প্ৰতি বছৰে ২৮ জুলাইৰ দিনটোত সমগ্ৰ বিশ্বতে বিশ্ব হেপাটাইটিছ দিৱস হিচাপে পালন কৰা হয় । সংক্ৰামক ৰোগ হেপাটাইটিছৰ বিষয়ে জনসাধাৰণৰ মাজত সজাগতা সৃষ্টি কৰাৰ উদ্দেশ্যে এই বিশেষ দিনটো পালন কৰা হয় । অতি কম সংখ্যক লোকেহে জানে যে প্ৰতি বছৰে প্ৰায় ১৩ লাখ লোকে এই লিভাৰ সম্পৰ্কীয় সংক্ৰমণ, হেপাটাইটিছৰ বাবে প্ৰাণ হেৰুৱাবলগীয়া হয় । এনে পৰিস্থিতিত এই ৰোগ হেপাটাইটিছ দৰাচলতে হয় কি ? তথা এই ৰোগৰ লক্ষণ, কাৰণ আৰু প্ৰতিৰোধৰ ব্যৱস্থা সম্পৰ্কে জানো আহক-
হেপাটাইটিছ হৈছে এনে এক ৰোগ যিয়ে শৰীৰৰ এক অপৰিহাৰ্য অংগ যকৃতক আক্ৰান্ত কৰে ৷ ই এটা ভাইৰাছৰ দ্বাৰা হয় যিয়ে যকৃতৰ কোষৰ ক্ষতি কৰে ৷ যকৃতে শৰীৰৰ বাবে বহুতো গুৰুত্বপূৰ্ণ কাম কৰে, যেনে বিষাক্ত পদাৰ্থ আঁতৰোৱা, খাদ্য হজম কৰাত সহায় কৰা আৰু শক্তি উৎপাদন কৰা ৷ হেপাটাইটিছৰ বাবে যকৃতে সঠিকভাৱে কাম কৰিব নোৱাৰে, যাৰ বাবে শৰীৰত বহু ধৰণৰ সমস্যাৰ সৃষ্টি হ’ব পাৰে ৷
হেপাটাইটিছৰ প্ৰকাৰ
হেপাটাইটিছ ৫ প্ৰকাৰৰ ৷ A, B, C, D আৰু E৷ ইয়াৰে A আৰু E প্ৰকাৰ সাধাৰণতে বেছি দিনলৈ শৰীৰক আক্ৰান্ত কৰা দেখা নাযায়, অৰ্থাৎ কিছু সময়ৰ পিচত ই নিজাববীয়াকৈ নিৰাময় হয় ৷ আনহাতে B, C আৰু D প্ৰকাৰ বেছি দিন টিকি থাকিব পাৰে আৰু যকৃতৰ ৰোগ বা কেন্সাৰ হ’ব পাৰে ৷
হেপাটাইটিছ A: সাধাৰণতে দূষিত খাদ্য বা পানীৰ জৰিয়তে বিয়পে ৷
হেপাটাইটিছ B: আক্ৰান্ত ব্যক্তিৰ তেজ, লেলাউটি বা শৰীৰৰ অন্যান্য তৰল পদাৰ্থৰ সংস্পৰ্শলৈ আহি ই বিয়পে ৷
হেপাটাইটিছ C: সাধাৰণতে সংক্ৰমিত তেজৰ সংস্পৰ্শৰ দ্বাৰা বিয়পে ৷
হেপাটাইটিছ D: হেপাটাইটিছ বিৰ লগতে এই ৰোগ হয় ৷
হেপাটাইটিছ E: দূষিত খাদ্য বা পানীৰ জৰিয়তেও এই ৰোগ বিয়পে ৷
হেপাটাইটিছৰ লক্ষণ
- ভাগৰ
- হালধীয়া চকু আৰু ছাল (জণ্ডিচ)
- পেটৰ বিষ
- জ্বৰ
- বমি বা ওকট-পাকত লগা
- ভোক কমি যোৱা
- ক'লা প্ৰস্ৰাৱ
- পাতল ৰঙৰ মল
- গাঁঠিৰ বিষ
হেপাটাইটিছৰ কাৰণ
ভাইৰাছ: বিভিন্ন ধৰণৰ হেপাটাইটিছ ভাইৰাছে যকৃতক সংক্ৰমিত কৰে ৷
দূষিত খাদ্য বা পানী: হেপাটাইটিছ A আৰু E সাধাৰণতে দূষিত খাদ্য বা পানীৰ জৰিয়তেও বিয়পিব পাৰে ৷
সংক্ৰমিত তেজ: সাধাৰণতে আক্ৰান্ত তেজৰ সংস্পৰ্শৰ দ্বাৰা হেপাটাইটিছ B আৰু C বিয়পে ৷
দূষিত বেজী: দূষিত বেজীৰে ড্ৰাগছ বা মাদক দ্ৰব্য গ্ৰহণ কৰা লোকসকলৰ দেহত হেপাটাইটিছ B আৰু C বিয়পাৰ আশংকা অধিক৷
অসুৰক্ষিত যৌন সম্পৰ্ক: অসুৰক্ষিত যৌন সম্পৰ্কৰ জৰিয়তে হেপাটাইটিছ B আৰু C বিয়পিব পাৰে ৷
হেপাটাইটিছ প্ৰতিৰোধৰ উপায়
- হেপাটাইটিছ B আৰু Cৰ বাবে এন্টিভাইৰেল ঔষধ উপলব্ধ ৷
- গুৰুতৰ ক্ষেত্ৰত লিভাৰ ট্ৰান্সপ্লাণ্টৰ প্ৰয়োজন হ’ব পাৰে ৷
- যকৃত সুস্থ হ’বলৈ পৰ্যাপ্ত জিৰণি লোৱাৰ প্ৰয়োজন ৷
- স্বাস্থ্যসন্মত খাদ্যই যকৃত সুস্থ হোৱাত সহায় কৰে ৷
- মদ্যপানে যকৃতৰ ক্ষতি কৰে, গতিকে মদ্যপান পৰিহাৰ কৰাটো অতি প্ৰয়োজনীয় ৷
- হেপাটাইটিছ A আৰু Bৰ ভেকচিন উপলব্ধ ৷
- কণ্ডম ব্যৱহাৰ কৰিলে অসুৰক্ষিত যৌন সম্পৰ্ক স্থাপন কৰাৰ ফলত হোৱা সংক্ৰমণৰ পৰা হাত সাৰিব পাৰি ৷
- সদায় পৰিষ্কাৰ-পৰিচ্ছন্নতাৰ যত্ন লোৱা উচিত আৰু সিদ্ধ কৰা খাদ্যহে খাব লাগে ৷
