চিটাৰা ডেস্ক, 13 জুলাই : থাইলেণ্ড আৰু ভাৰতৰ সম্পৰ্কক বিষয়বস্তু হিচাপে লৈ আহি আছে এখন নতুন অসমীয়া ছবি ‘ধ্বজা’। ছবিখনৰ মুখ্য চৰিত্ৰত অভিনয় কৰিব জনপ্ৰিয় অভিনেতা ৰবি শৰ্মাই । প্ৰায় প্ৰতিটো সপ্তাহতে একোখনকৈ হ’লেও অসমীয়া ছবি মুক্তিৰ খবৰে এতিয়া উৎসাহিত কৰি তুলিছে অসমীয়া ছবি প্ৰেমী দৰ্শকসকল । ক্ৰমান্বয়ে বৃদ্ধি পাইছে অসমীয়া ছবি মুক্তিৰ সংখ্যা । ছবি নিৰ্মাণৰ বাবে আগবাঢ়ি আহিছে নৱ প্ৰজন্মৰ বহু পৰিচালক-পৰিচালিকা ।
শেহতীয়াকৈ পুনৰ এখন নতুন অসমীয়া ছবিৰ ঘোষণাই প্ৰতিগৰাকী দৰ্শকক উৎসাহিত কৰি তুলিছে । ছবিখনৰ প’ষ্টাৰখনে আগ্ৰহ বৃদ্ধি কৰিছে দৰ্শকৰ মনত । ‘শ্ৰী ৰঘুপতি’ ৰ সফলতৰ পাচতে এই বৰ্ষৰ শেষৰ ফালে আহি আছে ৰবি শৰ্মা অভিনীত নতুন অসমীয়া ছবি ‘ৰুদ্ৰ’। ছবিখনৰ বাবে দৰ্শকে অপেক্ষা কৰি থাকোতেই ঘোষণা হ’ল সেইগৰাকী অভিনেতাৰে আন এখন ছবিৰ নাম । ‘ৰুদ্ৰ’ ৰ পাচত ৰবি শৰ্মাৰ পৰৱৰ্তী প্ৰকল্প হ'ব ‘ধ্বজা’। আহিবলগীয়া এই নতুন অসমীয়া ছবিখনত অভিনেতাগৰাকীয়ে মুখ্য চৰিত্ৰত অভিনয় কৰাৰ লগতে সহ-অভিনেতা হিচাপে থাকিব দিগন্ত হাজৰিকা, উদয়ন দুৱৰা আৰু মনোজ বৰকটকী আদিকে ধৰি বহু কেইগৰাকী ন-পুৰণি অভিনেতা-অভিনেত্ৰী । এই ছবিখনত অভিনয় কৰিবলগীয়া প্ৰতিগৰাকী তাৰকাই নিজৰ অভিনয়ৰে ইতিমধ্যে দৰ্শকক আপ্লুত কৰিবলৈ সক্ষম হৈছে ৷
অধিৰাজ বৰকটকী আৰু শ্বাহনাৱাজ ৰহমানৰ প্ৰযোজনাৰে আহিবলগীয়া ছবিখনৰ পৰিচালনাৰ কৰিব শ্বাহনাৱাজে । মুম্বাইত প্ৰতিষ্ঠিত শ্বাহনাৱাজ পৰিচিত মিডিয়া উদ্যোগী, চলচ্চিত্ৰ নিৰ্মাতা, গল্পকাৰ, এগৰাকী প্ৰযোজক, কাৰ্যবাহী প্ৰযোজক, সৃষ্টিশীল পৰিচালক, চিত্ৰগ্ৰহণকাৰী, লাইন প্ৰযোজক আৰু ব্ৰেণ্ড প্ৰচাৰ ৰণনীতিবিদ হিচাবে । ইয়াৰোপৰি তেওঁ বহু ক্ষেত্ৰত অভিজ্ঞ । আনহাতে, সহ-পৰিচালক হিচাপে আছে সমৰ জ্যোতি, নমী হুছেইন আৰু চাকিলুৰ ৰহমান । একশ্যন থ্ৰীলাৰ যুক্ত এই ছবিখনৰ একশ্যন টীমত অন্তৰ্ভুক্ত থাকিব হলীউডৰ বিখ্যাত একশ্যন টীম ‘দ্যা ৱান’ । ছবিখনত থাইলেণ্ড আৰু ভাৰতৰ সম্পৰ্কক সংযুক্ত কৰা হ’ব বুলি জানিব পৰা গৈছে ৷
লগতে পঢ়ক : ক্ষুধাত থাকিব ছাচপেন্স-থ্ৰীলাৰ: স্ক্ৰীণৰ পৰা চকু আঁতৰাব নোৱাৰিব আপুনি ! - new assamese web series khudha
