নতুন দিল্লী : কেন্দ্ৰীয় গৃহ মন্ত্ৰণালয়ে এক বেআইনী কাৰ্যকলাপ (প্ৰতিৰোধ) ন্যায়াধিকৰণ গঠন কৰিছে । ইয়াৰ উদ্দেশ্য হৈছে সকলো গোট, শাখা আৰু অন্যান্য সংগঠনকে ধৰি সংযুক্ত মুক্তি বাহিনী অসম চমুকৈ আলফাক বেআইনী সংগঠন হিচাপে ঘোষণা কৰাৰ পৰ্যাপ্ত কাৰণ আছে নেকি সেয়া যাতে নিৰ্ধাৰণ কৰিব পাৰি ।
গৃহ মন্ত্ৰণালয়ে জাৰি কৰা গেজেট অধিসূচনা অনুসৰি এই ন্যায়াধিকৰণৰ নেতৃত্ব দিব গুৱাহাটী উচ্চ ন্যায়ালয়ৰ ন্যায়াধীশ মাইকেল জোথ্যাংহুমাই । গৃহ মন্ত্ৰণালয়ে বেআইনী কাৰ্যকলাপ (প্ৰতিৰোধ) আইন, 1967 (1967-ৰ 37)ৰ ধাৰা 5-ৰ উপ-ধাৰা (1)ৰ দ্বাৰা প্ৰদান কৰা ক্ষমতা প্ৰয়োগ কৰাৰ পদক্ষেপ গ্ৰহণ কৰিছে ।
উল্লেখ্য যে ভাৰতৰ পৰা অসমক পৃথক কৰিবলৈ আৰু ধনদাবী আৰু অন্যান্য বিদ্ৰোহী গোটৰ সৈতে সম্পৰ্ক বজাই ৰাখি হিংসাত্মক কাৰ্য অব্যাহত ৰখাৰ বাবে আগন্তুক পাঁচ বছৰৰ বাবে আলফাৰ ওপৰত নিষেধাজ্ঞা সম্প্ৰসাৰণৰ প্ৰায় এমাহ পিছত গৃহ মন্ত্ৰণালয়ে এই ন্যায়াধিকৰণ গঠনৰ সিদ্ধান্ত লৈছে । বিদ্ৰোহী সংগঠনটোক প্ৰথমবাৰৰ বাবে ১৯৯০ চনত নিষিদ্ধ ঘোষণা কৰা হৈছিল আৰু তেতিয়াৰে পৰা এই নিষেধাজ্ঞা সময়ে সময়ে বৃদ্ধি কৰা হৈছে ।
অন্তিমবাৰৰ বাবে ২০১৯ চনৰ ২৭ নৱেম্বৰত ১৯৬৭ চনৰ বেআইনী কাৰ্যকলাপ (প্ৰতিৰোধ) আইনৰ অধীনত সংগঠনটোক নিষিদ্ধ ঘোষণা কৰা হৈছিল । আনহাতে, নিষেধাজ্ঞাৰ সময়সীমা বৃদ্ধি কৰাৰ সময়ত গৃহ মন্ত্ৰণালয়ে নৱেম্বৰৰ শেষত জাৰি কৰা এক জাননীত স্পষ্টভাৱে কৈছিল যে আলফাই ইয়াৰ সকলো গোট, শাখা আৰু অন্যান্য সংগঠনৰ সৈতে ভাৰতৰ সাৰ্বভৌমত্ব আৰু অখণ্ডতাৰ বিৰোধী কাৰ্যকলাপত জড়িত আছে ।
"আলফাই অসমক ভাৰতৰ পৰা পৃথক কৰা উদ্দেশ্যৰ কথা ঘোষণা কৰিছে, সংগঠনটোৰ বাবে নিৰন্তৰ ভাবুকি আৰু ধনদাবীৰে পুঁজি সংগ্ৰহ অব্যাহত ৰাখিছে আৰু হিংসাত্ম কাৰ্যৰ বাবে অন্যান্য বিদ্ৰোহী গোটৰ সৈতে সম্পৰ্ক বজাই ৰাখিছে । সংগঠনটোৰ ওচৰত অবৈধ অস্ত্ৰ-শস্ত্ৰ আৰু গোলাবাৰুদ আছে । ইয়াৰ উপৰি ২৭ নৱেম্বৰ, ২০১৯ চনৰ পৰা ১ জুলাই, ২০২৪ লৈকে অসমত বিস্ফোৰণ বা বিস্ফোৰক স্থাপনৰ কেইবাটাও ঘটনা আৰু সমগ্ৰ অসমত ২০২৪ চনৰ স্বাধীনতা দিৱসলৈকে কেইবাটাও আই ই ডি বিস্ফোৰক সঁজুলি বা বিস্ফোৰক স্থাপন কৰা হৈছে ।" গৃহ মন্ত্ৰণালয়ে উল্লেখ কৰে ।
