ভাৰতীয় খাদ্যত ব্যৱহৃত হোৱা এবিধ বিশেষ মচলা হৈছে হালধি ৷ ভাৰতীয় খাদ্য হালধি অবিহনে আধৰুৱা কিন্তু আপুনি জানেনে যে, খাদ্যত ব্যৱহৃত হোৱা এই হালধি আপোনাৰ স্বাস্থ্যৰ বাবে কোনো মহৌষধতকৈ কম নহয় ৷ আয়ুৰ্বেদত হালধি বহু ধৰণৰ ঔষধ প্ৰস্তুত কৰিবলৈ ব্যৱহাৰ কৰা হয় ৷ সকলোৰে ঘৰত হালধি সহজে পোৱা যায় ৷
এক চিকুট হালধিয়ে খাদ্যৰ ৰং আৰু সোৱাদ দুয়োটাই বৃদ্ধি কৰিব পাৰে ৷ লগতে বহুতো বিপদজনক ৰোগৰ পৰাও ৰক্ষা কৰাত ই সক্ষম ৷
হালধি মিহলোৱা পানীৰ উপকাৰিতা
প্ৰতিদিনে পুৱা এক গিলাচ পানীত যদি আমি হালধি মিহলাই খালী পেটত সেৱন কৰো, তেন্তে ইয়াৰ দ্বাৰা আমি ভাইৰাছৰ সংক্ৰমণ আৰু অন্যান্য সংক্ৰমণৰ সম্ভাৱনা দূৰ কৰিব পাৰো ৷ বিশেষ কথাটো হ’ল হালধি মিহলোৱা পানী খালে মেদবহুলতাও হ্ৰাস কৰিব পৰা যায় ৷
দৰাচলতে হালধিত বেক্টেৰিয়া আৰু ভেঁকুৰ প্ৰতিৰোধী গুণ আছে, যিয়ে শৰীৰক সংক্ৰমণৰ পৰা ৰক্ষা কৰে ৷ হালধিয়ে আপোনাৰ মুখৰ স্বাস্থ্যও উন্নত কৰে ৷ হালধি সেৱনে ৰোগ প্ৰতিৰোধ ক্ষমতা শক্তিশালী কৰে ৷ ইয়াৰ বাহিৰেও পেটৰ লগত জড়িত বহু ৰোগত হালধি খুবেই উপকাৰী ৷ হালধি স্বাস্থ্যৰ বাবে এক সম্পদ ৷ গতিকে ইয়াক আমি পাৰিলে নিতৌ পান কৰা উচিত ৷
হালধিৰ পানী কেনেকৈ তৈয়াৰ কৰিব ?
ইয়াৰ বাবে পুৱাৰ ভাগত এগিলাচ পানীত এচিকুট হালধি গুৰি মিহলাই লওক ৷ এই পানীও আপুনি ৰাতিটোৰ বাবে এনেদৰে থৈ দিয়ক আৰু পুৱা অলপ গৰম কৰি খালী পেটত এই পানী কুহুমীয়াকৈ পান কৰক ৷ এই পানী খোৱাৰ পিছত প্ৰায় আধা ঘণ্টামান একো নাখাব ৷ এই পানী মুখত লৈ চাৰিওফালে ঘূৰাই পান কৰক ৷
