চিটাৰা ডেস্ক, 19 জুলাই : সম্পৰ্ক শেষ হৈ যায়, কিন্তু স্মৃতিবোৰ থাকি যায় ৷ জীৱন বাটত সেই স্মৃতিয়ে কেতিয়াবা কন্দুৱাই, কেতিয়াবা হহুৱাই ৷ জীৱন কিন্তু ৰৈ নাযায় ৷ পিছে বহুসময় ধৰি একেলগে থকা কাৰোবাৰ পৰা বিচ্ছেদ জানো সহজ ? আনুষ্ঠানিকভাৱে সম্পৰ্ক এটা গঢ়ি তোলাৰ পাচত কাৰণ লাগিলে যিয়েই নহঁওক কিয়, আঁতৰ হও বুলিয়েইতো কোনো কাৰো পৰা আঁতৰি আহিব নোৱাৰে ৷ বহুত কথা চিন্তা কৰিবলগীয়া হয় ৷ কিন্তু অশেষ চিন্তাৰ পাচতো যেতিয়া একো উপায় নাথাকে, তেতিয়া আৰু সমাজৰ দোহাই দি বান্ধ খাই থকাৰ কোনো কথা নাথাকে ৷
বৰ্তমান সময়ত পিছে বিবাহ বিচ্ছেদ খুবেই সাধাৰণ যেন অনুমান হয় ৷ সম্পৰ্ক মানুহে যেনেদৰে গঢ়ে, তেনেদৰে ভাঙেও ৷ অৱশ্যে এয়া সকলোৰে ব্যক্তিগত কথা ৷ কিন্তু সমাজৰ বাবে কোনোবা এখিনিত এনেধৰণৰ খবৰে ঋণাত্মক প্ৰভাৱ পেলাই বুলি ক’ব পাৰি ৷ হয়তো এনেধৰণৰ বাতৰিৰ বহুল প্ৰচাৰে মানুহৰ সহনশীলতা, আনক বুজাৰ ক্ষমতা, বিভিন্ন দৃষ্টিভংগী অনুসৰণ কৰা আদিক লোপ কৰি পেলাইছে ৷ বাৰু সি যি কি নহওক, অনন্ত-ৰাধিকাৰ যুগ্ম জীৱনৰ বাতৰিৰ খবৰে সামাজিক মাধ্যমত তোলপাৰ লগাই থকাৰ সময়তে বিচ্ছেদৰ বাতৰিয়ে নেটিজেনৰ মনোযোগ আকৰ্ষণ কৰিছে ৷ চৰ্চাত আছে হাৰ্দিক-নাতাশা, অভিষেক-ঐশ্বৰ্য, অৰ্জুন-মালাইকা ৷ ইয়াৰ মাজতে বৃহস্পতিবাৰে আনুষ্ঠিকভাৱে বিচ্ছেদৰ কথা ঘোষণা কৰে হাৰ্দিক-নাতাশাই ৷
2024 চনত হাৰ্দিক পাণ্ডিয়া আৰু নাতাশা ষ্টানকভিচৰ পূৰ্বে আৰু বহু তাৰকাদম্পতীয়ে পৃথক হোৱাৰ সিদ্ধান্ত লৈছিল ৷ এতিয়া এইখন তালিকাত নাম সংযোগ হৈ আছে অভিষেক-ঐশ্বৰ্য, অৰ্জুন-মালাইকাৰ ৷
লগতে পঢ়ক : একাধিকবাৰ বিয়াত বহিও চিৰস্থায়ী নহ’ল নাতাশা-হাৰ্দিকৰ সম্পৰ্ক - Hardik Natasa Divorce
অলৰাউণ্ডাৰ ক্ৰিকেটাৰ হাৰ্দিক পাণ্ডিয়া আৰু নাতাশা ষ্টানকভিচে ১৮ জুলাইৰ নিশা এট পোষ্ট শ্বেয়াৰ কৰি আনন্দেৰে তেওঁলোকৰ বিচ্ছেদৰ কথা ঘোষণা কৰে । এইটোও উল্লেখ কৰে যে তেওঁলোকে একেলগে তেওঁলোকৰ একমাত্ৰ পুত্ৰ অগস্ত্যৰ লালন-পালন কৰিব । কালি নাতাশা ছাৰ্বিয়াত থকা তেওঁৰ ঘৰত উপস্থিত হয় আৰু ছ'চিয়েল মিডিয়াত বিবাহ বিচ্ছেদৰ কথা ঘোষণা কৰে । চাও আহকচোন চলিত বৰ্ষটোত আৰু কাৰ কাৰ বিবাহ বিচ্ছেদ ঘটিছে-
ঈশা কোপ্পিকাৰ আৰু টিমি নাৰং
