আজিকালি আমাৰ দিনটোৰ বেছিভাগ সময় একে ঠাইতে বহি থাকোতেই পাৰ হৈ যায় ৷ কাৰ্যালয়লৈ গৈ কাম কৰা মানুহে, দিনটোত প্ৰায় ৮ৰ পৰা ৯ ঘণ্টা বহি বহি থাকে ৷ যাৰ বাবে তেওঁলোকে কঁকাল আৰু ডিঙিৰ বিষৰ দৰে সমস্যাৰ সন্মুখীন হ’বলগীয়া হয় ৷ ব্যস্ততাৰ বাবেও তেওঁলোকে জিমলৈ গৈ ব্যায়াম কৰিবলৈ সময় নাপায় ৷ কিন্তু ব্যায়ামে শৰীৰক সক্ৰিয় কৰি ৰখা আৰু সুস্থ হৈ থাকিবলৈ গুৰুত্বপূৰ্ণ ৷
এনে পৰিস্থিতিত যদি তেওঁলোকে দিনটোৰ আৰম্ভণিতে নিজৰ বাবে মাত্ৰ ৫ৰ পৰা ১০ মিনিট সময় উলিয়াই ধনুৰাসন কৰে, তেন্তে ই কঁকাল আৰু ডিঙিৰ বিষৰ দৰে সমস্যাৰ পৰা সকাহ দিব পাৰে ৷ কিন্তু একে সময়তে এই আসন তেওঁলোকৰ স্বাস্থ্যৰ বাবে বহু দিশত উপকাৰী বুলি প্ৰমাণিত হ’ব পাৰে ৷
যোগ বিশেষজ্ঞ সুগন্ধা গোৱেলে ধনুৰাসন কৰাৰ উপকাৰিতা আৰু শুদ্ধ পদ্ধতিৰ বিষয়ে জনাইছে ৷ যি আমি এই প্ৰতিবেদনৰ জৰিয়তে আপোনালোকক জনাবলৈ ওলাইছো ৷
- পেশীবোৰ শক্তিশালী
ধনুৰাসনে ইৰেক্টৰ স্পাইনেৰ লগতে পিঠিৰ পেশী শক্তিশালী কৰাত সহায় কৰে, যিয়ে আমাৰ ভংগীমা উন্নত কৰিব পাৰে আৰু লগতে কঁকালৰ বিষ কমোৱাতো সহায় কৰে ৷ ই ডিঙিৰ বিষ কমোৱাতো সহায় কৰিব পাৰে ৷
- ষ্ট্ৰেচ কৰা
এই আসন কৰিলে বুকু, পেট, নিতম্ব ফ্লেক্সাৰ আৰু কোৱাড্ৰিচেপছ নামৰ পেশীবোৰ ষ্ট্ৰেচ হয়, যাৰ ফলত শৰীৰৰ এই অংশবোৰত নমনীয়তা আৰু শক্তিৰ সঞ্চাৰ ঘটে ৷
- হজমৰ বাবে ভাল
এই আসনে পেটৰ মাংসপেশীবোৰ বিয়পোৱাত সহায় কৰিব পাৰে ৷ যাৰ বাবে ই হজম প্ৰক্ৰিয়াক ভালদৰে কাম কৰাত সহায় কৰিব পাৰে ৷
- হাত আৰু ভৰিৰ বাবে
ধনুৰাসন কৰিবলৈ ধনুৰ আকৃতিৰ দৰে থাকিব লাগে ৷ যিয়ে হাত-ভৰিৰ পেশীবোৰ টোনিং আৰু শক্তিশালী কৰাত সহায় কৰিব পাৰে ৷
- শক্তি লাভ কৰা
ধনুৰাসন কৰিলে শৰীৰৰ পৰা ভাগৰ কম হোৱাত সহায়ক হ’ব পাৰে আৰু গোটেই দিনটো শক্তিশালী হৈ থাকিব পাৰে ৷ ইয়াৰ লগতে আমাৰ সামগ্ৰিক স্বাস্থ্যৰ বাবেও ই উপকাৰী বুলি প্ৰমাণিত হ’ব পাৰে ৷
- ধনুৰাসন কেনেকৈ কৰিব
ধনুৰাসন কৰিবলৈ যোগাসনৰ মেটত পেট পেলাই শুই দিয়ক ৷ এতিয়া লাহে লাহে আঁঠু দুটা ভাঁজ কৰি গোৰোহাটো হাতেৰে ধৰি ৰাখিব ৷ উশাহ লওক আৰু শুই থকাৰ সময়ত বুকুখন ওপৰলৈ তুলিবলৈ চেষ্টা কৰক ৷ উৰু দুটা মাটিৰ ওপৰলৈ তুলি তাৰ পিছত হাতেৰে ভৰি দুখন টানিব ৷ মুখত হাঁহি এটা ৰাখি আগলৈ চাওক ৷ এতিয়া উশাহ-নিশাহৰ গতিবেগত মনোনিৱেশ কৰিবলৈ চেষ্টা কৰক, শৰীৰটো ধনুৰ দৰে টানি ৰাখক ৷ মাত্ৰ এটা কথা মনত ৰাখিব যে এই অৱস্থাত আৰামত থকা সময়লৈকে এই আসনটো কৰিব লাগে ৷ একবাৰত ১৫ৰ পৰা ২০ ছেকেণ্ডৰ বাবেও যদি এই আসন কৰে তেন্তে আপোনাৰ বাবে যথেষ্ট ৷ কিন্তু আটাইতকৈ গুৰুত্বপূৰ্ণ কথাটো হ’ল বিশেষজ্ঞৰ তত্বাৱধানত এই আসনটো কৰা ৷ এনে কৰিলে আপোনাৰ বাবে অধিক উপকাৰী হ’ব ৷ লগতে, যদি আপোনাৰ কোনো ধৰণৰ সমস্যা আছে, বিশেষকৈ কঁকাল, পেট আৰু আঁঠুৰ বিষ, তেন্তে নিশ্চিতভাৱে আপোনাৰ বিশেষজ্ঞক এই বিষয়ে জনাওক ৷
লগতে পঢ়ক: পেটৰ গেছ তথা এচিডিটি আঁতৰোৱাত ফলপ্ৰসূ এইসমূহ যোগাসন