নেশ্যনেল ডেস্ক,১৭ মাৰ্চ : মহাৰাষ্ট্ৰৰ পুনেৰ ইন্দাপুৰত ভয়ংকৰ ঘটনা । এখন হোটেলত দুই ফৈদৰ মাজত হোৱা সংঘৰ্ষত এজন যুৱকৰ মৃত্যু । ৫-৬ জনীয়া এটা দলৰ সৈতে হোৱা কাজিয়াত যুৱকজনক গুলীয়াই হত্যা কৰে । গুলীচালনাক লৈ হোটেলখনত তীব্ৰ উত্তেজনাৰ সৃষ্টি হয় । মৃত যুৱকজনৰ নাম অবিনাশ ধনৱে বুলি জানিব পৰা গৈছে । সূত্ৰৰ মতে এই ঘটনাটো দুটা ফৈদৰ মাজত হোৱা কাজিয়াৰ ফলতে সংঘটিত হৈছিল । আৰক্ষীয়ে জনোৱা মতে মৃত অবিনাশ ধনৱেয়ে তেওঁৰ বন্ধুবৰ্গৰ সৈতে ইন্দাপুৰৰ হোটেলখনত দুপৰীয়াৰ আহাৰৰ বাবে গৈছিল ।
এই সময়তে তেওঁক অনুসৰণ কৰি থকা ৫-৬ জনীয়া লোকে হঠাতে তেওঁক আক্ৰমণ কৰে । আক্ৰমণকাৰীসকলে তেওঁক লক্ষ্য কৰি গুলীচালনা কৰে । আনকি তেওঁলোকে তেওঁক চোকা অস্ত্ৰৰে আক্ৰমণো কৰে । এই আক্ৰমণৰ ফলত ঘটনাস্থলীতে অবিনাশৰ মৃত্যু হয় । অবিনাশৰ মূৰত গুলী লাগিছিল । অৱশ্যে তেওঁক কোনে গুলীচালনা কৰিছিল সেয়া এতিয়াও স্পষ্ট হোৱা নাই ।
আৰক্ষীয়ে জনোৱা মতে অবিনাশ পুনেৰ আলান্দি অঞ্চলত বাস কৰিছিল । ঘটনাটো সংঘটিত হোৱাৰ পিচতে প্ৰত্যক্ষদৰ্শী আৰু স্থানীয় লোকে আৰক্ষীক খবৰ দিয়ে । খবৰ পোৱাৰ লগে লগে আৰক্ষী ঘটনাস্থলীত উপস্থিত হয় আৰু অনুসন্ধান আৰম্ভ কৰে । আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে । অৱশ্যে অবিনাশক আক্ৰমণ কৰাৰ আঁৰৰ ৰহস্য এতিয়াও জানিব পৰা হোৱা নাই । এই ঘটনাৰ পিচত আৰক্ষীয়ে চিচিটিভিৰ ফুটেজ সংগ্ৰহ কৰিছে আৰু তদন্ত আৰম্ভ কৰিছে ।
উল্লেখ্য যে যোৱা কিছুদিন ধৰি পুনে চহৰত অপৰাধ যথেষ্ট বৃদ্ধি পাইছে । যাৰ ফলত পুনেত সাধাৰণ নাগৰিকসকল নিৰাপত্তাহীনতাত ভুগিছে । শেহতীয়াকৈ পুনেত বৃহৎ পৰিমাণৰ নিচাজাতীয় সামগ্ৰীও জব্দ কৰা হৈছে ।
লগতে পঢ়ক :হাৰিয়ানাৰ স্পেয়াৰ পাৰ্টছ নিৰ্মাণ কোম্পানীৰ বয়লাৰ ফাটি ৫০ জনতকৈ অধিক কৰ্মচাৰী অগ্নিদগ্ধ
