নিউজ ডেস্ক, 29 জুন : প্ৰথমে জিঅ’ আৰু তাৰ পিচতে এয়াৰটেলে ৰিচাৰ্জৰ শুল্ক বৃদ্ধিৰ সিদ্ধান্তৰ কথা ৰাজহুৱা কৰিছিল ৷ সেই খবৰে গ্ৰাহকসকলৰ মাজত প্ৰতিক্ৰিয়াৰ সৃষ্টি কৰি থকাৰ সময়তে ভোডাফোন-আইডিয়াইও শুল্ক বৃদ্ধিৰ সিদ্ধান্ত গ্ৰহণ কৰিছে ৷ কোম্পানীটোৱে বৃদ্ধি কৰিছে ৰিচাৰ্জৰ দাম ৷ ৪ জুলাইৰ পৰা এই নতুন নিৰিখ প্ৰযোজ্য হ’ব ৷ এক বিবৃতিৰ জৰিয়তে টেলিকম কোম্পানীটোৱে কয় যে ৪ জুলাইৰ পৰা কোম্পানীটোৰ সকলো সেৱা কৰ বৃদ্ধি পাব ৷
জানিব পৰা মতে কোম্পানীটোৰ গ্ৰাহকসকলে বৰ্তমান বহন কৰি থকা খৰচতকৈ ১০ৰ পৰা ২৪ শতাংশ বৃদ্ধি পাব ৷ উল্লেখ্য যে স্পেকট্ৰাম নিলামৰ পিচতে সেৱা কৰ বৃদ্ধিৰ সিদ্ধান্ত গ্ৰহণ কৰা হৈছে ৷
গ্ৰাহকক স্তম্ভিত কৰি বৃহস্পতিবাৰে ৰিলায়েন্স জিঅ’ই ৰিচাৰ্জৰ শুল্ক ১২ শতাংশৰ পৰা ২৭ শতাংশপৰ্যন্ত বৃদ্ধি কৰাৰ কথা ঘোষণা কৰিছিল । সেই ঘোষণাই চৰ্চা লাভ কৰাৰ এদিন পিচতে শুকুৰবাৰে ভাৰতী এয়াৰটেলেও শুল্ক বৃদ্ধি কৰাৰ কথা ঘোষণা কৰে ৷ একে সময়তে শনিবাৰে ভোডাফোন-আইডিয়ায়ো একে পথেৰেই বাট বুলিলে । কোম্পানীটোৰ তৰফৰ পৰা জানিব পৰা মতে অতিশীঘ্ৰে ৫G সেৱাও আৰম্ভ কৰিব ৷
VIৰ নতুন নিৰিখৰ তালিকা:
| চলিত দাম | নতুন দাম | ভেলিডিটী (দিন) | সুবিধা |
|---|---|---|---|
| 179 | 199 | 28 | 2GB ডাটা, 300 SMS |
| 459 | 509 | 84 | 6GB ডাটা, 300 SMS |
| 1799 | 1999 | 365 | 24GB ডাটা, 300 SMS |
| 269 | 299 | 28 | 1GB প্ৰতিদিনে |
| 299 | 349 | 28 | 1.5GB প্ৰতিদিনে |
| 319 | 379 | 30 | 2GB প্ৰতিদিনে |
| 479 | 579 | 56 | 1.5GB প্ৰতিদিনে |
| 539 | 649 | 56 | 2GB প্ৰতিদিনে |
| 719 | 859 | 84 | 1.5GB প্ৰতিদিনে |
| 839 | 979 | 84 | 2GB প্ৰতিদিনে |
| 2899 | 3499 | 365 | 1.5GB প্ৰতিদিনে |
| 19 | 22 | 1 | 1GB |
| 39 | 48 | 1 | 6GB |
নতুন সেৱা কৰৰ অধীনত গ্ৰাহকে এতিয়াৰে পৰা ২৮ দিনৰ ৰিচাৰ্জৰ বাবে ১৯৯ টকা ভৰিব লাগিব ৷ যিটো প্লেন এইপৰ্যন্ত ১৭৯ টকাত উপলব্ধ আছিল ৷ কেৱল ২৮ দিনীয়া প্লেনৰে নহয়, ৮৪ দিনীয়া প্লেনৰ দামো বৃদ্ধি কৰিছে কোম্পানীটোৱে ৷
৮৪ দিনৰ ভেলিডিটীৰ প্লেনৰ বাবে ভি আইৰ গ্ৰাহকসকলে এতিয়াৰে পৰা ১৪০ টকা অধিক ব্যয় কৰিব লাগিব ৷ প্ৰতিটো দিনৰ বাবে ১.৫ জিবি উপলব্ধ প্লেনৰ মূল্য ৭১৯ টকাৰ পৰা ৮৫৯ টকালৈ বৃদ্ধি কৰাৰ বিপৰীতে ২ জিবি প্ৰতিটো দিনৰ প্লেনৰ মূল্য ৮৩৯ টকাৰ পৰা ৯৭৯ টকালৈ বৃদ্ধি কৰিছে কোম্পানীটোৱে ৷ আনহাতে ইতিমধ্যে চলি থকা ৭১৯ টকাৰ প্লেনটোৰ বাবে দিব লাগিব ৮৫৯ টকা ৷
কোম্পানীটোৰ আনলিমিটেড প্লেনো ২৮৯৯ টকাৰ পৰা ৩৪৯৯ টকালৈ বৃদ্ধি কৰা হৈছে ৷ অৱশ্যে ভোডাফোন আইডিয়াই ৩৬৫ দিনৰ বৈধতা আৰু ডাটা পেক থকা ১,৭৯৯ আৰু ৩,০৯৯ টকীয়া প্লেন দুটাৰ কোনো সালসলনি কৰা নাই । উল্লেখ্য যে ৰিচাৰ্জ প্লেনসমূহৰ দাম প্ৰায় ২১ শতাংশ বৃদ্ধি পাইছে ।
লগতে পঢ়ক: JIO ৰ পাচতে Airtel-এ ৰ গ্ৰাহকক মাধমাৰ; ব্যয়বহুল হৈ পৰিছে ৰিচাৰ্জিং সেৱা
