গুৱাহাটী, 2 অক্টোবৰ : 2021 বৰ্ষৰ সাহিত্য একাডেমিৰ শিশু সাহিত্যৰ বঁটা লাভ কৰিবলৈ সক্ষম হোৱা মৃণাল কলিতাৰ উপন্যাস ‘বকুল ফুলৰ দৰে’ ৰ চলচিত্ৰ ৰূপ । প্ৰাইড ইষ্ট এন্টাৰটেইনমেণ্টছৰ বেনাৰত নিৰ্মাণ কৰা এই ছবিখনৰ প্ৰযোজনা ৰিণিকি ভূঞা শৰ্মাৰ । মঙলবাৰে মহানগৰীৰ পাঞ্জাবাৰীস্থিত আইদেউ ছবিগৃহত ছবিখনৰ বিশেষ প্ৰদৰ্শনী অনুষ্ঠান অনুষ্ঠিত কৰা হয় । উক্ত অনুষ্ঠানত উপস্থিত থাকে অসমীয়া সাংস্কৃতিক জগতৰ বহুকেইগৰাকী ন-পুৰণি অভিনেতা-অভিনেত্ৰী প্ৰমুখ্যে বহু বিশিষ্ট ব্যক্তি ।
ইতিমধ্যে বহুকেইখন ৰাষ্ট্ৰীয় আৰু আন্তঃৰাষ্ট্ৰীয় চলচ্চিত্ৰ মহোৎসৱত সুখ্যাতি অর্জন কৰিবলৈ সক্ষম হোৱা ‘বকুল ফুলৰ দৰে’ ছবিখনৰ পৰিচালনা সঞ্জীৱ হাজৰিকাৰ । আনহাতে চিত্ৰনাট্য আৰু সংলাপ মৃণাল কলিতা, সঞ্জীৱ হাজৰিকা, ভাস্কৰ দাস আৰু ৰাহুল গৌতম শৰ্মাৰ । সামাজিক পৰিৱেশৰ পৰা প্ৰাকৃতিক পৰিৱেশলৈকে কিদৰে এটাৰ লগত আনটো ওতঃপ্ৰোতভাৱে জড়িত, সেই কথা এই ছবিখনৰ জৰিয়তে বুজাব বিচৰা হৈছে ৷ লগতে শিশু শ্ৰমিক আৰু সুৰাপান যে সমাজৰ বাবে ক্ষতিকাৰক সেই বিষয়েও ছবিখনত উপস্থাপন কৰা হৈছে ।
ছবিখনৰ সন্দৰ্ভত মন্তব্য কৰি প্ৰযোজক ৰিণিকি শৰ্মা ভূঞাই কয়, “আমি ৰামধেনুখন লৈ প্ৰথম আৰম্ভ কৰিছিলো । যিখনৰ পৰিচালনা প্ৰয়াত মুনিন বৰুৱা দেৱে কৰিছিল । তাৰ পাছত আমি আৰ্ট ছবি কৰাৰ পৰিকল্পনা কৰিলো আৰু তেতিয়াই আমাৰ বকুল ফুলৰ দৰে ছবিখন কৰাটো মনলৈ আহিল । কিন্তু ছবিখন ৰাষ্ট্ৰীয় পৰ্যায়ত জিলিকি উঠিব বুলি আমি ভবা নাছিলো । ছবিখনত সামাজিক ব্যৱস্থাপনা প্ৰতিফলিত কৰা হৈছে । ছবিখনে শ্ৰেষ্ঠ শিশু শিল্পীৰ পৰা আৰম্ভ কৰি বহুকেইটা বঁটা পাবলৈ সক্ষম হৈছে ।”
লগতে আহিবলগীয়া ছবি 'ককাদেউতা নাতি আৰু হাতী' সম্পর্কত তেওঁ কয়, “ইতিমধ্যে ছবিখনৰ শ্বুটিং আৰম্ভ হৈছে । ছবিখনৰ জৰিয়তে অসমীয়া ছবিৰ মান কিমান ওপৰলৈ নিব পাৰি সেয়া প্ৰয়াস কৰা হৈছে । প্ৰথম গানটোৰ ইতিমধ্যেই শ্বুটিং হৈ গৈছে । বহু শিল্পী এতিয়া থিয়েটাৰত আছে, সেয়ে পৰ্যায়ক্ৰমে গৈ অহা অক্টোবৰ মাহত ছবিখন মুক্তি দিয়া হ'ব ।”
লগতে পঢ়ক : মাণিকপুৰৰ ৰাজপথত হঠাৎ হনুমেনৰ আবিৰ্ভাৱ - Joy Hanu Man movie
