চিটাৰা ডেস্ক, ২৯ জুলাই: আহিবলগীয়া নতুন অসমীয়া ছবি 'ৰুদ্ৰ'ৰ শ্বুটিঙৰ সময়ত মঙলবাৰে আঘাতপ্ৰাপ্ত হয় অসমীয়া ছবিজগতৰ জনপ্ৰিয় অভিনেতা ৰবি শৰ্মা । এক্সনৰ দৃশ্য শ্বুটিঙৰ সময়তে এটা একুৰিয়াম ব্লাষ্টৰ দৃশ্যগ্ৰহণ কৰাৰ সময়তে সংঘটিত হয় এই অঘটন ৷ কাহিলীপাৰাৰ অগ্ৰদূত বাতৰি কাকতৰ কাৰ্যালয়ৰ সন্মুখত চলি আছিল ছবিখনৰ শ্বুটিং ।
জি এন আৰ চিলৈ প্ৰেৰণ অভিনেতাগৰাকীক:
ৰবি শৰ্মা আঘাতপ্ৰাপ্ত হোৱাত তেওঁক ততাতৈয়াকৈ লৈ অহা হয় দিছপুৰৰ জি এন আৰ চি হাস্পতাললৈ । মুখমণ্ডলত কিছু পৰিমাণে আঘাতপ্ৰাপ্ত হৈছে অভিনেতাগৰাকী । প্ৰাৰম্ভিক চিকিৎসাৰ পাচত চিকিৎসালয়ৰ পৰা যাবলৈ দিয়া হয় অভিনেতাগৰাকীক ।
লগতে পঢ়ক: ৰুদ্ৰখন হৈছে আমাৰ অসমীয়া থলুৱা চিনেমা: ৰূপক গগৈ - Assamese Film Rudra
অভিনেতাগৰাকীৰ মুখমণ্ডলত সোমাইছিল তিনিটা গ্লাচৰ টুকুৰা:
এই সমগ্ৰ ঘটনা সন্দৰ্ভত অভিনেতাগৰাকীয়ে সংবাদমাধ্যমৰ সন্মুখত মন্তব্য কৰি কয়, "তিনিটা গ্লাচৰ টুকুৰা সোমাইছিল । চিকিৎসকে সেইকেইটা উলিয়াই দিলে । বৰ্তমান মই সুস্থ ।"
ৰবি শৰ্মাৰ আঘাতে প্ৰভাৱ পেলাব নেকি ছবিখনৰ শ্বুটিঙত:
চিকিৎসালয়ৰ পৰা মুকলি হোৱাৰ পাচত পুনৰ ছবিখনৰ কাম সম্পূৰ্ণ কৰিব বিচাৰে জনপ্ৰিয় অভিনেতাগৰাকীয়ে ৷ তেওঁ কয়, "পুনৰ শ্বুটিঙলৈ যোৱাৰ পৰিকল্পনাই কৰি আছো, পৰিচালকে কি কয় চাই লওঁ । সময় নষ্ট নোহোৱাকৈ যিমানখিনি কাম কৰিব পাৰো সেয়া আমাৰ বাবে ভাল । শ্বুটিং বৰ্তমানো বাকী আছে । বৰ্তমান তৃতীয় পৰ্যায়ৰ এক্সনৰ শ্বুটিং চলি আছে । ইয়াৰ পাচত আৰু এটা চিডিউল থাকিব । পূৰ্ণোদ্যমে আমাৰ শ্বুটিং চলি আছে । অসমৰ ৰাইজক আমি এখন ভাল ছবি দিম বুলি কথা দি থৈছো । তেনেক্ষেত্ৰত কেতিয়াবা অকণমান ৰিস্ক লোৱা যায় ।" লগতে শুভাকাংক্ষীসকলক ধন্যবাদ জনাই অভিনেতাগৰাকীয়ে কয়, "সকলোলৈ ধন্যবাদ । তেওঁলোকৰ আশীৰ্বাদ আছে বাবেই ইমানতে ৰৈ গ'ল ৷"
লগতে পঢ়ক: ছাচপেন্স-থ্ৰিলাৰ-একশ্যন সহিতে শ্বাসৰুদ্ধ কৰিব ৰুদ্ৰই - NEW ASSAMESE FILM RUDRA
কি ক’লে পৰিচালনা ৰূপক গগৈয়ে:
ইফালে এই সন্দৰ্ভত ছবিখনৰ পৰিচালক ৰূপক গগৈ কয়, "এক্সনৰ শ্বুটিং চলি থকা অৱস্থাত এইটো অঘটন হয় । কিন্ত ভগৱানৰ আশীৰ্বাদত বিশেষ একো নহ’ল । বৰ্তমান ৰবি সুস্থ ।"
