চিটাৰা ডেস্ক, ১৫ মাৰ্চ: দেশৰ ৰাষ্ট্ৰপতি কোন ? উত্তৰ আহিল 'পৃথ্বীৰাজ চৌহান' । পৃথ্বীৰাজ চৌহান ? সম্পূৰ্ণ আত্মবিশ্বাসী হৈ এই প্ৰশ্নৰ উত্তৰ দিছিল ৷ এয়া ২০১৩ চনৰ কথা, যেতিয়া ভাৰতৰ ৰাষ্ট্ৰপতি আছিল প্ৰণৱ মুখাৰ্জী । ‘ষ্টুডেণ্ট অৱ দ্য ইয়েৰ’ অৰ্থাৎ বৰুণ ধৱন, সিদ্ধাৰ্থ মালহোত্ৰা আৰু আলিয়া ভাটৰ সমগ্ৰ তাৰকা অভিনেতা কৰণ জোহৰৰ শ্ব’ কফি উইথ কৰণত অংশগ্ৰহণ কৰিছিল । এই শ্ব’টোত কৰণ জোহৰে প্ৰশ্ন কৰিছিল ভাৰতৰ ৰাষ্ট্ৰপতি কোন ? এই প্ৰশ্নৰ উত্তৰত সম্পূৰ্ণ আত্মবিশ্বাসী হৈ আলিয়া ভাটে চিঞৰি কৈছিল- পৃথ্বীৰাজ চৌহান ।
ইয়াৰ পিচতে ছ’চিয়েল মিডিয়াত আলিয়াক ট্ৰ’ল কৰিবলৈ আৰম্ভ কৰে । নেটিজেনে তেওঁক ছ’চিয়েল মিডিয়াত ট্ৰ’ল কৰিবলৈ ধৰিলে আৰু তেওঁৰ আইকিউ লেবেলক লৈ প্ৰশ্ন উত্থাপন কৰিবলৈ ধৰিলে । আপুনিও হয়তো ভাবিছে যে কোনোবাই এনে প্ৰশ্নৰ উত্তৰ ভুল কেনেকৈ দিব পাৰে । যিয়েই নহওক কিয়, আলিয়া ভাটে ইয়াৰ বাবে ট্ৰলিঙৰ মুখামুখি হৈ বলীউডত নিজৰ বাবে এনে এক সুকীয়া স্থান গঢ়িবলৈ সক্ষম হৈছে, যাৰ বাবে এতিয়া আৰু এনে প্ৰশ্নৰ বাবে ট্ৰ’ল নহয় আলিয়া ৷ এয়াই হৈছে আলিয়াৰ বিশেষ কথা । ‘ষ্টুডেণ্ট অৱ দ্য ইয়েৰ’ৰ সৈতে আৰম্ভ কৰা যাত্ৰা, ‘হাইৱে’ অহাৰ সময়লৈকে কেৰিয়াৰত ইমানেই গতি লাভ কৰিছিল যে ‘উড়তা পঞ্জাব’ৰ সৈতে অভিনয়ৰ জগতখনৰ শীৰ্ষত উপনীত হ’বলৈ আৰম্ভ কৰে আলিয়া ৷
আলিয়া ভাটৰ বিষয়ে কিছু বিশেষ কথা আজি এই প্ৰতিবেদনত জানো আহক, যিটো জানিলে হয়তো আপুনিও তেওঁৰ সৈতে থকা নেপোটিজমৰ টেগটোক আওকাণ কৰিব ।
১৯৯৯ চনত মুক্তি পোৱা অক্ষয় কুমাৰৰ ‘সংঘৰ্ষ’ ছবিখনত প্ৰথমবাৰৰ বাবে দেখা গৈছিল মহেশ ভাটৰ কন্যা আলিয়াক । ইয়াৰ পিচত ২০১২ চনত ‘ষ্টুডেণ্ট অৱ দ্য ইয়েৰ’ৰ সৈতে বলীউডত আত্মপ্ৰকাশ কৰে ৷ ছবিখনৰ সকলো নতুন অভিনেতাৰ মাজত তেওঁৰ অভিনয়ৰ প্ৰশংসা হৈছিল যদিও একাংশ পৰ্যালোচকে কৈছিল যে আলিয়া এতিয়াও আৰু অধিক কষ্ট কৰাৰ প্ৰয়োজন আছে ।
নেপোটিজমৰ টেগৰ সৈতে যাত্ৰা সহজ নাছিল
কফি উইথ কৰণত ট্ৰ’ল হোৱাৰ পিচত আলিয়াৰ অভিনয়তকৈ ছবি পৰিয়ালৰ সৈতে সম্পৰ্কৰ কথা বেছিকৈ চৰ্চা হৈছিল । কিন্তু এই সকলোবোৰৰ পৰা আঁতৰি নিজকে উপস্থাপন কৰিবলৈ তেওঁ নিজৰ অভিযান অব্যাহত ৰাখিছিল । প্ৰথমখন ছবিৰ দুবছৰৰ পাচত আলিয়াই ৰণদ্বীপ হুড্ডাৰ সৈতে ‘হাইৱে’ত এনে অভিনয় কৰিছিল যে তেওঁ কেৱল ফিল্মফেয়াৰ শ্ৰেষ্ঠ অভিনেত্ৰীৰ বঁটাৰ বাবে মনোনীত হোৱাই নহয়, এই ছবিখনৰ বাবে শ্ৰেষ্ঠ অভিনেত্ৰী সমালোচকৰ বঁটাও লাভ কৰিছিল । ইয়াৰ পিচত আলিয়াই কেতিয়াও পিচলৈ ঘূৰি চাবলগীয়া হোৱা নাছিল ।
