চিটাৰা ডেস্ক, 25 এপ্ৰিল : অসমীয়া ছবিজগতৰ জনপ্ৰিয় অভিনেতা যতীন বৰাৰ আজি ওপজা দিন । 1970 চনত আজিৰ দিনটোতে নগাঁও জিলাত জন্ম হৈছিল জনপ্ৰিয় অভিনেতাগৰাকীৰ । অসমীয়া ছবিজগতত বহুকেইখন জনপ্ৰিয় অসমীয়া ছবিত অভিনয়ৰ দ্বাৰা দৰ্শকৰ মন মুগ্ধ কৰিবলৈ সক্ষম হোৱা অভিনেতাগৰাকীয়ে 1989 চনত আব্দুল মজিদ পৰিচালিত ছবি "উত্তৰকাল"ৰ যোগেদি অভিনয় জীৱনৰ পাতনি মেলিছিল ।
পৰৱৰ্তী সময়ত 1995 চনত প্ৰদীপ গগৈ পৰিচালিত "আই কিল্ড হিম, ছাৰ" নামৰ ছবিখনত এটি মুখ্য চৰিত্ৰত অভিনয় কৰাৰ সুযোগ লাভ কৰিছিল বৰাই । 2000 চনত মুক্তি লাভ কৰা অসমীয়া ছবি "হিয়া দিয়া নিয়া"ৰ জৰিয়তে অসমবাসীৰ মন জয় কৰিবলৈ সক্ষম হৈছিল অভিনেতাগৰাকীয়ে । ছবিখনৰ পৰিচালনা কৰিছিল মুনিন বৰুৱাই । তাৰ পাচতে একাদিক্ৰমে প্ৰায় 45 খনকৈ অসমীয়া ছবি অসমবাসীক উপহাৰ দিবলৈ সক্ষম হৈছে অভিনেতাগৰাকীয়ে ।
যতীন বৰাই অভিনয় কৰা কেইখনমান জনপ্ৰিয় ছবিৰ ভিতৰত হৈছে, কন্যাদান, দাগ, নায়ক, কইনা মোৰ ধুনীয়া, মিঠা মিঠা লগনত, জুমন-সুমন, ৰত্নাকৰ আদি । যতীন বৰা সুদক্ষ অভিনেতাৰ লগতে এগৰাকী ভাল পৰিচালকো । শেহতীয়াকৈ তেওঁ পৰিচালনা কৰা দুখন ছবি ৰত্নাকৰ আৰু ৰাঘৱে দৰ্শকৰ পৰা যথেষ্ট সঁহাৰি লাভ কৰিবলৈ সক্ষম হৈছে । ইয়াৰোপৰি তেওঁ ৰূপালী পৰ্দাৰ লগতে ভ্ৰাম্যমাণ থিয়েটাৰৰ মঞ্চতো অভিনয়ৰ সুযোগ লাভ কৰিছে ।
আজি ওপজা দিনটোত দিনা এক ফেচবুক পোষ্ট যোগে সকলোকে ধন্যবাদ জ্ঞাপন কৰে অভিনেতাগৰাকীয়ে । তেওঁ উল্লেখ কৰে, "মোৰ জন্মদিনৰ দিনা প্ৰভুৰ শ্ৰীচৰণত এভাগি সেৱা আগবঢ়ালো । মন্দিৰৰ এই প্ৰশান্তিৰ সময়ে জীৱনলৈ যথেষ্ট উদ্যম আনে । লগতে, জন্মদিন বুলি অলেখজনে শুভকামনা জনাই মোৰ দিনটো যথেষ্ট বিশেষ কৰি তুলিলে । তেওঁলোক সকলোলৈকে অশেষ ধন্যবাদ । প্ৰভুৱে সকলোকে কৃপা কৰক, তাৰেই কামনা ।"
