গুৱাহাটী : বহুকেইখন জনপ্ৰিয় ধাৰাবাহিক, গীতৰ ভিডিঅ’ আদিত অভিনয় কৰি দৰ্শকৰ মন জয় কৰিবলৈ সক্ষম হোৱা এগৰাকী জনপ্ৰিয় অভিনেত্ৰী গায়ত্ৰী বৰা । কেৱল ধাৰাবাহিকতে নহয় মঞ্চতো অভিনয় কৰে গায়ত্ৰীয়ে । ৫ বছৰ বয়সতে মঞ্চত অভিনয় কৰি অভিনয় জীৱনৰ পাতনি মেলিছিল অভিনেত্ৰী গৰাকীয়ে ৷ ইয়াৰ লগতে কেইবাবছৰ ধৰি ভ্ৰাম্যমাণ জগতৰ সৈতেও জড়িত হৈ আছিল অভিনেত্ৰীগৰাকী ।
জনপ্ৰিয় ধাৰাবাহিক ‘‘জোনালী LLB’’ৰ মুখ্য চৰিত্ৰত অভিনয় কৰা অভিনেত্ৰী গায়ত্ৰী বৰাৰ অভিনয় যাত্ৰা কেনেদৰে আৰম্ভ হৈছিল ? ইটিভি ভাৰতৰ এক বিশেষ প্ৰতিবেদন-
অভিনয় যাত্ৰাৰ আৰম্ভণি কেনেদৰে হৈছিল ?
ভ্ৰাম্যমাণৰ মঞ্চৰ লগতে বহুকেইখন ধাৰাবাহিকত অভিনয় কৰি দৰ্শকৰ মন জয় কৰিবলৈ সক্ষম হোৱা অভিনেত্ৰীগৰাকীয়ে কয়, “মই অভিনয় কেতিয়াৰ পৰা কৰিছো বুলি ক'বলৈ গ'লে মই ৫ বছৰ বয়সৰ পৰা মঞ্চত অভিনয় কৰিছো । একাংকিকা নাটবোৰৰ যি প্ৰতিযোগিতা অনুষ্ঠিত হয় তাৰ যোগেৰেই অভিনয় জীৱন প্ৰথম আৰম্ভ হৈছিল ।’’
‘‘প্ৰথমে অভিনয় তাৰ পাছত নৃত্য তেনেদৰে মই সাংস্কৃতিক জগতখনত খোজ পেলাইছিলো । কিন্তু পেছাগতভাৱে এই কামটোকে কৰিম বুলি মই ২০১০ চনৰ আগষ্টত প্ৰথম গুৱাহাটীলৈ আহিছিলো । গুৱাহাটী মহানগৰীলৈ আহি মই প্ৰথম কৰিছিলো অনুপম শইকীয়াৰ ‘গামোচা’ বুলি এখন ভিচিডি । তেনেকৈ আহি আহি আজিৰ এই পৰ্যায় পালো । তাৰ পাছত ২০১১-১২ ত ভ্ৰাম্যমাণ থিয়েটাৰলৈ গুচি গ’লো ।” অভিনেত্ৰীগৰাকীয়ে কয় ৷
বিহু নাচৰ অভিজ্ঞতা সন্দৰ্ভত অভিনেত্ৰীগৰাকীৰ মন্তব্য
“বিহু নচাৰ সেইখিনি সময়ৰ যিটো অভিজ্ঞতা সেইটো একেবাৰে বেলেগ । প্ৰথমতে মৌ-কুঁৱৰীৰ পৰা মই আৰম্ভ কৰিছো । তেতিয়া মোৰ বয়স ৪-৫ বছৰ মান আছিল । তেতিয়াৰ পৰাই মই বিভিন্ন প্ৰতিযোগিতাসমূহত অংশগ্ৰহণ কৰো । এতিয়াও ঘৰখন তেনেকুৱা বহু পুৰস্কাৰেৰে ভৰি আছে । কিন্তু আমি যেতিয়া প্ৰতিযোগিতাবোৰত অংশগ্ৰহণ কৰিছিলো সেই সময়বোৰ কিন্তু এতিয়া দৰে নাছিল । তেতিয়াৰ সেই সময়ত পুৰস্কাৰৰ এতিয়া যিটো চাহিদা সেইটো নাছিল । তেতিয়া আমি মনৰ হেঁপাহৰ বাবে নাচিছিলো ।”
ধাৰাবাহিকৰ যাত্ৰা সন্দৰ্ভত অভিনেত্ৰীগৰাকীৰ মন্তব্য
“গুৱাহাটীলৈ অহাৰ পাছত মই ভিচিডি ‘গামোচা’ত কাম কৰিলো । তাৰ পাছত মই ২০১১-১২ ভ্ৰাম্যমাণ থিয়েটাৰলৈ গুচি গ’লো । থিয়েটাৰৰ পৰা অহাৰ পাছত অধিকাৰ, দাপোন, সেন্দূৰ, উমাল বুকুৰ হাজাৰ কাহিনী আদি বিভিন্ন ধাৰাবাহিকত মই বহু সৰু সৰু চৰিত্ৰত অভিনয় কৰিছিলো । তাৰ পাছত ২০১৫ চনত মোলৈ ‘‘জোনালী LLB’’ৰ প্ৰস্তাৱটো আহিছিল । সেই ধাৰাবাহিকখনত মই মূল চৰিত্ৰটোত অভিনয় কৰিছিলো । সেই ধাৰাবাহিকখনে সেই সময়ত বিশেষ জনপ্ৰিয়তা অৰ্জন কৰিবলৈ সক্ষম হৈছিল । তাৰ পাছতো বহুকেইখন ধাৰাবাহিকত অভিনয় কৰিলো, তেনেদৰে এতিয়ালৈ এই যাত্ৰা অব্যাহত আছে ।”
লগতে পঢ়ক : ভিডিঅ’বাৰ্তা যোগে চৰকাৰক কি নতুন আইডিয়া দিলে জুবিনে ?
