীৰ অপব্যৱহাৰ কৰাৰ অভিযোগ উত্থাপিত হৈছে ৷
উল্লেখ্য যে, পুৱা 8 বজাৰে পৰা সমগ্ৰ দেশৰ লগতে অসমতো অব্যাহত আছে লোকসভা নিৰ্বাচনৰ ভোটগণনা ৷ কটকটীয়া নিৰাপত্তা বেষ্টনীৰ মাজতে অব্যাহত ভোটগণনা একপ্ৰকাৰ শান্তিপূৰ্ণভাৱেই চলি থকা বুলি ক’ব পাৰি ৷ এনে সময়তে খবৰ সংগ্ৰহৰ বাবে ভোটগণনা কেন্দ্ৰত উপস্থিত হোৱা এগৰাকী জ্যেষ্ঠ সাংবাদিকৰ হাতৰ পৰা আচম্বিতে কেমেৰা কাঢ়ি ল’বলৈ উদ্যত হয় অসম আৰক্ষীত কৰ্মৰত বৰষা দাস নামৰ এগৰাকী মহিলা আৰক্ষী বিষয়াই ৷ কেবল এয়াই নহয়, আৰক্ষী বিষয়াগৰাকীয়ে "বেছি কথা নক’ব, চোঁচৰাই নি লকআপত ভৰাই থম" বুলিও সাংবাদিকগৰাকীক ভাবুকি দিয়ে ৷ আৰক্ষী বিষয়াগৰাকীৰ এই ব্যৱহাৰত স্বাভাৱিকতে দুখ প্ৰকাশ কৰে কামৰূপ(গ্ৰাম্য) জিলাৰ সাংবাদিকসকলে ৷
ঘটনা সন্দৰ্ভত কামৰূপ জিলা সাংবাদিক সন্থাৰ সভাপতি প্ৰকাশ ডেকাই কয় যে, সাংবাদিকসকলেও নিজৰ দায়িত্ব পালন কৰিবলৈ আহিছে ৷ তেনেস্থলত এগৰাকী দায়িত্বশীল আৰক্ষী বিষয়াই ইমান বেয়া ব্যৱহাৰ কৰাটো অনুচিত তথা নীতি বিৰুদ্ধ ।
