নেশ্যনেল ডেস্ক, 28 জুলাই: পশ্চিম দিল্লীৰ জনপ্ৰিয় এটা কোচিং চেণ্টাৰৰ বেছমেণ্টত হঠাতে পানী প্ৰৱেশ কৰাৰ ফলত চাৰি ঘণ্টাৰো অধিক সময় আৱদ্ধ হৈ থকা তিনিগৰাকী ছাত্ৰৰ মৃত্যু হোৱাৰ পাচতে দিল্লী আৰক্ষীয়ে দেওবাৰে আই এ এছ কোচিং চেণ্টাৰটোৰ মালিক আৰু সমন্বয়কগৰাকীক আটক কৰে ৷
কি কি ধাৰাৰ অধীনত গোচৰ ৰুজু
কেন্দ্ৰীয় আৰক্ষী উপ আয়ুক্ত (ডিচিপি) এম হৰ্ষবৰ্ধনেও কয়, "আৰক্ষীয়ে কোচিং ইনষ্টিটিউট, অট্টালিকাটোৰ পৰিচালনা, আৰু সেই স্থানত নলাটোৰ ৰক্ষণাবেক্ষণৰ দায়িত্বত থকাসকলৰ বিৰুদ্ধে গোচৰ ৰুজু কৰিছে । ভাৰতীয় ন্যায় সংহিতাৰ 105, 106 (1), 115 (2), 290 আৰু 35 নং ধাৰাৰ অধীনত পঞ্জীয়ন কৰা হৈছে গোচৰ । এই গোচৰটো কোচিং ইনষ্টিটিউট আৰু বিল্ডিংটোৰ পৰিচালনা আৰু সেই ঠাইৰ নলা ৰক্ষণাবেক্ষণৰ দায়িত্বত থকাসকলৰ বিৰুদ্ধে ৰুজু হৈছে ৷ এতিয়ালৈকে আমি উক্ত কোচিং চেণ্টাৰৰ মালিক আৰু সমন্বয়কগৰাকীক আটক কৰিছো ৷ ঘটনা সন্দৰ্ভত তদন্ত চলি আছে ।"
ভুক্তভোগীৰ পৰিচয়
এই ঘটনাত উত্তৰ প্ৰদেশৰ আম্বেদকাৰ নগৰ জিলাৰ বাসিন্দা শ্ৰেয়া যাদৱ, তেলেংগানাৰ তনয়া ছোনী আৰু কেৰালাৰ এনাৰকুলামৰ বাসিন্দা নিভিন ডালউইনৰ মৃত্যু ঘটে ।
আৰক্ষীয়ে কয়, "উদ্ধাৰ অভিযান আৰম্ভ হৈছে, দিল্লী আৰক্ষী আৰু দিল্লী অগ্নিনিৰ্বাপক বাহিনীৰ লগতে এন ডি আৰ এফেও এই অভিযানত জড়িত আছিল । অনুসন্ধান আৰু উদ্ধাৰ কাৰ্যৰ শেষলৈকে বেছমেণ্টৰ পৰা 3 টা মৃতদেহ উদ্ধাৰ কৰা হৈছে । 3 টা মৃতদেহ চিনাক্ত কৰা হৈছে আৰু পৰিয়ালক অৱগত কৰা হৈছে ।"
আৰক্ষীয়ে মৰণোত্তৰ পৰীক্ষাৰ বাবে তেওঁলোকৰ মৃতদেহ ৰাম মনোহৰ লোহিয়া হাস্পতাললৈ প্ৰেৰণ কৰিছে ।
প্ৰতিবাদত বহিল শিক্ষাৰ্থী
অতিৰিক্ত আৰক্ষী উপ আয়ুক্ত শচীন শৰ্মাই প্ৰতিবাদকাৰী ছাত্ৰ-ছাত্ৰীক সম্বোধন কৰি কয়, "তিনিজন লোকৰ মৃত্যু ঘটিছে । আমি কিয় কিবা লুকুৱাই ৰাখিম ? আমি আপোনালোকক আশ্বাস দিছো যে আমি আইনগতভাৱে যি সম্ভৱ কৰিম । তদন্ত চলি আছে ।"
প্ৰতিবাদকাৰী ইউ পি এছ চি প্ৰত্যাশীসকলে দিল্লী পৌৰ নিগম আৰু আই এ এছ কোচিং ইনষ্টিটিউট পৰিচালনাৰ বিৰুদ্ধে প্ৰতিবাদ সাব্যস্ত কৰি তিনিগৰাকী ছাত্ৰ-ছাত্ৰীৰ মৃত্যুক লৈ ব্যৱস্থা গ্ৰহণৰ দাবী জনায় ।
