লছ এঞ্জেলছ : কেলিফ'ৰ্ণিয়াৰ দাবানলে একপ্ৰকাৰ দহি নিছে লছ এঞ্জেলছ । বহু লোকে বিস্ফোৰিত নেত্ৰৰে টেলিভিছনৰ পৰ্দাত তেওঁলোকৰ ঘৰবোৰ জ্বলি থকাটো অসহায়ভাৱে প্ৰত্যক্ষ কৰিছিল । লছ এঞ্জেলছ আৰু ইয়াৰ আশেপাশে জুই বিয়পি পৰাৰ পিছত বহুসংখ্যক বাসিন্দা এতিয়া তেওঁলোকৰ ঘৰবোৰলৈ উভতি আহিবলৈ আৰম্ভ কৰিছে । কিন্তু নতুনকৈ অগ্নিকাণ্ডৰ আশংকা এতিয়াও অব্যাহত আছে আৰু দেশখনৰ দ্বিতীয় বৃহত্তম চহৰখন অশান্ত হৈয়ে আছে ।
কিছু লোকৰ বাবে এইটো হতচকিত কৰিবলগা বাস্তৱিকতাৰ প্ৰথম দৰ্শন, য'ত 13 নিযুত লোকৰ এই অঞ্চলটোৱে দুৰ্যোগক অতিক্ৰম কৰা আৰু পুনৰ নিৰ্মাণৰ প্ৰত্যাহ্বানৰ সৈতে যুঁজি আছে । শান্ত বতাহে শুকুৰবাৰে মহানগৰীয় অঞ্চলত সংঘটিত সবাতোকৈ ডাঙৰ অগ্নিকাণ্ডত কিছু পৰিমাণে নিয়ন্ত্ৰণ ৰক্ষাত অগ্নিনিৰ্বাপক বাহিনীক সহায় কৰিছিল ।
ইয়াৰ পূৰ্বে সপ্তাহান্তত ধুমুহা পুনৰ উক্ত অঞ্চললৈ আহে, য'ত আঠ মাহতকৈ অধিক সময় ধৰি বৰষুণ হোৱা নাছিল । কিন্তু শুকুৰবাৰে সন্ধিয়ালৈকে নতুনকৈ ঘৰ এৰাৰ নিৰ্দেশ দিয়া হয় । কিয়নো ইণ্টাৰষ্টেট 405 আৰু গেটি সংগ্ৰহালয়ৰ ওচৰত পুনৰ জুই বিয়পি পৰে ।
কাম কৰি থকা অৱস্থাত ব্ৰিজেট বাৰ্গ নামৰ ব্যক্তিগৰাকীয়ে টিভিৰ পৰ্দাত দেখে যে আল্টাডেনাত থকা তেওঁৰ ঘৰটোত জুই লাগিছে । তেওঁ দুদিন পিছত তেওঁৰ পৰিয়ালৰ সৈতে প্ৰথমবাৰৰ বাবে ঘৰটোলৈ ঘূৰি আহে, কেৱল ইয়াক বাস্তৱিকভাৱে নিজচকুৰে চাবলৈ । তেওঁলোকৰ ভৰিবোৰ সেই ভস্মীভূত স্মৃতিবোৰৰ ওপৰেৰে আগবাঢ়ি আছিল, য'ত 16 বছৰ ধৰি তেওঁলোকৰ সপোনৰ ঘৰখন আছিল ।
তেওঁৰ সন্তানকেইটাই ফুটপাথত পৰি থকা ধ্বংসাৱশেষৰ পৰা মাটিৰ এখন বাচন আৰু কিছুমান স্মৃতি বিজড়িত সামগ্ৰী বিচাৰি আছিল । তেওঁলোকে জাপানী কাঠত প্ৰিণ্ট কৰা সামগ্ৰীবিধ বিচাৰি আছিল, যাক তেওঁলোকে উদ্ধাৰ কৰিব বিচাৰে । আনহাতে, তেওঁৰ স্বামীয়ে এতিয়াও থিয় হৈ থকা চিমনীৰ ওচৰত পৰি থকা ধ্বংসস্তূপত হাত ফুৰাই আছে আৰু তেওঁৰ আইতাকে দিয়া কাঠৰ টুকুৰা এটা হাতেৰে ধৰি আছিল ।
