গুৱাহাটী, 1 অক্টোবৰ : আজি মুক্তি পালে জনপ্রিয় কণ্ঠশিল্পী ময়ূৰী দত্তৰ গীত ‘ৰিমঝিম’ ৰ ভিডিঅ’ সংস্কৰণ । মঙলবাৰে গুৱাহাটী প্ৰেছ ক্লাৱত বহু কেইগৰাকী বিশিষ্ট ব্যক্তিৰ উপস্থিতিত ৰাইজৰ বাবে মুকলি কৰা হয় গীতটিৰ ভিডিঅ’ সংস্কৰণ ।
উক্ত অনুষ্ঠানত উপস্থিত থাকে আৰক্ষী আয়ুক্ত দিগন্ত বৰা, উপ-আৰক্ষী আয়ুক্ত ভাৰ্গৱ মণি দাস প্ৰমুখ্যে কেইবাগৰাকীও আৰক্ষী বিষয়া । গীতটি উন্মোচন কৰে আৰক্ষী আয়ুক্ত দিগন্ত বৰাই ।
গীতটি সন্দৰ্ভত আৰক্ষী আয়ুক্ত দিগন্ত বৰাই কি ক'লে
গীতটিৰ সম্পৰ্কত সংবাদ মাধ্যমৰ সন্মুখত মন্তব্য কৰি আৰক্ষী আয়ুক্তগৰাকীয়ে কয়, “আজি অসম আৰক্ষীৰ বাবে এটা ঐতিহ্যপূৰ্ণ দিন । আজি অসম আৰক্ষী দিৱস । 1951 চনৰ 1 অক্টোবৰত প্ৰথমগৰাকী ভাৰতীয় বিষয়াই অসম আৰক্ষীৰ নেতৃত্ব লৈছিল অৰ্থাৎ অসম আৰক্ষীৰ মূৰব্বী হিচাপে দায়িত্ব লৈছিল । গতিকে এই দিনটোৰ লগত সংগতি ৰাখি অসম আৰক্ষী দিৱস আমি পালন কৰো । আৰু এই দিনটোৰ লগত সংগতি ৰাখিয়ে কণ্ঠশিল্পী ময়ূৰী দত্ত আৰু তেওঁৰ টীমে এটা সুন্দৰ গীতৰ লগতে এটা ভিডিঅ’ সংকলনো কৰিছে । এই গীতটিৰ ভিডিঅ’ সংকলনটি আজি অসম আৰক্ষী দিৱসৰ লগত সংগতি ৰাখি মুক্তি দিয়া হৈছে । মই আজি এই অনুষ্ঠানত উপস্থিত থাকি আনন্দিত হৈছো এইকাৰণে যে অসম আৰক্ষীৰ ঐতিহ্যপূৰ্ণ দিনটোৰ লগত সংগতি ৰাখি তেওঁলোকে গীতটি বনাইছে আৰু গীতটিৰ মূল চৰিত্ৰ হৈছে আৰক্ষী বিষয়া । আৰক্ষী বিষয়া এগৰাকীৰ মনস্তাত্বিক দিশটোৰ লগত সংগতি ৰাখি গীতটি ৰচনা কৰা হৈছে । ৰাইজে গীতটি আদৰি ল’ব বুলি আশা কৰিছো ।”
গীতটি সন্দৰ্ভত কণ্ঠশিল্পী ময়ূৰী দত্তৰ মন্তব্য
“আজি ১ অক্টোবৰ । আজি আমাৰ সকলোৰে বাবে এটা বিশেষ দিন । আজি অসম আৰক্ষী দিৱস । গতিকে অসম আৰক্ষী দিৱসৰ লগত সংগতি ৰাখি আমি এই গীতটিৰ পৰিকল্পনা কৰিলো । আমি যেতিয়া ঘৰৰ পৰা ওলাই যাওঁ, আমাৰ কৰবাত কিবা হ’ব বুলি ভয় লাগি থাকে । এইক্ষেত্ৰত কিন্তু আৰক্ষীয়ে সদায় আমাক সুৰক্ষা দি আহিছে । গতিকে আজিৰ দিনটোত এয়া অসম আৰক্ষীলৈ আমাৰ তৰফৰ পৰা অভিনন্দন ।”
উল্লেখ্য যে, ‘ৰিমঝিম’ গীতটিৰ কথা অজয় বৰুৱাৰ, সংগীত আৰু সংযোজন তৰুণ তন্ময়ৰ । ভিডিঅ’ পৰিচালনা শ্বনল হাজৰিকাৰ । আনহাতে গীতটিত অভিনয় কৰিছে ময়ূৰী দত্ত, ভাস্কৰ তামুলী, সৌৰভ ৰাজ আৰু কীৰ্তি কমলে ।
লগতে পঢ়ক : কেনেদৰে আৰম্ভ হৈছিল জয় কাশ্যপৰ সাংস্কৃতিক যাত্ৰা ? - Musician Joy Kashyap interview