শ্বাহৰুখ খানৰ সৈতে ‘ডন’ ছবিত অভিনয় কৰা ‘খল্লাছ গাৰ্ল’ ঈশা কোপ্পিকাৰে 2024 চনৰ আৰম্ভণিতে স্বামীৰ পৰা বিচ্ছেদ হোৱাৰ কথা ঘোষণা কৰে । বিবাহৰ 10 বছৰৰ পাচত এই সিদ্ধান্ত লয় তেওঁলোকে । 2009 চনত বিবাহপাশত আবদ্ধ হোৱা ঈশাই বিয়া ভংগ হোৱাৰ কোনো কাৰণ নিদিলে । তেওঁলোকৰ ৰিয়ানা নামেৰে এগৰাকী কন্যা আছে, যাক তেওঁলোকে একেলগে ডাঙৰ-দীঘল কৰি আছে ।
ঈশা দেওল আৰু ভাৰত তাখতানী
হিন্দী চিনেমাৰ প্ৰবীণ দম্পতী ধৰ্মেন্দ্ৰ আৰু হেমা মালিনীৰ কন্যা ঈশা দেওলেৰ সপোনৰ ঘৰ ভাগিছিল 2024 চনত । ব্যৱসায়ী স্বামী ভাৰত তাখতানীৰ সৈতে বিবাহ বিচ্ছেদৰ কথা ঘোষণা কৰি সকলোকে আচৰিত কৰি তোলে ঈশাই । 2012 চনৰ 29 জুনত মুম্বাইৰ ইস্কন মন্দিৰত ঈশা আৰু ভাৰতৰ এখন অতি সাধাৰণ বিয়া হৈছিল । তেওঁলোকৰ দুগৰাকী কন্যা সন্তান ৰাধ্যা আৰু মিৰায়া আছে । ছ’চিয়েল মিডিয়াত শ্বেয়াৰ কৰা পোষ্টৰ জৰিয়তে ঈশা আৰু ভাৰতে বিচ্ছেদৰ কথা ঘোষণা কৰিছিল ।
দিলজিৎ কৌৰ আৰু নিখিল পেটেল
অভিনেত্ৰী দিলজিৎ কৌৰৰ এয়া আছিল দ্বিতীয়খন বিয়া, কিন্তু এইখনো নিটিকিল ৷ 2024 বৰ্ষত স্বামীৰ পৰা আঁতৰি আহে তেওঁ । দিলজিৎ কৌৰে যোৱা বছৰ এন আৰ আই নিখিল পেটেলক বিয়া কৰাইছিল । বিচ্ছেদৰ কথা প্ৰকাশ কৰি নিখিল পেটেলৰ আন ছোৱালীৰ সৈতে সম্পৰ্ক থকাৰ অভিযোগ উত্থাপন কৰে তেওঁ । একে সময়তে, নিখিলেও দিলজিতৰ বিৰুদ্ধে বহুতো অভিযোগ উত্থাপন কৰে ।
সম্পৰ্ক ঠিকে নথকা সন্দৰ্ভত চৰ্চাত আছে দুই বিখ্যাত যুটি
অৰ্জুন কাপুৰ আৰু মালাইকা অৰোৰা
বিচ্ছেদৰ বাতৰিৰে বাৰে বাৰে চৰ্চাত আছে অৰ্জুন কাপুৰ আৰু মালাইকা অৰোৰা । তেওঁলোকৰ সম্পৰ্ক দীৰ্ঘদিনীয়া । অৰ্জুনৰ জন্মদিন উদযাপত মালাইকাৰ অনুপস্থিতিয়ে এই বাতৰিত অধিক ইন্ধন যোগায় । মাজে মাজে মালাইকাৰ ৰহস্যময়ী পোষ্টেও নানান জল্পনা-কল্পনাৰ সৃষ্টি কৰি আহিছে ৷
অভিষেক বচ্চন আৰু ঐশ্বৰ্য
অনন্ত আম্বানী আৰু ৰাধিকাৰ বিয়াত পৃথকে উপস্থিত হোৱা অভিষেক বচ্চন আৰু ঐশ্বৰ্য ৰায়ে বিচ্ছেদৰ বাতৰিত ইন্ধন যোগায় ৷ শেহতীয়াকৈ বিবাহ বিচ্ছেদৰ পোষ্ট এটাত অভিষেক বচ্চনে লাইক কৰাত সকলো হতবাক হৈ পৰে ৷
লগতে পঢ়ক : বিবাহ বিচ্ছেদৰ বাতৰিৰ মাজতে বিচ্ছেদৰ পোষ্টত লাইক অভিষেকৰ ! - Abhishek Aishwarya divorce
