চিটাৰা ডেস্ক, 26 আগষ্ট : কংগনা ৰনৌতৰ আহিবলগীয়া ছবি 'ইমাৰ্জেন্সি' মুক্তিৰ আগতেই বিতৰ্কৰ মাজত সোমাই পৰিছে । চলচ্চিত্ৰখন এটাৰ পাচত আন এটা বিতৰ্কই ঘেৰি ৰাখিছে । শিৰোমণি গুৰুদ্বাৰা পৰিবন্ধক সমিতি (এছজিপিচি) আৰু অকাল তখতৰ পিচত অষ্ট্ৰেলিয়াৰ শিখ পৰিষদে ভাৰতৰ প্ৰাক্তন প্ৰধানমন্ত্ৰী ইন্দিৰা গান্ধীক কেন্দ্ৰ কৰি নিৰ্মাণ কৰা ৰাজনৈতিক ছবিখনৰ ওপৰত নিষেধাজ্ঞা জাৰি কৰাৰ দাবী জনাইছে ।
সংবাদ মাধ্যমৰ বিবৃতিত অষ্ট্ৰেলিয়াৰ শিখ কাউন্সিলে ঐতিহাসিক ঘটনাক ভুলকৈ উপস্থাপন কৰা আৰু শিখ শ্বহীদৰ প্ৰতি অসন্মান কৰাৰ বাবে ‘ইমাৰ্জেন্সি’ নিষিদ্ধ কৰাৰ দাবী জনায় । অভিযোগকাৰীৰ উদ্ধৃতিৰে এক প্ৰতিবেদনত কোৱা হৈছে যে, "ছবিগৃহত এই ছবিখন প্ৰদৰ্শনক লৈ আমি অতিশয় চিন্তিত ।"
বিবৃতিটোত আৰু কোৱা হৈছে, "এই ছবিখনে ভাৰতৰ প্ৰাক্তন প্ৰধানমন্ত্ৰী ইন্দিৰা গান্ধী আৰু শিখ শ্বহীদসকলৰ বীৰত্বপূৰ্ণ ভূমিকা যেনেদৰে দেখুৱাইছে, সেয়া অত্যন্ত অপমানজনক । চলচ্চিত্ৰখনে শিখ সম্প্ৰদায়ৰ বাবে গুৰুত্বপূৰ্ণ আৰু বেদনাদায়ক ঐতিহাসিক ঘটনাবোৰক ভুলকৈ উপস্থাপন কৰিছে ।"
"চলচ্চিত্ৰখনে শিখ-পাঞ্জাৱী সম্প্ৰদায় আৰু অ-হিন্দুত্ববাদী সমৰ্থক, অষ্ট্ৰেলিয়াৰ হিন্দু সমৰ্থকসকলৰ মাজত অস্থিৰতাৰ সৃষ্টি কৰাৰ সম্ভাৱনা আছে । ছবিখনত প্ৰতিষ্ঠিত শিখ সম্প্ৰদায়ৰ নেতা সন্ত জাৰ্ণেল সিং খালচা ভিন্দ্ৰনৱালেৰ নেতিবাচক চৰিত্ৰই উদ্বেগ বৃদ্ধি কৰিছে । এই চলচ্চিত্ৰখনৰ প্ৰদৰ্শনে অষ্ট্ৰেলিয়াৰ শিখ আৰু হিন্দু সম্প্ৰদায়ৰ মাজত ৰাজনৈতিক উত্তেজনা বৃদ্ধি কৰিব আৰু শিখসকলৰ ধৰ্মীয় অনুভূতিক আঘাত কৰিব ।" বিবৃতিটোত লগতে কোৱা হৈছে ৷ উল্লেখ্য যে, ইয়াৰ পূৰ্বে, শিৰোমণি গুৰুদ্বাৰা পৰিবন্ধক সমিতি (এছজিপিচি) আৰু শ্ৰী অকাল তখত চাহিবে কংগনা ৰনৌতৰ আহিবলগীয়া চলচ্চিত্ৰখনৰ ওপৰত নিষেধাজ্ঞা জাৰি কৰাৰ দাবী জনাইছিল ।
লগতে পঢ়ক : দেশৰ প্ৰধানমন্ত্ৰী হ’ব বিচৰা সন্দৰ্ভত কি ক’লে কংগনাই ?
কংগনাৰ পৰিচালনাত সোনকালেই মুক্তি পাব ইমাৰ্জেন্সি - KANGANA RANAUT upcoming movie
