চিটাৰা ডেস্ক, 11 ছেপ্টম্বৰ : পৰিয়ালক দুখৰ সাগৰত পেলাই বুধবাৰৰ পুৱাই মুম্বাইত নিজা বাসগৃহত মৃত্যুক আঁকোৱালি লয় মডেল-অভিনেত্ৰী মালাইকা অৰোৰাৰ পিতৃ অনিল মেহতাই ৷ বিভিন্ন সূত্ৰৰ পৰা জানিব পৰা মতে, অনিল মেহতাই আত্মহত্যা কৰিছে ৷ অৱশ্যে একাংশ খবৰত এয়া এক দুৰ্ঘটনা বুলি দাবী কৰা হৈছে ।
কেইবাটাও প্ৰতিবেদনত কোৱা হৈছে যে বুধবাৰে ৰাতিপুৱা প্ৰায় 9.00 বজাত সংঘটিত হয় এই ঘটনা । ঘটনাটো সংঘটিত হোৱাৰ পিছত মালাইকাৰ প্ৰাক্তন স্বামী আৰবাজ খানক তেওঁৰ এপাৰ্টমেণ্টৰ বাহিৰত দেখা গৈছিল । জানিব পৰা মতে, অভিনেত্ৰীগৰাকী পুনেৰ পৰা মুম্বাইলৈ উভতি আহি আছে ।
সংবাদ মাধ্যমৰ বাতৰি অনুসৰি, মৰণোত্তৰ পৰীক্ষাৰ বাবে ভাভা চিকিৎসালয়লৈ লৈ যোৱা হৈছে অনিল মেহতাৰ মৃতদেহ ৷ মৃত্যুসম্পৰ্কীয় অন্যান্য বিৱৰণ এতিয়াও তদন্তৰ আওঁতাত আছে । আৰক্ষীয়ে বিষয়টো তদন্ত কৰি আছে ।
মালাইকাৰ জন্ম মহাৰাষ্ট্ৰৰ থানেত হৈছিল । তেওঁৰ 11 বছৰ বয়সতে পিতৃ-মাতৃৰ বিবাহ বিচ্ছেদ হৈছিল ৷ বিচ্ছেদৰ পিছত মালাইকা তেওঁৰ মাক আৰু ভগ্নী অমৃতা অৰোৰাৰ সৈতে চেম্বুৰলৈ গুচি গৈছিল । তেওঁৰ মাক জয়েছ পলিকাৰ্প এগৰাকী মালায়ালী খ্ৰীষ্টান আৰু দেউতাক অনিল মেহতা আছিল এগৰাকী পাঞ্জাৱী, যিয়ে ভাৰতীয় মাৰ্চেণ্ট নেভিত কাম কৰিছিল ৷
শেহতীয়াকৈ এখন ফেশ্বন আলোচনীক দিয়া সাক্ষাৎকাৰত মালাইকাই কৈছিল যে তেওঁৰ বয়স মাত্ৰ 11 বছৰ হৈ থাকোতেই পিতৃ-মাতৃয়ে পৃথকে থকাৰ সিদ্ধান্ত লৈছিল । তেওঁ লগতে এইটোও কৈছিল যে যদিও তেওঁৰ শৈশৱ "আশ্চৰ্যকৰ" আছিল তথাপিও এইটো "সহজ" নাছিল আৰু লগতে "অশান্ত" ও আছিল ।
সাক্ষাৎকাৰটোত অভিনেত্ৰীগৰাকীয়ে কয়, "মোৰ পিতৃ-মাতৃৰ বিচ্ছেদে মোক মোৰ মাক এটা নতুন দৃষ্টিভংগীৰে পৰ্যবেক্ষণ কৰিবলৈ অনুমতি দিছিল ।"
