চিটাৰা ডেস্ক, ১১ মাৰ্চ: আগন্তুক লোকসভা নিৰ্বাচনৰ প্ৰাৰ্থী নিৰ্বাচন সন্দৰ্ভত তৃণমূল কংগ্ৰেছত আৰম্ভ হৈছে গৃহকন্দল । দেওবাৰে বিয়লি ঘোষণা কৰা হয় দলীয় প্ৰাৰ্থীৰ তালিকা । এই ঘোষণাৰ কেইঘণ্টামানৰ পাচতে দলটোৰ ৰাজ্যিক সাধাৰণ সম্পাদক তথা অভিনেত্ৰীৰ পৰা ৰাজনীতিবিদলৈ পৰিণত হোৱা সায়ন্তিকা বেনাৰ্জীয়ে পদৰ পৰা পদত্যাগ কৰে । পশ্চিমবংগৰ তৃণমূল কংগ্ৰেছৰ ৰাজ্যিক সভাপতি সুব্ৰত বক্সীলৈ প্ৰেৰণ কৰা পদত্যাগৰ পত্ৰত তেওঁ ব্যক্তিগত কাৰণত পদত্যাগ কৰা বুলি উল্লেখ কৰিছে ।
দলৰ ঘনিষ্ঠ সূত্ৰই জনোৱা মতে, পদত্যাগ পত্ৰত বেনাৰ্জীয়ে কেনেদৰে দলৰ নিয়ম অনুসৰি কাম কৰিছিল আৰু তিনি বছৰ ধৰি নিয়মীয়াকৈ দলীয় কাৰ্যসূচীত অংশগ্ৰহণ কৰিছিল সেই বিষয়ে বিতংভাৱে উল্লেখ কৰিছে । দৰাচলতে অভিষেক বেনাৰ্জীয়ে প্ৰাৰ্থীৰ তালিকা ঘোষণা কৰাৰ পিচতেই দলটোৰ প্ৰতি তেওঁৰ অসন্তুষ্টি স্পষ্ট হৈ পৰে । ব্ৰিগেড পেৰেড গ্ৰাউণ্ডত অনুষ্ঠিত হোৱা মেগা ৰেলীত উপস্থিত আছিল সায়ন্তিকা, য’ৰ পৰা প্ৰাৰ্থীৰ নাম ঘোষণা কৰা হয় ।
এই ঘোষণাৰ পিচতে তেওঁ সভাস্থলীৰ পৰা ওলাই গৈ মোবাইলত কাৰোবাৰ সৈতে কথা পতা দেখা যায় । ইয়াৰ পিচতে এই সিদ্ধান্ত লয় সায়ন্তিকাই ৷ পশ্চিম বংগৰ বাকুঁড়া বিধানসভা সমষ্টিৰ পৰা ২০২১ চনৰ নিৰ্বাচনত প্ৰতিদ্বন্দ্বিতা কৰিছিল বেনাৰ্জীয়ে, অৱশ্যে পৰাজিত হৈছিল । ইয়াৰ পিচত তেওঁক দলৰ ৰাজ্যিক সাধাৰণ সম্পাদক হিচাপে নিযুক্তি দিয়া হয় ।
ইফালে বেনাৰ্জীয়ে পদত্যাগ পত্ৰ দিয়াৰ বিপৰীতে উত্তৰ ২৪ পৰগনা জিলাৰ বেৰেকপুৰ লোকসভা সমষ্টিৰ সাংসদ অৰ্জুন সিঙে তৃণমূল কংগ্ৰেছ নেতৃত্বই তেওঁক দিয়া প্ৰতিশ্ৰুতি পূৰণ নকৰাৰ অভিযোগ উত্থাপন কৰিছে । সিঙৰ নাম প্ৰাৰ্থী তালিকাৰ পৰা আঁতৰাই তেওঁৰ ঠাইত দলটোৱে ৰাজ্যৰ জলসিঞ্চন মন্ত্ৰী পাঠা ভৌমিকক মনোনীত কৰিছে । লোকসভা নিৰ্বাচনৰ পূৰ্বে তৃণমূল কংগ্ৰেছ ত্যাগ কৰি ২০১৯ চনত অৰ্জুন সিং বিজেপিৰ প্ৰাৰ্থী হিচাপে নিৰ্বাচিত হৈছিল । কিন্তু ২০২২ চনত অভিষেক বেনাৰ্জীৰ উপস্থিতিত সিঙে পুনৰ তৃণমূল কংগ্ৰেছত যোগদান কৰে ।
সিঙে অভিযোগ উত্থাপন কৰিছে যে ২০২২ চনত তৃণমূল কংগ্ৰেছত যোগদান কৰাৰ সময়ত তেওঁক বেৰেকপুৰৰ পৰা প্ৰাৰ্থী হিচাপে প্ৰক্ষেপ কৰাৰ প্ৰতিশ্ৰুতি দিয়া হৈছিল । তেওঁ এই সন্দৰ্ভত কয়, ‘‘কিন্তু এতিয়া মোক বাহিৰৰ পৰা অহা বুলি টিকট দিবলৈ নাকচ কৰা হৈছে । দলৰ এই সিদ্ধান্ত মোৰ বাবে যথেষ্ট চাঞ্চল্যকৰ । আগতে কোৱা হ’লে মই দলত যোগদান নকৰিলোহেঁতেন । বাৰে বাৰে সোধা সত্ত্বেও তেওঁ পৰৱৰ্তী ৰাজনৈতিক পদক্ষেপক লৈ মৌন হৈ থাকিল ।’’
লগতে পঢ়ক: CAAৰ বিৰোধিতা কৰাৰ বাবে নিশাটোৰ ভিতৰতে শ্ব’ৰ পৰা বাহিৰ কৰি দিয়া হৈছিল এইগৰাকী অভিনেতাগৰাকীক
