নেশ্যনেল ডেস্ক, ১৩ মে' : দেশৰ ১০ খন ৰাজ্যত সোমবাৰে লোকসভা নিৰ্বাচনৰ চতুৰ্থ পৰ্যায়ৰ ভোটগ্ৰহণ অনুষ্ঠিত হৈছে । তাৰ ভিতৰত পশ্চিমবংগৰ ৮ খন আসনত ভোটগ্ৰহণ অনুষ্ঠিত হৈছে । কিন্তু ভোটগ্ৰহণৰ মাত্ৰ কেইঘণ্টামান পূৰ্বে ৰাজ্যখনত তৃণমূল কংগ্ৰেছৰ এজন কৰ্মীৰ মৃতদেহ উদ্ধাৰ হৈছে । মৃত কৰ্মীজন মিণ্টু শ্বেখ বুলি চিনাক্ত হৈছে ।
সোমবাৰে ভোটগ্ৰহণ অনুষ্ঠিত হোৱা বৰ্ধমান পূৰ্ব লোকসভা সমষ্টিৰ অন্তৰ্গত কেতুগ্ৰামত এই হত্যাকাণ্ড সংঘটিত হৈছে । জানিব পৰা মতে দুৰ্বৃত্তই লোকজনক প্ৰথমে চোকা অস্ত্ৰৰে আক্ৰমণ কৰে আৰু পিচত তেওঁলৈ লক্ষ্য কৰি বোমা নিক্ষেপ কৰে । তৃণমূল কংগ্ৰেছে দাবী কৰা মতে দুৰ্বৃত্তৰ আক্ৰমণত নিহত লোকজন দলীয় কৰ্মী আছিল ।
স্থানীয় লোক আৰু আৰক্ষীৰ মতে মিণ্টু শ্বেখ যোৱা নিশা এখন বাইকেৰে ঘৰলৈ গৈ আছিল । কেতুগ্ৰাম বিধানসভা সমষ্টিৰ চেঞ্চুৰী গাঁৱৰ সমীপত একাংশ দুৰ্বৃত্তই তেওঁৰ পথ অৱৰোধ কৰে । তাৰ পিচত তেওঁ মাটিত বগৰাই তীক্ষ্ণ অস্ত্ৰৰে আক্ৰমণ কৰে । ইয়াৰ পিচত তেজেৰে লুতুৰি-পুতুৰি মিণ্টু শ্বেখৰ ফালে বোমা নিক্ষেপ কৰে । পিচত স্থানীয় লোকে মিণ্ট শ্বেখৰ মৃতদেহটো প্ৰত্যক্ষ কৰে আৰু কেতুগ্ৰাম আৰক্ষীক খবৰ দিয়ে ।
তৃণমূল কংগ্ৰেছে দাবী কৰিছে যে মিন্টু শ্বেখ এগৰাকী দলীয় কৰ্মী আছিল । কেতুগ্ৰামৰ টিএমচি বিধায়ক শ্বেখ শ্বাহনাৱাজেও এই ঘটনাক লৈ শোকপ্ৰকাশ কৰে । টিএমচিয়ে অভিযোগ কৰা মতে এই ঘটনাত চিপিআই(এম) দলৰ কৰ্মী জড়িত আছে । অৱশ্যে কেতুগ্ৰামৰ চিপিআই(এম) নেতৃত্বই টিএমচিৰ দ্বাৰা উত্থাপিত এই অভিযোগ অস্বীকাৰ কৰিছে । তেওঁলোকে দাবী কৰিছে যে ঘটনাটো তৃণমূলৰ দলীয় কৰ্মীৰ মাজৰ বিবাদৰ বাবে সংঘটিত হৈছে ।
