ভিটামিন চি আৰু এন্টিঅক্সিডেন্টৰে সমৃদ্ধ এবিধ সোৱাদযুক্ত আৰু স্বাস্থ্যকৰ ফল হৈছে নেমু ৷ ইয়াক প্ৰায়ে খাদ্যৰ সোৱাদ বঢ়াবলৈ আৰু চাহত যোগ কৰিবলৈ ব্যৱহাৰ কৰা হয় ৷ কিন্তু আপুনি জানেনে যে কিছুমান বস্তুৰ সৈতে নেমু সেৱন কৰিলে আপোনাৰ স্বাস্থ্যৰ বাবে ক্ষতিকাৰক হ’ব পাৰে ? যদি আপুনি এই বিষয়ে জ্ঞাত নহয় তেন্তে আজিৰ এই প্ৰতিবেদন আপোনাৰ বাবে ৷
আয়ুর্বেদত উল্লেখ থকা মতে, যি আহাৰ বা আহাৰৰ মিশ্রণ সেৱন কৰাৰ ফলত শৰীৰত তাৰ কু-প্ৰভাৱ পৰে আৰু শৰীৰ বৰ্ধনত বাধাৰ সৃষ্টি কৰে বা শৰীৰৰ কোষবিলাকৰ পোষণৰ অনুকূল ক্রিয়া কৰে, তেনেহলে সেই আহাৰক ‘বিৰুদ্ধ আহাৰ’ বুলি কোৱা হয় বা ভুল খাদ্যৰ সংমিশ্ৰণ বুলিও কোৱা হয় ৷ ইয়াৰ ফলত পাচনতন্ত্ৰ বিঘ্নিত হৈ বহুতো স্বাস্থ্যজনিত সমস্যাৰ সৃষ্টি হ’ব পাৰে ৷ তেন্তে নেমুৰ লগত কোন ৪বিধ খাদ্য খাব নালাগে জানো আহক-
১/ গাখীৰ
গাখীৰৰ লগত নেমু সেৱন কৰিলে পেটৰ সমস্যা যেনে গেছ, বদহজম, ডায়েৰিয়া আদি হ’ব পাৰে । এনে হয় কাৰণ নেমুৰ এচিডিক মৌল গ্ৰহণ কৰাৰ ফলত গাখীৰৰ প্ৰ’টিন ফাটি যায়, যাৰ ফলত হজম প্ৰক্ৰিয়াত অসুবিধাৰ সৃষ্টি হয় ।
২/ দৈ
দৈৰ সৈতে নেমু খোৱাটোও পেটৰ বাবে ক্ষতিকাৰক ৷ নেমুত থকা এচিডে দৈত থকা ভাল বেক্টেৰিয়া ধ্বংস কৰে, যাৰ ফলত পাচনতন্ত্ৰ দুৰ্বল হয় আৰু এচিডিটি বৃদ্ধি কৰিব পাৰে ৷
৩/ মাছ
মাছৰ লগত নেমু সেৱন কৰিলে মাছৰ পুষ্টি কমি যায় ৷ নেমুত থকা এচিডে মাছত থকা প্ৰ’টিনৰ পাচনত বাধা দিয়ে, যাৰ বাবে শৰীৰে মাছে প্ৰদান কৰা প্ৰয়োজনীয় পুষ্টিকৰ উপাদান লাভ নকৰে ৷
৪/ কণী
কণীৰ লগত নেমু সেৱন কৰিলে পেট গধুৰ হৈ পৰাৰ লগতে বদহজমৰ সমস্যাৰ হ’ব পাৰে ৷ নেমুত থকা এচিডে কণীত থকা প্ৰ’টিন হজম কৰাত অসুবিধাৰ সৃষ্টি কৰে, যাৰ ফলত পেটৰ বিষ হ’ব পাৰে ৷
এই খাদ্যসমূহৰ বাহিৰেও অত্যধিক নেমু সেৱনে পেটৰ বিষ, এচিডিটি আৰু মুখৰ আলচাৰ আদি সমস্যাৰ সৃষ্টি কৰিব পাৰে ৷ সেয়ে সঠিক পৰিমাণে নেমু সেৱন কৰিব লাগে আৰু ওপৰত উল্লেখিত এই খাদ্যৰ লগত খাবলৈ সম্পূৰ্ণ পৰিহাৰ কৰিব লাগে ৷ লগতে মনত ৰাখিব যে যদি আপোনাৰ কোনো স্বাস্থ্যজনিত সমস্যা আছে তেন্তে নেমু খোৱাৰ আগতে চিকিৎসকৰ পৰামৰ্শ গ্ৰহণ কৰক ৷
