দেশত দিনক দিনে বৃদ্ধি পাবলৈ ধৰিছে হৃদৰোগীৰ সংখ্যা ৷ শেহতীয়াকৈ হাৰ্ট এটেক হৈছে পৃথিৱীৰ আটাইতকৈ ডাঙৰ মৃত্যুৰ কাৰণ ৷ পূৰ্বে বয়সস্থ লোকৰ ক্ষেত্ৰত হাৰ্ট এটেকৰ প্ৰৱণতা অধিক আছিল যদিও বৰ্তমান সময়ত কম বয়সৰ যুৱক-যুৱতীও ইয়াৰ ফলত মৃত্যুৰ মুখত পৰিবলৈ আৰম্ভ কৰিছে ৷ ইয়াৰ মূল কাৰণ হৈছে অনিয়মিত জীৱনশৈলী ৷ ইয়াৰ বাবে প্ৰত্যেকেই দৈনন্দিন জীৱনত খাদ্যাভ্যাসৰ প্ৰতি সাৱধান হোৱাটো উচিত আৰু কিছুমান বিশেষ অভ্যাস যেনে শাৰীৰিক কাৰ্য-কলাপ, ওজন নিয়ন্ত্ৰণ, মদ্যপান আৰু ধূমপান আদি অভ্যাস ত্যাগ কৰাটো উচিত ৷ আপুনি ২০ বছৰ বয়সৰ হওক বা ৫০ বছৰৰ ওপৰৰ হওক, এই সৰু সৰু জীৱনশৈলীৰ পৰিৱৰ্তন কৰি আপুনি হৃদৰোগৰ দৰে মাৰাত্মক স্বাস্থ্যজনিত সমস্যাৰ সম্ভাৱনা হ্ৰাস কৰিব পাৰে ৷
বেছিভাগ হৃদযন্ত্ৰৰ সমস্যাই লক্ষণবিহীন ৷ কাৰণ বহু বছৰৰ ভিতৰত লাহে লাহে ইয়াৰ বিকাশ ঘটে ৷ যাৰ ফলত হাৰ্ট এটেক আৰু ষ্ট্ৰোকৰ দৰে মাৰাত্মক স্বাস্থ্যজনিত সমস্যাৰ সৃষ্টি হয় ৷ এইমছ ভোপালৰ জ্যেষ্ঠ চিকিৎসক অজয় সিঙে কয় যে, এই ৰোগৰ পৰা হাত সাৰিবলৈ জীৱনশৈলীত এবিচিডিইএফৰ সূত্ৰ মানি চলিব লাগে ৷
কি হয় ABCDEF সূত্ৰ:
এইমছ ভোপালৰ চিকিৎসক অজয় সিঙে কয় যে, জীৱনশৈলী উন্নত কৰাৰ লগতে হৃদৰোগ প্ৰতিৰোধৰ বাবে তলত উল্লেখ কৰা ৬টা গুৰুত্বপূৰ্ণ দিশৰ প্ৰতি গুৰুত্ব দিয়াটো অতিকৈ প্ৰয়োজনীয় ৷ যেনে-
A (Addiction)- A ৰে Addiction মানে সুৰা আৰু ধূমপানৰ দৰে মাদক দ্ৰব্য সেৱনৰ অভ্যাস ত্যাগ কৰা ৷ কাৰণ সুৰা আৰু চিগাৰেট সেৱনৰ লগে লগে হৃদৰোগৰ সম্ভাৱনা যথেষ্ট বৃদ্ধি পায় ৷ গতিকে সুস্থ হৃদযন্ত্ৰৰ বাবে এই বেয়া অভ্যাস পৰিহাৰ কৰা উচিত ৷
B (Blood Pressure)- Bৰে Blood pressure অৰ্থাৎ উচ্চ ৰক্তচাপ নিয়ন্ত্ৰণত ৰখা ৷ উচ্চ ৰক্তচাপ হৃদৰোগৰ প্ৰধান কাৰণ ৷ ইয়াৰ পৰা হাত সাৰিবলৈ নিয়মিতভাৱে ৰক্তচাপ পৰীক্ষা কৰি চিকিৎসা গ্ৰহণ কৰাটো অতিকৈ প্ৰয়োজনীয় ৷
C (Cholesterol)- তেজত কলেষ্টেৰলৰ মাত্ৰা বৃদ্ধি হোৱাটো হৃদযন্ত্ৰৰ বাবে যথেষ্ট ক্ষতিকাৰক ৷ ইয়াক নিয়ন্ত্ৰণত ৰাখিবলৈ খাদ্য আৰু জীৱনশৈলীৰ পৰিৱৰ্তন অতিকৈ প্ৰয়োজনীয় ৷
D (Diabetes or Diet)- D মানে ডায়েবেটিছ আৰু খাদ্যাভ্যাস ৷ ডায়েবেটিছে হৃদযন্ত্ৰৰ স্বাস্থ্যৰ ওপৰত প্ৰভাৱ পেলায় ৷ শৰ্কৰাৰ মাত্ৰা নিয়ন্ত্ৰণত ৰাখিবৰ বাবে সুষম আহাৰ গ্ৰহণ কৰাটো অতিকৈ প্ৰয়োজনীয় ৷
E (Exercise)- হৃদযন্ত্ৰ আৰু সামগ্ৰিক স্বাস্থ্যৰ বাবে নিয়মিত ব্যায়াম প্ৰয়োজনীয় ৷ সপ্তাহত ৫ দিন ৪০ মিনিট খোজ কাঢ়িব লাগে ৷ তদুপৰি যোগ আৰু প্ৰাণায়াম কৰিলে শাৰীৰিক আৰু মানসিক স্বাস্থ্যৰ উন্নতি হয় ৷
F (Fun)- পৰিয়াল আৰু বন্ধু-বান্ধৱীৰ সৈতে সময় কটালে আমি খুবেই শান্তি অনুভৱ কৰো ৷ মানসিক চাপ কম কৰাৰ ক্ষেত্ৰত পৰিয়াল আৰু বন্ধু-বান্ধৱীৰ সৈতে সময় কটোৱা, কথা পতা আদি অনুসৰণ কৰা উচিত ৷ হৃদযন্ত্ৰৰ স্বাস্থ্যৰ বাবে উপকাৰী ৷
