হায়দৰাবাদ : ঐশ্বৰ্য ৰায় বচ্চন-অভিষেক বচ্চন বলীউডৰ অন্যতম প্ৰিয় যুটি ৷ পিছে এই গোটেই বছৰটো তেওঁলোক বিচ্ছেদৰ বাতৰিৰেই চৰ্চাত থাকিল ৷ বচ্চন পৰিয়ালৰ পৰা পৃথকে থাকিবলৈ লোৱাৰে পৰা আৰম্ভ কৰি আম্বানীৰ পৰিয়ালৰ বিয়াত পৃথকে উপস্থিত হোৱালৈকে এই দুই তাৰকাই বাৰুকৈয়ে সকলোৰে দৃষ্টি আকৰ্ষণ কৰি ৰাখিছে ৷ তেওঁলোকৰ বৈবাহিক জীৱন বি-টাউনত এটা ‘ট্ৰেণ্ডিং টপিক অফ ডিছকাছন’ ৷
পাপাৰাজ্জী, নেটিজেনৰ ইমান চোকা নিৰীক্ষণত থকাৰ পিছতো কিন্তু ঐশ্বৰ্য-অভিষেকে বৰ্তমানলৈকে এই সন্দৰ্ভত মুখ খোলা নাই ৷ কোনো এটা মুহূৰ্ততে তেওঁলোকে জানিবলৈ দিয়া নাই তেওঁলোকৰ ব্যক্তিগত জীৱন সম্পৰ্কে ৷ সামাজিক মাধ্যমত ঘূৰি ফুৰা সকলো কথা মাথো অনুমানহে ৷ ঐশ্বৰ্যই কন্যা আৰাধ্যাৰ জন্মদিন পাতিলে, পিতৃৰ বছৰেকীয়া পাতিলে, কিন্তু সকলোবোৰ অনুষ্ঠানৰ ফটোতে অভিষেক অনুপস্থিত ৷ তেনেকুৱাতে আৰম্ভ হৈ যায় জল্পনা-কল্পনা ৷ কিন্তু তাৰ মাজতে অন্য আমন্ত্ৰিত অতিথিৰ ফটো বা ভিডিঅ’ত তেওঁলোকক একেলগে দেখা যায় ৷ তেতিয়াও আৰম্ভ হয় নতুন আলোচনা ৷
পিছে দুই তাৰকাৰ শেহতীয়া ফটোৱে সকলোৰে মুখত হাঁহি বিৰিঙাইছে ৷ তেওঁলোকক একেলগে প’জ দিয়া দেখা গৈছে । ইণ্ডিয়ান টেলিভিছন একাডেমীৰ (আই টি এ) প্ৰতিষ্ঠাপক অনু ৰঞ্জনে শ্বেয়াৰ কৰা ফটো এখনত দম্পতীটোৱে ঐশ্বৰ্যৰ মাতৃ বৃন্দা ৰায় আৰু অনু ৰঞ্জনৰ সৈতে প’জ দিছে ৷ সকলোৰে মুখত আনন্দ স্পষ্টকৈ দেখা গৈছে । ফটোখন তুলিছে ঐশ্বৰ্যই ৷ এই আনন্দময় মুহূৰ্তটোৱে অনুৰাগীসকলক সকাহ দিছে । সকলো যোগাত্মক মন্তব্যই পৰিলক্ষিত হৈছে ৷
পোষ্টটো অনু ৰঞ্জনে শিৰোনামত লিখিছে, "ইমান মৰম, উষ্ণতা ।" পোষ্টটোৱে নেটিজেনসকলৰ পৰা অভূতপূৰ্ব সমৰ্থন লাভ কৰিছে ৷ বহুতে মন্তব্য কৰিছে যে কেনেদৰে পোষ্টটোৱে উৰাবাতৰিবোৰ 'বন্ধ' কৰাত সহায় কৰিছে । এজন ছ'চিয়েল মিডিয়া ব্যৱহাৰকাৰীয়ে অনুক 'সকলোৰে মানসিকতা সলনি কৰাৰ' বাবে ধন্যবাদ জনাইছে ৷ আনহাতে আন সকলে দম্পতীটো সঁচাকৈয়ে একেলগে আছে আৰু সুখী বুলি নিশ্চিত হোৱাৰ বাবে কৃতজ্ঞতা প্ৰকাশ কৰিছে । এজন অনুৰাগীয়ে লিখিছে, "অৱশেষত, সামাজিক মাধ্যমৰ সকলো ধাৰণা... ঈশ্বৰক ধন্যবাদ যে তেওঁলোক এতিয়াও একেলগে আছে !"
লগতে পঢ়ক : পৃথকে উপস্থিত হৈয়ো বিয়াৰ ভিডিঅ’ত একেলগে ওলাল ঐশ্বৰ্য-অভিষেক
