নতুন দিল্লী : উচ্চতম ন্যায়ালয়ে বুধবাৰে এক ৰায়ত কয় যে লঘু মটৰ বাহনৰ (এলএমভি) বাবে অনুজ্ঞা-পত্ৰ থকা এজন ব্যক্তিয়ে 7,500 কিলোগ্ৰামলৈকে বোজাই নোহোৱা পৰিবহণ বাহন চলাবলৈ অধিকাৰ লাভ কৰে ।
মুখ্য ন্যায়াধীশ ডি ৱাই চন্দ্ৰচূড়ৰ নেতৃত্বত পাঁচজনীয়া সাংবিধানিক বিচাৰপীঠে এই ৰায় প্ৰদান কৰে । এই আইনী প্ৰশ্নটোৱে বীমা কোম্পানীবোৰৰ দ্বাৰা এলএমভি চলাবলৈ অনুজ্ঞা-পত্ৰ থকা লোকসকলে চলোৱা পৰিবহণ বাহনৰ দুৰ্ঘটনাৰ ক্ষেত্ৰত ক্ষতিপূৰণ দাবী পৰিশোধৰ ক্ষেত্ৰত বিভিন্ন বিবাদৰ সৃষ্টি কৰিছিল ।
মুখ্য ন্যায়াধীশৰ নেতৃত্বত আৰু ন্যায়াধীশ হৃষীকেশ ৰয়, পি এছ নৰসিংহ, পংকজ মিথাল আৰু মনোজ মিশ্ৰক লৈ গঠিত পাঁচজনীয়া বিচাৰপীঠে ২১ আগষ্টত ৰায়টো সংৰক্ষিত ৰাখিছিল । শুনানিৰ সময়ত কেন্দ্ৰক প্ৰতিনিধিত্ব কৰা এটৰ্ণী জেনেৰেল আৰ ভেংকটৰমণীয়ে আদালতত যুক্তি দৰ্শায় যে মটৰ বাহন (এমভি) আইন, 1988 সংশোধনৰ পৰামৰ্শ প্ৰায় সম্পূৰ্ণ হৈছে । তেওঁ কয় যে প্ৰস্তাৱিত সংশোধনীসমূহ এতিয়াও সংসদত উত্থাপন কৰা হোৱা নাই আৰু এইটো কেৱল সংসদৰ শীতকালীন অধিবেশনতহে কৰিব পৰা যাব ।
বুধবাৰে শীৰ্ষ ন্যায়ালয়ে কয় যে যদি বাহনৰ মুঠ ওজন 7,500 কিলোগ্ৰামৰ ভিতৰত হয়, তেন্তে এলএমভি অনুজ্ঞা-পত্ৰ থকা সাধাৰণ লোকেও পৰিবহণ বাহন চলাব পাৰে ।
বিচাৰপীঠৰ হৈ ৰায় ঘোষণা কৰি ন্যায়াধীশ ৰয়ে কয়, "আমি এনে সিদ্ধান্তত উপনীত হ'বলৈ সক্ষম হৈছোঁ, কিয়নো এই ক্ষেত্ৰত কোনো পক্ষই কোনো অভিজ্ঞতামূলক তথ্য প্ৰস্তুত কৰা নাই, যিয়ে দেখুৱাব পাৰে যে পৰিবহণ বাহন চলাই থকা এলএমভি চালকসকল ভাৰতত পথ দুৰ্ঘটনাৰ বাবে এক গুৰুত্বপূৰ্ণ কাৰণ ।" ন্যায়াধীশ ৰয়ে কয় যে পথ সুৰক্ষা বিশ্বজুৰি এক গুৰুতৰ ৰাজহুৱা সমস্যা আৰু পথ দুৰ্ঘটনাৰ ফলত ভাৰতত ১.৭ লাখ লোক নিহত হৈছে ।
শীৰ্ষ ন্যায়ালয়ে কয় যে পৰিবহণ বাহন চলাবলৈ অতিৰিক্ত যোগ্যতাৰ প্ৰয়োজনীয়তা কেৱল সেই পৰিবহণ বাহনবোৰৰ ক্ষেত্ৰত প্ৰযোজ্য হ'ব, যিবোৰৰ ওজন ৭৫০০ কিলোগ্ৰামতকৈ অধিক ।
বিচাৰপীঠে লগতে কয় যে এই ৰায়টোৱে এগৰাকী এলএমভি অনুজ্ঞা-পত্ৰধাৰীয়ে বীমা দাবী কৰাত সহায় কৰিব, যিয়ে ৭৫০০ কিলোগ্ৰামৰ তলৰ বাহন চলায় । বিচাৰপীঠে এইকথাতো জোৰ দিয়ে যে অনুজ্ঞা-পত্ৰ ব্যৱস্থা স্থিৰ হৈ থাকিব নোৱাৰে আৰু ন্যায়ালয়ে আশা কৰে যে আইনখনত উপযুক্ত সংশোধন কৰা হ'ব । দেশত পথ দুৰ্ঘটনাৰ তথ্যৰ পটভূমিত ন্যায়াধীশ ৰয়ে কয় যে এলএমভি চালকসকলৰ বাবেই যে এয়া হৈছে সেইটো স্বীকাৰযোগ্য নহয় ।
ৰয়ে লগতে কয় যে বিধিবদ্ধ আঁচনিৰ অধীনত চালকসকলৰ বাবে বৰ্তমানৰ অনুজ্ঞা-পত্ৰ ব্যৱস্থাই কেনেদৰে কাম কৰিব লাগে সেই বিষয়ে ন্যায়ালয়ৰ বৰ্তমানৰ ব্যাখ্যাই পথ সুৰক্ষাৰ উদ্বেগৰ সৈতে আপোচ কৰাৰ সম্ভাৱনা নাই । "ই পৰিবহণ বাহন পৰিচালনা কৰা চালকসকলৰ জীৱিকাৰ সমস্যাবোৰো সমাধান কৰিব, যিসকলে তেওঁলোকৰ এলএমভি অনুজ্ঞা-পত্ৰৰে 7,500 কিলোগ্ৰামৰ তলৰ পৰিবহণ বাহনত সৰ্বাধিক সময় অতিবাহিত কৰে...।" তেওঁ কয় ।
আনহাতে, শীৰ্ষ ন্যায়ালয়ে ছীট বেল্টৰ নিয়ম অনুসৰণ নকৰা, মোবাইলৰ ব্যৱহাৰ, নিচাগ্ৰস্ত আদি কাৰণৰ ওপৰতো আলোকপাত কৰে ।