কেতিয়াবা ‘উড়তা পঞ্জাব’ত পঞ্জাৱৰ বিহাৰৰ এগৰাকী শ্ৰমিক ছোৱালীৰ চৰিত্ৰত অভিনয় কৰি ফিল্মফেয়াৰ শ্ৰেষ্ঠ অভিনেত্ৰীৰ বঁটা আৰু কেতিয়াবা ‘ৰাজী’ৰ বাবে শ্ৰেষ্ঠ অভিনেত্ৰীৰ বঁটাও লাভ কৰিছিল আলিয়াই । ইটোৰ পিচত সিটোকৈ বঁটাৰ পিচত বঁটা লাভ কৰে আলিয়াই ৷ গলি বয়, ৰকি অৰ ৰাণী কি প্ৰেম কাহানী আৰু গংগুবাই কাথিয়াৱাড়ীৰ বাবেও একে বঁটা লাভ কৰে । অৰ্থাৎ বলীউডত প্ৰৱেশ কৰাৰ পিচৰে পৰা এনে এটা বছৰ যোৱা নাই যেতিয়া তেওঁ হয়তো কোনো বঁটাৰ বাবে মনোনীত হোৱা নাছিল, বা কোনো বঁটা লাভ কৰা নাছিল । ‘গংগুবাই কাথিয়াৱাড়ী’ৰ বাবে শ্ৰেষ্ঠ অভিনেত্ৰীৰ ৰাষ্ট্ৰীয় বঁটাও লাভ কৰিছে আলিয়াই ।
দ্বাদশ শ্ৰেণীলৈকে পঢ়িও আলিয়া এতিয়া এগৰাকী সফল ব্যৱসায়ী
শিক্ষাৰ ভিত্তিত মানুহে আলিয়াক ট্ৰ’ল কৰিছিল ৷ আলিয়াই দ্বাদশ শ্ৰেণীলৈকে শিক্ষাগ্ৰহণ কৰাৰ পাচত পঢ়া-শুনা এৰি অভিনয়ৰ লগত বন্ধুত্ব গঢ়ি তুলিছিল । উচ্চ শিক্ষিত লোকেহে ভাল ব্যৱসায় কৰিব পাৰে বুলি কোৱা কথাষাৰো ভুল বুলি প্ৰমাণিত কৰিলে আলিয়াই । ২০২০ চনত আলিয়াই আৰম্ভ কৰিছিল তেওঁৰ কাপোৰৰ ব্ৰেণ্ড এড-এ-মামা । ৰিলায়েন্স ইণ্ডাষ্ট্ৰীজৰ খুচুৰা শাখা ৰিলায়েন্স ৰিটেইল ভেঞ্চাৰছ লিমিটেডৰ ৰিলায়েন্স ব্ৰেণ্ডছ লিমিটেডে ২০২৩ চনৰ ছেপ্টেম্বৰ মাহত আলিয়াৰ এই ব্ৰেণ্ডৰ সৈতে অংশীদাৰিত্ব কৰিছে ।
আলিয়াৰ এই ব্ৰেণ্ডত ঈশা আম্বানীৰ ৰিলায়েন্স ব্ৰেণ্ডছ লিমিটেডে ৫১ শতাংশ অংশীদাৰিত্ব গ্ৰহণ কৰিছে । এতিয়া আলিয়াও এগৰাকী উৎকৃষ্ট ব্যৱসায়ী বুলি ক’লেও ভুল নহ’ব ৷ ধূপৰ কাঠি নিৰ্মাণ কৰা কানপুৰ কোম্পানী এটাতো বিনিয়োগ কৰিছে আলিয়াই । এই কোম্পানীয়ে মন্দিৰত আগবঢ়োৱা ফুল সংগ্ৰহ কৰি পুনঃব্যৱহাৰ কৰি ধূপৰ ঠি তৈয়াৰ কৰে ।
আলিয়াৰ সম্পত্তি
ফৰ্বছৰ প্ৰতিবেদন অনুসৰি আলিয়া ভাটৰ সম্পত্তিৰ পৰিমাণ প্ৰায় ৩০০ কোটি টকা । এখন ছবিৰ বাবে আলিয়াই লয় ২০ কোটি টকা । একে সময়তে তেওঁ এটা বিজ্ঞাপনৰ বাবে একৰ পৰা দুই কোটি টকা লয় ।
উল্লেখ্য যে, ২০২২ চনৰ এপ্ৰিল মাহত আলিয়াই বলীউডৰ অন্যতম প্ৰতিভাৱান অভিনেতা ৰণবীৰ কাপুৰৰ সৈতে বিবাহপাশত আবদ্ধ হয় । এতিয়া দুয়োগৰাকী এটি কন্যা ৰাহাৰ পিতৃ-মাতৃ ।
লগতে পঢ়ক: নিশা পৰিয়ালৰ সৈতে জন্মদিন উদযাপন আলিয়াৰ, পাৰ্টিত দেখা গ’ল আম্বানী পৰিয়ালকো
