গুৱাহাটী, ২৮ জুলাই: দেওবাৰে হার্টথ্রব জুবিন গাৰ্গ পুনৰ অসুস্থ হৈ পৰা খবৰে ব্যাপক চৰ্চা লাভ কৰে ৷ আনকি জুবিনপ্ৰেমীসকলে তেওঁৰ স্বাস্থ্যক লৈ চিন্তিত হৈ পৰা দেখা যায় । আজি পুৱা ১০ বজাত মহানগৰীৰ নেমকেয়াৰ হাস্পতালত ভৰ্তি কৰা হৈছিল জুবিন গাৰ্গক । শেহতীয়া খবৰ অনুসৰি জুবিন গাৰ্গৰ ছিজাৰ এটেক হৈছিল । অসুস্থ হৈ পৰাৰ লগে লগে জুবিন গাৰ্গক নেমকেয়াৰ হাস্পতালৰ MICU ত ভৰ্তি কৰোৱা হয় ।
বৰ্তমান কেনে আছে জুবিন গাৰ্গ :
সম্প্ৰতি বিপদমুক্ত জনপ্ৰিয় শিল্পীগৰাকী ৷ নেমকেয়াৰ পৰিচালন সঞ্চালক ডাঃ হিতেশ বৰুৱাই কিছু সময় পূৰ্বে স্পষ্ট কৰিলে এই কথা । সংবাদ মাধ্যমৰ আগত তেওঁ ব্যক্ত কৰি কয়, "জুবিন গাৰ্গ এতিয়া বিপদমুক্ত । মই কথা পাতি আহিছো । তেখেতৰ চিকিৎসা আৰম্ভ হৈছে । মেডিচিনৰ লগতে স্নায়ুবিজ্ঞান বিশেষজ্ঞ চিকিৎসকৰ এটা দলে পৰীক্ষা কৰি আছে জুবিন গাৰ্গক । তেওঁক এটা Master check up ৰ প্রয়োজন । আমি সেয়া অব্যাহত ৰাখিছো ।"
আজি হাস্পতালতে থাকিব জুবিন :
তথ্যমতে, আজি হাস্পতালতে থাকিব লাগিব জুবিন । দৈনিক খাই থাকিবলগীয়া টেবলেট খোৱা নাছিল বাবে আজি পুৱা Seizure attack আহিছিল বুলি চিকিৎসকে জানিবলৈ দিয়ে ।
কেন্দ্ৰীয় ৰাজ্যিক মন্ত্ৰী পবিত্ৰ মাৰ্ঘেৰিটাই সাক্ষাৎ কৰিলে জুবিনক :
কেন্দ্ৰীয় ৰাজ্যিক মন্ত্ৰী পবিত্ৰ মাৰ্ঘেৰিটাই নেমকেয়াৰ হাস্পতালত উপস্থিত হৈ জুবিন গাৰ্গৰ স্বাস্থ্যৰ বুজ লয় । পবিত্ৰ মাৰ্ঘেৰিটাই সংবাদ মাধ্যমৰ আগত কয়, "জুবিন গাৰ্গ বৰ্তমান সুস্থ । প্ৰায় আধা ঘন্টা জুবিনৰ লগত কথা পাতিলো ।"
ৰমেন বৰুৱাৰ নিৰুদ্দেশ হোৱাক লৈ চিন্তিত আছিল জুবিন :
"ৰমেন বৰুৱা নিৰুদ্দেশ হোৱাৰে পৰা জুবিনৰ মন বেয়া হৈ আছিল । কঠোৰ পৰিশ্ৰম, টোপনি ক্ষতি আৰু মন বেয়াৰ বাবে আজি পুৱা হঠাৎ অসুস্থ হৈ পৰিছিল জুবিন ।"
উল্লেখ্য যে, আজি পুৱা প্ৰায় ৯.১০ বজাত অসুস্থ হৈ পৰিছিল জুবিন গাৰ্গ । Seizure attack হোৱাৰ পিছত হঠাৎ অসুস্থ হৈ পৰাৰ লগে লগে নেমকেয়াৰ হাস্পতালত ভৰ্তি কৰোৱা হয় শিল্পীগৰাকীক ।
