গুৱাহাটী, ২০ মে': বৰপেটা লোকসভা সমষ্টিত অগপৰ প্ৰাৰ্থী ফণীভূষণ চৌধুৰীৰ নিশ্চিত বিজয় দাবী কৰিছে অগপৰ সভাপতি অতুল বৰাই । সোমবাৰে গুৱাহাটীত অগপৰ মুখ্য কাৰ্যালয়ত অনুষ্ঠিত বৰ্ধিত কাৰ্যনিৰ্বাহক সভাৰ অন্তত সাংবাদিক সম্বোধন কৰি অতুল বৰাই এই দাবী কৰে ।
তেওঁ ধুবুৰী লোকসভা সমষ্টিৰ ক্ষেত্ৰত তেনে কোনো দাবী কৰা দেখা নাযায় । অৱশ্যে তেওঁ দুয়োখন আসনতে অগপৰ প্ৰাৰ্থী বিজয় হ’ব বুলি দোহাৰে যদিও বৰপেটা লোকসভা সমষ্টি দখল কৰাৰ ক্ষেত্ৰত অতি আত্মবিশ্বাসী হোৱা দেখা যায় ।
অগপ দলে বৰপেটা আৰু ধুবুৰী লোকসভা সমষ্টিত প্ৰতিদ্বন্দিতা কৰিছিল । উল্লেখ্য যে সদ্য সমাপ্ত লোকসভা নিৰ্বাচনৰ সন্দৰ্ভত অগপৰ মুখ্য কাৰ্যালয়ত অনুষ্ঠিত হৈছিল বৰ্ধিত কাৰ্যনিৰ্বাহক সভা । এই সভাত লোকসভা নিৰ্বাচনৰ পৰ্যালোচনা কৰা হয় ৷
লগতে পঢ়ক: অসমত অভিলেখ সংখ্যক ৮১.৭১% ভোটদান : ১৪ খন আসনৰ ফলাফল কি হ’ব ? - LOK SABHA ELECTION 2024
সভাৰ অন্তত অগপৰ সভাপতিগৰাকীয়ে সংবাদ মাধ্যমৰ আগত কয়, ‘‘সকলো সমষ্টিৰ দলীয় কৰ্মীসকলৰ পৰা লিখিত প্ৰতিবেদন বিচৰা হৈছিল । সেইমতে দলীয় কৰ্মীসকলে লিখিত প্ৰতিবেদন দাখিল কৰিছে । এই প্ৰতিবেদনৰ ভিত্তিত বৰপেটা লোকসভা সমষ্টিত জয়ী হোৱাটো নিশ্চিত । যাৰবাবে বৰপেটা লোকসভা সমষ্টিৰ পৰা প্ৰাৰ্থী হোৱা ফণীভূষণ চৌধুৰী সাংসদ হোৱাটো নিশ্চিত ।’’
বৰাই লগতে কয়, ‘‘ফণীভূষণ চৌধুৰী যিহেতু বঙাইগাঁও বিধানসভা সমষ্টিৰ বিধায়ক, গতিকে বঙাইগাঁৱত উপ-নিৰ্বাচন অনুষ্ঠিত হোৱাটো নিশ্চিত । এই ক্ষেত্ৰত বঙাইগাঁৱত উপ-নিৰ্বাচনৰ আগতীয়া প্ৰস্তুতি সম্পৰ্কে সভাত আলোচনা কৰা হয় ।’’
অতুল বৰাই জনায় যে আগন্তুক পঞ্চায়ত আৰু পৌৰ সভাৰ নিৰ্বাচনৰ বাবে দলটোক শক্তিশালী কৰি পুনৰ গঠন কৰা হ'ব । দলৰ ভ্ৰাতৃ-ভগ্নী সংগঠনবোৰ শক্তিশালী কৰা হ'ব । দলীয় কৰ্মীৰ মাজত কৰ্মশালা অনুষ্ঠিত কৰা হ’ব । সভাত দলৰ উপ-সভাপতি কেশৱ মহন্ত, অগপৰ বৰপেটা আৰু ধুবুৰী লোকসভা সমষ্টিৰ প্ৰাৰ্থী ক্ৰমে ফণীভূষণ চৌধুৰী আৰু জাৱেদ ইছলাম আদি উপস্থিত আছিল ।
