নিউজ ডেস্ক, ৯ অক্টোবৰ : নেচনেল কনফাৰেন্সৰ নেতা ওমৰ আব্দুল্লাই সোমবাৰে কয় যে প্ৰধানমন্ত্ৰী নৰেন্দ্ৰ মোদীয়ে জম্মু-কাশ্মীৰক ৰাজ্যৰ মৰ্যাদা ওভতাই দি 'সন্মানীয় কাম' কৰিব বুলি তেওঁ আশা কৰে ।
"কেন্দ্ৰীয়শাসিত অঞ্চল হিচাপেও বহু কাম কৰিব পাৰি, কিন্তু স্পষ্টভাৱে কিছু কাম কৰিব নোৱাৰি । আমি আশাকৰোঁ যে জম্মু-কাশ্মীৰ চিৰদিনৰ বাবে কেন্দ্ৰীয়শাসিত অঞ্চল হৈ যেন নাথাকে । আমি আশাকৰোঁ যে সন্মানীয় প্ৰধানমন্ত্ৰীয়ে এই সন্মানীয় কামটো কৰিব আৰু অতি সোনকালে জম্মু-কাশ্মীৰক ৰাজ্যৰ মৰ্যাদা প্ৰদান কৰিব । তাৰ পিচত আমি আমাৰ বাকী ইস্তাহাৰৰ কাম কাৰ্যকৰী কৰিম ।" জম্মু-কাশ্মীৰৰ সম্ভাৱ্য পৰৱৰ্তী মুখ্যমন্ত্ৰী তথা এন চিৰ উপ-সভাপতিগৰাকীয়ে পি টি আইৰ আগত কয় ।
জম্মু-কাশ্মীৰ বিধানসভা নিৰ্বাচনত এন চি-কংগ্ৰেছ মিত্ৰজোঁটক বিজয়ৰ দিশে লৈ যোৱা আব্দুল্লাই আশা প্ৰকাশ কৰে যে প্ৰধানমন্ত্ৰীয়ে কেন্দ্ৰীয়শাসিত অঞ্চলটোৰ জনসাধাৰণক ৰাজ্যৰ মৰ্যাদা ওভতাই দিয়াৰ প্ৰতিশ্ৰুতি পূৰণ কৰিব ।
"প্ৰধানমন্ত্ৰী, গৃহমন্ত্ৰী, তেওঁলোক আটায়ে সন্মানীয় ব্যক্তি । সংসদত তেওঁলোকৰ বক্তব্য আৰু হস্তক্ষেপত, উচ্চতম ন্যায়ালয়ত তেওঁলোকৰ প্ৰতিনিধিৰ জৰিয়তে, তেওঁলোকে ৰাজ্যৰ মৰ্যাদা ওভতাই দিয়াৰ প্ৰতিশ্ৰুতি দিছে । গতিকে মই বিশ্বাস কৰোঁ যে এইটো অতি সোনকালেই হ'ব । তাৰ পিচত নিশ্চিতভাৱে আমাৰ অগ্ৰাধিকাৰ তাৰ পৰা আগবাঢ়ি যাব ।" তেওঁ লগতে কয় ।
এক প্ৰশ্নৰ উত্তৰত আব্দুল্লাই কয় যে জম্মু-কাশ্মীৰ চৰকাৰে কেন্দ্ৰৰ সৈতে বিৰোধীৰ সম্পৰ্ক ৰক্ষা কৰি চলিব নোৱাৰে ।
"নতুন চৰকাৰখন গঠন হোৱাৰ পিচত জম্মু-কাশ্মীৰৰ মুখ্যমন্ত্ৰী যিয়েই নহওক কিয়, মই আশা কৰিম যে তেওঁ প্ৰধানমন্ত্ৰী, গৃহ মন্ত্ৰী আৰু অন্যান্য নেতাসকলক দিল্লীত সাক্ষাৎ কৰিব । তাত তেওঁলোকক এই কথাৰে প্ৰভাৱিত কৰিব যে জম্মু-কাশ্মীৰৰ জনাদেশ ৰাজ্যৰ মৰ্যাদা পুনৰুদ্ধাৰৰ বাবে আছিল, উন্নয়ন আৰু শান্তিৰ বাবে আছিল আৰু মুখ্যমন্ত্ৰী যিয়েই নহওক, মই আশাকৰোঁ যে তেওঁলোকে ভাৰত চৰকাৰৰ সৈতে এক সুন্দৰ কামৰ সম্পৰ্ক স্থাপন কৰিবলৈ সক্ষম হ'ব ।" আব্দুল্লাই কয় ।
"জম্মু-কাশ্মীৰৰ সমস্যা বহুত আছে আৰু সেয়ে ৰাজ্যখনে কেন্দ্ৰীয় চৰকাৰৰ সৈতে বিৰোধী সম্পৰ্ক ৰক্ষা কৰি চলিব নোৱাৰে । আমি একেলগে কাম কৰাৰ এটা উপায় বিচাৰিব লাগিব আৰু মই আশাকৰোঁ যে কেন্দ্ৰীয় চৰকাৰে জনসাধাৰণৰ আদেশক সন্মান জনাব আৰু জনসাধাৰণৰ সমস্যা সমাধানৰ বাবে জম্মু-কাশ্মীৰ চৰকাৰৰ সৈতে একেলগে কাম কৰিব ।" তেওঁ লগতে কয় ।
আব্দুল্লাই কয় যে এন চি বিধায়িনী দলে দলটোৰ নেতা নিৰ্বাচনৰ বাবে এক বৈঠকত মিলি হ'ব আৰু তাৰ পিচত মিত্ৰজোঁটৰ নেতাৰ বিষয়ে সিদ্ধান্ত ল'বলৈ মিত্ৰজোঁটৰ বৈঠক অনুষ্ঠিত হ'ব ।
"এই মুহূৰ্তত নেচনেল কনফাৰেন্স বিধায়িনী দলে বহি ইয়াৰ নেতা বাছনি কৰাটো উচিত; সেইটো এতিয়াও কৰা হোৱা নাই । মই ভাবোঁ যে মোৰ সহকৰ্মীসকলে বিজয় উদযাপন কৰিবলৈ কমেও এটা দিন লাভ কৰাটো তেওঁলোকৰ প্ৰাপ্য । সেয়েহে কাইলৈ আমি বিজয় উদযাপন কৰিম ।" তেওঁ কয় ।
এন চিৰ উপ-সভাপতিগৰাকীয়ে আশা ব্যক্ত কৰে যে এদিন বা দুদিনৰ ভিতৰতে দলৰ সভাপতি ফাৰুক আব্দুল্লাই বিধায়িনী দলৰ বৈঠক আহ্বান কৰিব ।
"বিধায়িনী দলে ইয়াৰ নেতা নিৰ্বাচন কৰিব, তাৰ পিচত মিত্ৰজোঁটে নিজৰ নেতা নিৰ্বাচন কৰিব আৰু তাৰ পিচত সমৰ্থন-পত্ৰ লাভ কৰিলে আমি লেফটেনেণ্ট গভৰ্ণৰৰ ওচৰত আমি চৰকাৰ গঠনৰ দাবী উত্থাপন কৰিম ।" তেওঁ লগতে কয় ।