গৃহ মন্ত্ৰণালয়ে লগতে কয় যে বিগত পাঁচ বছৰত আৰক্ষী বা নিৰাপত্তা বাহিনীয়ে গ্ৰহণ কৰা পদক্ষেপত আলফাৰ তিনিজন দুৰ্ধৰ্ষ কেডাৰ নিহত হৈছে, সংগঠনটোৰ বিৰুদ্ধে ১৫ টা গোচৰ ৰুজু কৰাৰ উপৰি তিনিখন অভিযোগনামা দাখিল কৰা হৈছে আৰু তিনিজন কেডাৰৰ বিৰুদ্ধে গোচৰ ৰুজু কৰা হৈছে । লগতে কোৱা হৈছে যে সংগঠনটো আন ২৭ টা অপৰাধমূলক কাৰ্যকলাপত জড়িত আছে । ইয়াৰে ৫৬ জন কেডাৰক গ্ৰেপ্তাৰ কৰা হৈছে আৰু ৬৩ জন কেডাৰে আত্মসমৰ্পণ কৰিছে ।
আনহাতে, আলফা সদস্যসকলৰ পৰা ২৭ টা অস্ত্ৰ, ৫৫০ ৰাউণ্ড গুলী, নটা গ্ৰেনেড আৰু দুটা ইম্প্ৰুভাইজড বিস্ফোৰক সঁজুলি উদ্ধাৰ কৰা হৈছে বুলিও মন্ত্ৰণালয়ে কয় ।
"সেয়েহে বৰ্তমান বেআইনী কাৰ্যকলাপ (প্ৰতিৰোধ) আইন, 1967 (1967 ৰ 37) ধাৰা 3-ৰ উপ-ধাৰা (1)ৰ দ্বাৰা প্ৰদান কৰা ক্ষমতা প্ৰয়োগৰ সময়ত কেন্দ্ৰীয় চৰকাৰে ইয়াৰ সকলো গোট, শাখা আৰু অন্যান্য সংগঠনৰ সৈতে আলফাক ২০২৪ চনৰ 27 নৱেম্বৰ তাৰিখৰ পৰা কাৰ্যকৰী হোৱাকৈ বেআইনী সংগঠন হিচাপে ঘোষণা কৰা হৈছে ।" সেই সময়ৰ জাননীখনত উল্লেখ কৰা হৈছিল ।
উল্লেখ্য যে বৰ্তমান গৃহ মন্ত্ৰণালয়ৰ তালিকাত 1967 চনৰ বেআইনী কাৰ্যকলাপ (প্ৰতিৰোধ) আইনৰ অধীনত বেআইনী সংগঠন হিচাপে নাম থকা 17 টা সংগঠনৰ ভিতৰত আছে আলফা । ইউ এ পি এৰ অধীনত বেআইনী সংগঠন হিচাপে ঘোষণা কৰা তালিকাত নাম থকা আন সংগঠনবোৰৰ ভিতৰত আছে ষ্টুডেণ্টছ ইছলামিক মুভমেণ্ট অব ইণ্ডিয়া (চিমি); নেচনেল ডেম'ক্ৰেটিক ফ্ৰণ্ট অব বড়োলেণ্ড (এন ডি এফ বি); মেইটেই উগ্ৰপন্থী সংগঠন, অৰ্থাৎ- (i) পিপ'লছ লিবাৰেচন আৰ্মী (পি এল এ) আৰু ইয়াৰ ৰাজনৈতিক শাখা, ৰিভলিউচনৰী পিপ'লছ ফ্ৰণ্ট (ii) ইউনাইটেড