চিটাৰা ডেস্ক, 15 এপ্ৰিল : দেওবাৰে বলীউডৰ ভাইজান ছলমান খানৰ ঘৰৰ বাহিৰত দুই দুৰ্বৃত্তই গুলীচালনা কৰাৰ ঘটনা তদন্ত অব্যাহত আছে ৷ ইতিমধ্যে এই ঘটনাৰ তদন্তৰ দায়িত্ব মুম্বাইৰ অপৰাধ শাখালৈ স্থানান্তৰ কৰা হৈছে । মুম্বাই আৰক্ষীয়ে এই কথা নিশ্চিত কৰিছে ।
ঘটনা সন্দৰ্ভত সংবাদ মাধ্যমৰ লোকসকলক অৱগত কৰি মুম্বাই আৰক্ষীয়ে কয় যে এই ঘটনা সুপৰিকল্পিতভাৱে পৰিকল্পনা কৰা যেন লাগিছে ৷ কিয়নো অভিযুক্তদুয়োয়ে ঘটনাস্থলীত উপস্থিত হোৱাৰ সময়ত মুখখন হেলমেটেৰে ঢাকি ৰাখিছিল । ঘটনাটোৰ পুংখানুপুংখ তদন্তৰ বাবে অপৰাধ শাখাৰ দহটাতকৈও অধিক দল মোতায়েন কৰা হৈছিল ।
ইফালে দিল্লী আৰক্ষীৰ বিষয়াসকলৰ মতে, বলীউডৰ অভিনেতাগৰাকীৰ বাসগৃহৰ বাহিৰত গুলীচালনা কৰা দুই ব্যক্তিৰ এক অভিযুক্ত গুৰুগ্ৰামৰ বুলি ধাৰণা কৰা হৈছে । বান্দ্ৰা আৰক্ষীৰ এজন বিষয়াই জনোৱা অনুসৰি অস্ত্ৰ আইন আৰু আইপিচি ধাৰা 307 (হত্যাৰ চেষ্টা)ৰ অধীনত আততায়ীদ্বয়ৰ বিৰুদ্ধে এখন এজাহাৰ দাখিল কৰা হৈছে । অভিযুক্তদ্বয়ে মুঠ চাৰি ৰাউণ্ড গুলী চালনা কৰিছিল ৷ ঘটনাস্থলীৰ পৰা এটা সজীৱ কাৰ্ট্ৰিজ উদ্ধাৰ কৰা হৈছিল ।
এই ঘটনাৰ পিচতে 14 এপ্ৰিলৰ বিয়লি ছলমান খানক সতৰ্ক কৰি অমোল বিষ্ণোয়ে ফেচবুকযোগে এক পোষ্ট কৰিছিল ৷ এই ঘটনাক এক ট্ৰাইবাৰ বুলিহে কৈছিল অনমোলে ৷ অভিনেতাৰগৰাকীৰ ঘৰৰ বাহিৰত গুলীচালনাৰ দায়িত্ব স্বীকাৰ কৰিছিল অনমোলে ৷
বিগত বৰ্ষৰ মাৰ্চ মাহত অভিনেতাগৰাকীৰ কৰ্মক্ষেত্ৰত এক ইমেইলযোগে ভাবুকি প্ৰেৰণ কৰিছিল লৰেন্স বিষ্ণোয়ে ৷ তাৰ মুম্বাই আৰক্ষীয়ে লৰেন্স বিষ্ণোই, গোল্ডি ব্ৰাৰ আৰু আন এজন ব্যক্তিৰ বিৰুদ্ধে আইপিচি ধাৰা 120-বি (অপৰাধমূলক ষড়যন্ত্ৰ), 506-2 (অপৰাধমূলক ভাবুকি), আৰু 34 (উমৈহতীয়া উদ্দেশ্য)ৰ অধীনত এক অভিযোগ (এফআইআৰ) দাখিল কৰিছিল ৷
