নিউজ ডেস্ক : দক্ষিণ ভাৰতৰ ছুপাৰষ্টাৰ আল্লু অৰ্জুনক এটা গোচৰত শুকুৰবাৰে আটক কৰে আৰক্ষীয়ে । অভিনেতাজনক হায়দৰাবাদৰ চিক্কাদপল্লী আৰক্ষী থানালৈ স্থানান্তৰ কৰা হয় । পুষ্পা-2 প্ৰিমিয়াৰৰ সময়ত যোৱা ৪ ডিচেম্বৰত হায়দাৰবাদৰ সন্ধ্যা থিয়েটাৰত সংঘটিত হৈছে পদপিষ্ট হোৱাৰ এক ঘটনা ৷
ইতিমধ্যে সকলোৰে জ্ঞাত যে, ৪ ডিচেম্বৰত পুষ্পা ২: দ্য ৰুল’ৰ প্ৰিমিয়াৰ শ্ব’ৰ সময়ত আল্লু অৰ্জুন, ৰশ্মিকা মান্দান্না আৰু পুষ্পা ২ ৰ দলটোও হায়দৰাবাদৰ এটা হলত উপস্থিত হয় । য’ত অভিনেতাজনক দেখাৰ পিছত অনুৰাগীসকল উৎফুল্লিত হৈ পৰে ৷ আনকি এটা সময়ত আল্লু অৰ্জুনৰ অনুৰাগীসকলক কোনেও নিয়ন্ত্ৰণ কৰিব নোৱৰা এক পৰিৱেশৰ সৃষ্টি হয় ৷
আল্লু অৰ্জুনক এবাৰ ওচৰৰ পৰা চাবলৈ সকলোৰে মাজত হেঁচা-ঠেলা লাগে ৷ ফলত এই হেঁচা-ঠেলাত পৰি ছবিখন চাবলৈ অহা এগৰাকী মহিলাৰ মৃত্যু হয় ৷ লগতে তেওঁৰ সন্তানটো বেয়াকৈ আঘাতপ্ৰাপ্ত হয় ৷ জানিব পৰা মতে, মৃত মহিলাগৰাকীয়ে তেওঁৰ স্বামী আৰু সন্তানৰ সৈতে চিনেমাখন চাবলৈ আহিছিল ।
এই ঘটনাৰ পাচতে আল্লু অৰ্জুনে তেলেংগানা উচ্চ ন্যায়ালয়ৰ কাষ চাপিছিল । লগতে আৰক্ষীয়ে আল্লু অৰ্জুন, তেওঁৰ নিৰাপত্তা দল আৰু হল পৰিচালনাৰ (theatre management) বিৰুদ্ধে ১০৫ (Culpable homicide not amounting to murder), ১১৮(১) (Voluntarily causing hurt) r/w ৩(৫) BNS ধাৰাত এক গোচৰ ৰুজু কৰিছিল ।
মৃত মহিলাগৰাকীৰ স্বামীৰ এজাহাৰৰ ভিত্তিত যোৱা ৫ ডিচেম্বৰত চিক্কাডপল্লী আৰক্ষী থানাত (Chikkadpally Police Station) ৰুজু হৈছিল এই গোচৰটো । আল্লুৰ পূৰ্বে হায়দৰাবাদ আৰক্ষীয়ে এই গোচৰৰ সৈতে জড়িত তিনিজন লোকক আটক কৰিছে ।
আৰক্ষীৰ মতে, হলৰ পৰিচালনা সমিতি অৰ্থাৎ থিয়েটাৰ মেনেজমেণ্ট বা অভিনেতাৰ দলৰ পৰা তেওঁলোকে হললৈ আহিব বুলি কোনো খবৰ পোৱা নাছিল । সেয়ে নিৰাপত্তাৰ সন্দৰ্ভত কোনো অতিৰিক্ত ব্যৱস্থা কৰা নাছিল ।
উক্ত দিনা সেই কোলাহলত ৰেৱতী (৩৫) আৰু তেওঁৰ পুত্ৰ শ্ৰী তেজ (১৩)ৰ স্বাস্থ্য অৱনতি ঘটনাত তেওঁলোকক ওচৰৰ দুৰ্গবাই দেশমুখ চিকিৎসালয়লৈ স্থানান্তৰিত কৰা হয় । কিন্তু দুৰ্গবাই দেশমুখ চিকিৎসালয়ৰ চিকিৎসকে ৰেৱতী মৃত্যু হোৱা উল্লেখ কৰে ৷ লগতে ৰেৱতীৰ পুত্ৰ শ্ৰী তেজক উন্নত চিকিৎসাৰ বাবে আন এখন চিকিৎসালয়লৈ প্ৰেৰণ কৰে ৷
ইয়াৰ পাচতে আল্লু অৰ্জুনে ৬ ডিচেম্বৰৰ দিনা মৃতকৰ পৰিয়ালক ২৫ লাখ টকাৰ সাহায্য দিয়াৰ কথা ঘোষণা কৰে ৷ তেওঁ এই ঘটনাটো ‘‘অতি হৃদয় বিদাৰক’’ বুলি উল্লেখ কৰে । অভিনেতাগৰাকীয়ে শোকসন্তপ্ত পৰিয়ালটোক ব্যক্তিগতভাৱে লগ কৰি সকলো ধৰণৰ সহায় আগবঢ়াব বুলিও আশ্বাস দিয়ে ।
অভিনেতা আল্লু অৰ্জুনে শ্ৰী তেজৰ চিকিৎসাৰ সকলো খৰচ বহন কৰিব বুলিও তেওঁৰ পৰিয়ালক প্ৰতিশ্ৰুতি দিয়ে ৷ অৱশ্যে বৰ্তমনো শ্ৰী তেজৰ স্বাস্থ্যৰ অৱস্থা সংকটজনক হৈয়েই আছে বুলি জানিব পৰা গৈছে ।
