নেশ্যনেল ডেস্ক, ৩১ আগষ্ট : "ভাৰতৰ জনসাধাৰণে কেতিয়াও উচ্চতম ন্যায়ালয় বা সাধাৰণ ন্যায়পালিকাৰ ওপৰত কোনো অবিশ্বাস প্ৰদৰ্শন কৰা নাই ।" এই মন্তব্য প্ৰধানমন্ত্ৰী নৰেন্দ্ৰ মোদীৰ । ভাৰতৰ উচ্চতম ন্যায়ালয়ৰ ৭৫ বছৰীয়া জয়ন্তী উপলক্ষে ভাৰত মণ্ডপমত জিলা ন্যায়পালিকাৰ ৰাষ্ট্ৰীয় সন্মিলনত ভাষণ প্ৰদান কৰি প্ৰধানমন্ত্ৰীয়ে এই মন্তব্য কৰে ।
তেওঁ কয়, "ভাৰতৰ মানুহে কেতিয়াও উচ্চতম ন্যায়ালয় বা ন্যায়পালিকাৰ ওপৰত কোনো অবিশ্বাস প্ৰদৰ্শন কৰা নাই... উচ্চতম ন্যায়ালয়ৰ ৭৫ বছৰীয়া জয়ন্তী হৈছে সংবিধান, ইয়াৰ সাংবিধানিক মূল্যবোধ আৰু ভাৰত অধিক পৰিপক্ক গণতন্ত্ৰ হিচাপে উদীয়মান হোৱাৰ এক যাত্ৰা ।" সেয়েহে উচ্চতম ন্যায়ালয়ৰ এই দীঘলীয়া যাত্ৰাই গণতন্ত্ৰৰ মাতৃ হিচাপে ভাৰতৰ গৌৰৱ আৰু বৃদ্ধি কৰে বুলি তেওঁ উল্লেখ কৰে । উচ্চতম ন্যয়ালয়ৰ প্ৰতি থকা বিশ্বাস বছৰ বছৰ ধৰি একেই আছে বুলিও তেওঁ আত্মবিশ্বাসী ।
- উচ্চতম ন্যায়ালয়ৰ ৭৫ বছৰীয়া জয়ন্তীত প্ৰধানমন্ত্ৰী
প্ৰধানমন্ত্ৰীয়ে লগতে কয় যে "জৰুৰীকালীন অৱস্থাৰ অন্ধকাৰ দিনত" উচ্চতম ন্যায়ালয়ে ৰাষ্ট্ৰীয় স্বাৰ্থৰ বিষয়ত মৌলিক অধিকাৰ আৰু ৰাষ্ট্ৰীয় ঐক্যক বজাই ৰাখিছে । প্ৰধানমন্ত্ৰীয়ে উচ্চতম ন্যায়ালয় প্ৰতিষ্ঠাৰ ৭৫ বছৰীয়া জয়ন্তী উপলক্ষে সন্মিলনত এক ডাক টিকট আৰু মুদ্ৰা উন্মোচন কৰে ।
Addressing the National Conference of District Judiciary.https://t.co/QRCLSh1mDS
— Narendra Modi (@narendramodi) August 31, 2024
তেওঁ কয় যে চৰকাৰে যোৱা ১০ বছৰত ন্যায়িক আন্তঃগাঁথনিৰ বিকাশৰ বাবে ৮,০০০ কোটি টকা ব্যয় কৰিছে । প্ৰধানমন্ত্ৰীয়ে কয়, "ন্যায় ব্যৱস্থাৰ বিলম্ব দূৰ কৰিবলৈ, যোৱা দশকত বিভিন্ন স্তৰত কাম কৰা হৈছে । যোৱা ২৫ বছৰত ন্যায়িক আন্তঃগাঁথনিৰ বাবে ব্যয় কৰা পৰিমাণৰ ৭৫ শতাংশ কেৱল যোৱা ১০ বছৰত হে ব্যয় কৰা হৈছে ।"
তেওঁ কয়,"স্বাধীনতাৰ অমৃতকালত ১৪০ কোটি দেশবাসীৰ কেৱল এটা সপোন আছে–উন্নত ভাৰত, নতুন ভাৰত । নতুন ভাৰত, অৰ্থাৎ চিন্তা আৰু সংকল্পৰ ক্ষেত্ৰত এক আধুনিক ভাৰত । আমাৰ ন্যায়পালিকা এই দৃষ্টিভংগীৰ এক শক্তিশালী স্তম্ভ ।"
- মহিলা আৰু শিশুসকলৰ সুৰক্ষা
মহিলা আৰু শিশুসকলৰ সুৰক্ষা সম্পৰ্কে ভাষণ প্ৰদান কৰি তেওঁ কয় যে তেওঁলোকৰ বিৰুদ্ধে হোৱা অত্যাচাৰ সমাজৰ এক গুৰুতৰ চিন্তাৰ বিষয় । তেওঁ কয়, "মহিলাৰ সুৰক্ষাৰ বাবে দেশত বহুতো কঠোৰ আইন প্ৰস্তুত কৰা হৈছে ৷ কিন্তু আমি ইয়াক অধিক সক্ৰিয় কৰিব লাগিব । মহিলাৰ ওপৰত হোৱা অত্যাচাৰৰ সৈতে সম্পৰ্কিত ক্ষেত্ৰত যিমান সোনকালে সিদ্ধান্ত লোৱা হ'ব, বেছিখিনি জনসংখ্যাই সুৰক্ষাৰ অধিক নিশ্চয়তা লাভ কৰিব ।"
কেন্দ্ৰীয় মন্ত্ৰী অৰ্জুন ৰাম মেঘৱাল, মুখ্য ন্যায়াধীশ ডি ৱাই চন্দ্ৰচূড় আৰু উচ্চতম ন্যায়ালয় বাৰ এছ'চিয়েশ্যনৰ সভাপতি কপিল চিব্বালো এই অনুষ্ঠানত উপস্থিত থাকে । ভাৰতৰ উচ্চতম ন্যায়ালয়ে আয়োজন কৰা দুদিনীয়া সন্মিলনখনত সকলো ৰাজ্য আৰু কেন্দ্ৰীয় শাসিত অঞ্চলৰ জিলা ন্যায়পালিকাৰ ৮০০ৰো অধিক প্ৰতিনিধিয়ে অংশগ্ৰহণ কৰে ।
৫ টা কাৰ্যকৰী অধিৱেশনত জিলা ন্যায়পালিকাৰ সৈতে সম্পৰ্কিত বিষয় যেনে আন্তঃগাঁথনি, মানৱ সম্পদ, সকলোৰে বাবে অন্তৰ্ভুক্ত আদালতকক্ষ, ন্যায়িক সুৰক্ষা আৰু ন্যায়িক সুস্থতা, জাতি ব্যৱস্থাপনা আৰু ন্যায়িক প্ৰশিক্ষণৰ বিষয়ে আলোচনা কৰা হ'ব ।
