বৰপেটা, ১৯ মাৰ্চঃ বৰপেটা আৰু ধুবুৰী লোকসভা সমষ্টি দুটাৰ নিৰ্বাচনৰ প্ৰস্তুতি সম্পৰ্কে বুজ লোৱাৰ বাবে বৰপেটাত উপস্থিত হয় নিখিল ভাৰত কংগ্ৰেছ কমিটীৰ সম্পাদক তথা অসমৰ তত্বাৱধায়ক পৃথ্বীৰাজ সাথে ৷ বৰপেটা ৰাজীৱ ভৱনত উপস্থিত হৈ জ্যেষ্ঠ কংগ্ৰেছ নেতাগৰাকীয়ে বৰপেটা জিলা কংগ্ৰেছ, ব্লক কংগ্ৰেছ, জিলা পৰিষদৰ সদস্য সকলকে লৈ জিলাখনৰ কংগ্ৰেছ নেতাসকলৰ সৈতে আলোচনাত মিলিত হয় ৷ আগন্তুক লোকসভা নিৰ্বাচনৰ কংগ্ৰেছৰ ৰণনীতি কি হ'ব, কেনেদৰে নামি পৰিব নিৰ্বাচনী প্ৰচাৰত এই সকলোবোৰ দিশ পৰ্যালোচনাৰ লগতে দুয়োখন আসন দখলৰ লক্ষ্যৰে সভাত পৃথ্বীৰাজ সাথেই আলোচনা কৰে ।
বৰপেটাত বিৰোধী দলসমূহে নিজা নিজা প্ৰাৰ্থী ঠিয় কৰাক লৈয়ো মন্তব্য কৰে নিখিল ভাৰত কংগ্ৰেছ কমিটীৰ সম্পাদক তথা অসমৰ তত্বাৱধায়ক পৃথ্বীৰাজ সাথেই । নিখিল ভাৰত কংগ্ৰেছ কমিটীৰ সম্পাদকগৰাকীয়ে এই প্ৰসংগত কয়," আটাইবোৰ দলৰ লগত কথা বতৰা চলি আছে ৷ প্ৰাৰ্থী ঠিয় কৰোৱা হৈছে যদিও প্ৰাৰ্থিত্ব প্ৰত্যাহাৰৰ সময় এতিয়াও আছে ৷ সকলোৰে লগত কথা-বতৰা চলি আছে ৷ কিবা নহয় কিবা সমাধান ওলাব ৷ "
ইপিনে,অসমত কংগ্ৰেছে কেইখন আসন লাভ কৰিব সেই সম্পৰ্কে নিখিল ভাৰত কংগ্ৰেছ কমিটীৰ সম্পাদক তথা অসমৰ তত্বাৱধায়ক পৃথ্বীৰাজ সাথেই কয়," মই জ্যোতিষী নহয় ৷ কিন্তু যোৱাবাৰতকৈ ভাল হ'ব ৷ জনসাধাৰণে মূল্যবৃদ্ধি, সংস্থাপন আদি সমস্যাৰ সমাধান বিচাৰিলে কংগ্ৰেছক ভোট দিব ৷" পূৰ্বৰ কংগ্ৰেছ চৰকাৰতকৈ মোদীৰ চৰকাৰৰ দিনত হোৱা মূল্যবৃদ্ধিৰ কথা তেওঁ উল্লেখ কৰে ৷ আনহাতে, যোৰহাট লোকসভা সমষ্টিত ১ লাখতকৈয়ো অধিক ভোটৰ ব্যৱধানত গৌৰৱ গগৈ জয়ী হ'ব বুলি দাবী কংগ্ৰেছ নেতাগৰাকীয়ে ৷
লগতে পঢ়ক:নিজৰ দুৰ্নীতি ঢাকিবলৈহে বিজেপিমুখী হৈছে বহু নেতা-কৰ্মী: দেৱব্ৰত শইকীয়া