নেচনেল লিবাৰেচন ফ্ৰণ্ট (ইউ এন এল এফ) আৰু ইয়াৰ সশস্ত্ৰ শাখা মণিপুৰ পিপ'লছ আৰ্মী (এম পি এ), (iii) পিপ'লছ ৰিভলিউচনৰী পাৰ্টী অব কাংলেইপাক (প্ৰেপাক) আৰু ইয়াৰ সশস্ত্ৰ শাখা 'ৰেড আৰ্মী', (iv) কেংলেপাক কমিউনিষ্ট পাৰ্টী (কে চি পি) আৰু ইয়াৰ সশস্ত্ৰ দল যাক 'ৰেড আৰ্মী' বুলি কোৱা হয়, (v) কাংলেই য়াওল কানবা লুপ (কে ৱাই কে এল), (vi) কোঅৰ্ডিনেচন কমিটী (কোৰকম) আৰু (vii) এলায়েন্স ফৰ ছ'চিয়েলিষ্ট ইউনিটি কাংলেইপাক (এ এছ ইউ কে) ।
ইয়াৰ উপৰি অল ত্ৰিপুৰা টাইগাৰ ফ'ৰ্চ (এ টি টি এফ); নেচনেল লিবাৰেচন ফ্ৰণ্ট অব ত্ৰিপুৰা (এন এল এফ টি); হাইনিৱট্ৰেপ নেচনেল লিবাৰেচন কাউন্সিল (এইচ এন এল চি); লিবাৰেচন টাইগাৰ্ছ অব তামিল ইলম (এল টি টি ই); নেচনেল ছ'চিয়েলিষ্ট কাউন্সিল অব নাগালেণ্ড (খাপলাং) [এন এছ চি এন (কে)]; ইছলামিক ৰিছাৰ্চ ফাউণ্ডেচন (আই আৰ এফ); জামাত-ই-ইছলামী (জে ই আই), জম্মু-কাশ্মীৰ; জম্মু-কাশ্মীৰ লিবাৰেচন ফ্ৰণ্ট (মহম্মদ য়াছিন মালিক গোট); শিখছ ফৰ জাষ্টিচ (এছ এফ জে); পপুলাৰ ফ্ৰণ্ট অব ইণ্ডিয়া (পি এফ আই) আৰু ইয়াৰ সহযোগী ফ্ৰণ্ট যাৰ ভিতৰত আছে ৰিহেব ইণ্ডিয়া ফাউণ্ডেচন (আৰ আই এফ), কেম্পাছ ফ্ৰণ্ট অব ইণ্ডিয়া (চি এফ আই), অল ইণ্ডিয়া ইমামছ কাউন্সিল (এ আই আই চি), নেচনেল কনফেডাৰেচন অব হিউমেন ৰাইটছ অৰ্গেনাইজেচন (এন চি আৰ অ'), নেচনেল উইমেনফ্ৰণ্ট, জুনিয়ৰ ফ্ৰণ্ট, এমপাৱাৰ ইণ্ডিয়া ফাউণ্ডেচন আৰু ৰিহেব ফাউণ্ডেচন, কেৰালা হৈছে কেন্দ্ৰীয় গৃহ মন্ত্ৰণালয়ৰ দ্বাৰা বেআইনী সংগঠন হিচাপে ঘোষণা কৰা অন্যান্য সংগঠন ।
জম্মু-কাশ্মীৰ ডেম'ক্ৰেটিক ফ্ৰীডম পাৰ্টী (জে কে ডি এফ পি), মুছলিম লীগ জম্মু-কাশ্মীৰ (মাচাৰাত আলম গোট)/ (এম এল জে কে-এম এ) আৰু তেহৰিক-ই-হুৰিয়ত, জম্মু-কাশ্মীৰ (টি ই এইচ) বেআইনী কাৰ্যকলাপ (প্ৰতিৰোধ) আইন, 1967 (1967 ৰ 37)ৰ ধাৰা 3-ৰ উপ-ধাৰা (1)ৰ দ্বাৰা প্ৰদান কৰা ক্ষমতাৰ অধীনত নিষিদ্ধঘোষিত সংগঠন ।