"সকলো ঠিকে আছে । সকলো ঠিক আছে ।" বাৰ্গে ধ্বংসৰ বুজ লোৱাৰ সময়ত নিজকে আৰু আনকো এইদৰে কয় । তেওঁৰ পৰিয়ালটোৱে আতচবাজী চোৱা ডেক আৰু পুলটোকো স্মৰণ কৰে । "এনেকুৱা নহয় যে কেৱল আমিহে আমাৰ ঘৰটো হেৰুৱাইছোঁ, আন বহুতেও তেওঁলোকৰ নিজৰ ঘৰ হেৰুৱাইছে ।" তেওঁ স্বগতোক্তি কৰে ।
যেতিয়াৰ পৰা অগ্নিকাণ্ডৰ সূত্ৰপাত হয়, তেতিয়াৰ পৰা লছ এঞ্জেলছ চহৰৰ উত্তৰত ঘন বসতিপূৰ্ণ 25 মাইল (40 কিলোমিটাৰ) এলেকাত এই জুই বিয়পি পৰে । তেতিয়াৰে পৰা এতিয়ালৈকে 12,000 তকৈও অধিক আন্তঃগাঁথনি জ্বলি গৈছে । ইয়াত ঘৰ, এপাৰ্টমেণ্ট অট্টালিকা, ব্যৱসায়িক গাঁথনি, বাহিৰৰ ভৱন আৰু বাহনো অন্তৰ্ভুক্ত আছে । আটাইতকৈ ডাঙৰ এই অগ্নিকাণ্ডৰ কাৰণ কিন্তু এতিয়ালৈকে চিনাক্ত কৰিব পৰা হোৱা নাই ।
নেতৃত্বৰ বিফলতা আৰু ৰাজনৈতিক অভিযোগ-প্ৰতি অভিযোগ আৰম্ভ হৈছে আৰু ইয়াৰ লগে লগে অনুসন্ধানো আৰম্ভ হৈছে । গৱৰ্ণৰ গেভিন নিউজমে শুকুৰবাৰে ৰাজ্যিক বিষয়াসকলক 117 নিযুত গেলন (440 নিযুত লিটাৰ) জলাশয় কিয় বন্ধ হৈ গৈছে আৰু কিছুমান হাইড্ৰেণ্ট কিয় শুকাই গৈছে সেই বিষয়বোৰৰ কাৰণ নিৰ্ণয়ৰ বাবে অনুসন্ধান কৰিবলৈ নিৰ্দেশ দিছে । লগতে তেওঁ ইয়াক অত্যন্ত দুৰ্ভাগ্যজনক বুলিও অভিহিত কৰে ।
ইফালে লছ এঞ্জেলছৰ অগ্নিনিৰ্বাপক প্ৰধান ক্ৰিষ্টিন ক্ৰাউলিয়ে কয় যে মহানগৰৰ নেতৃত্বই অগ্নিনিৰ্বাপক বাহিনীৰ বাবে পৰ্যাপ্ত ধন প্ৰদান নকৰি তেওঁৰ বিভাগটোক বিফল কৰিছে । তেওঁ পানীৰ অভাৱকো সমালোচনা কৰে । "যেতিয়া এজন অগ্নিনিৰ্বাপক হাইড্ৰেণ্টলৈ আহে, আমি আশাকৰোঁ যে তাত পানী থাকিব ।" তেওঁ কয় ।
আনহাতে, লছ এঞ্জেলছ কাউণ্টিৰ চিকিৎসা পৰীক্ষকৰ কাৰ্যালয়ে জনোৱা অনুসৰি, এই অগ্নিকাণ্ডত অতি কমেও 11 জন লোক নিহত হৈছে । বিষয়াসকলে লগতে কয় যে এই সংখ্যা বৃদ্ধি পাব বুলি তেওঁলোকে অনুমান কৰিছে । কিয়নো শৱ চিনাক্ত কৰা কুকুৰ ছান ফ্ৰান্সিস্কোতকৈও ডাঙৰ এলেকাটোলৈ ধ্বংসৰ মূল্যাঙ্কন কৰিবলৈ ধ্বংসস্তূপত পৰিণত হোৱা অঞ্চলটোলৈ আহিব ।
চৰকাৰীভাৱে শুকুৰবাৰে এটা কেন্দ্ৰ স্থাপন কৰিছে, য'ত মানুহে সন্ধানহীন লোকসকলৰ খবৰ দিব পাৰে । দহ হাজাৰ লোকক ঘৰ খালী কৰাৰ নিৰ্দেশ দিয়া হৈছে আৰু অগ্নিকাণ্ডৰ ফলত প্ৰায় 56 বৰ্গমাইল (145 বৰ্গ কিলোমিটাৰ) এলেকা ভস্মীভূত হৈছে ।
