নেশ্যনেল ডেস্ক, 22 জুলাই: বিবাহ বিচ্ছেদ সম্পৰ্কত গুৰুত্বপূৰ্ণ ৰায় ৷ এই ৰায় ঘোষণা কৰিছে উচ্চ ন্যায়ালয়ে ৷ এটা দম্পতীয়ে বিবাহ বিচ্ছেদ বিচাৰি আদালতৰ দাৰস্থ হোৱাৰ পিচতে আদালতে সমগ্ৰ প্ৰক্ৰিয়া পৰ্যবেক্ষণ কৰি এই গুৰুত্বপূৰ্ণ ৰায় ঘোষণা কৰে ৷
আদালতৰ ৰায় অনুসৰি, বিবাহ বিচ্ছেদ অস্বীকাৰ কৰাটো একপ্ৰকাৰৰ নিষ্ঠুৰতা ৷ পাৰিবাৰিক আদালতে মহিলাগৰাকীৰ বিবাহ বিচ্ছেদৰ আবেদন নাকচ কৰাৰ পিচত উচ্চ ন্যায়ালয়ে বিষয়টোত হস্তক্ষেপ কৰিছিল ৷ মহিলাগৰাকীৰ স্বামীয়ে এই বিবাহ বিচ্ছেদ অস্বীকাৰ কৰা বুলি জানিব পৰা গৈছে ।
লগতে পঢ়ক: ব্যক্তিগত সুখৰ বাবে আমিৰৰ পৰা আঁতৰি অহাটো জৰুৰী আছিল - Krian Rao Aamir Khan divorce
তথ্য অনুসৰি, আবেদনকাৰীয়ে প্ৰথমতে বিবাহ বিচ্ছেদৰ বাবে পাৰিবাৰিক আদালতৰ কাষ চাপিছিল ৷ কিন্তু তেওঁৰ স্বামীয়ে বিবাহ ভংগ কৰাৰ বিৰোধিতা কৰিছিল । নিম্ন আদালতে মহিলাগৰাকীৰ স্বামীৰ নিষ্ঠুৰতা প্ৰমাণ কৰিবলৈ প্ৰমাণৰ অভাৱৰ কথা উল্লেখ কৰি বিবাহ বিচ্ছেদৰ দাবী নাকচ কৰে ।
পৰৱৰ্তী সময়ত বিষয়টো উচ্চ ন্যায়ালয়ৰ কাষ চপাত ন্যায়ালয়ে আঙুলিয়াই দিছিল যে, পাৰিবাৰিক আদালতে মহিলাগৰাকী আৰু কন্যাৰ বক্তব্যক বিবেচনা কৰা নাছিল । দম্পতীটোৱে দুয়োজনৰ বৈবাহিক সম্পৰ্কক অৰ্থপূৰ্ণভাৱে বজাই ৰাখিবলৈ অক্ষম হৈছিল । যাৰ বাবে উচ্চ ন্যায়ালয়ে স্পষ্ট কৰি দিছিল যে, যদি এগৰাকী পতি বা পত্নী পৃথক হ'বলৈ সন্মত নহয়, তেন্তে ই বিবাহ বিচ্ছেদ বিচৰা ব্যক্তিজনৰ বাবে ই নিষ্ঠুৰ কাৰক হৈ পৰে ।
আদালতে এইটোও উল্লেখ কৰিছিল যে, এক অপৈণত, ক্ষতিগ্ৰস্ত সম্পৰ্ক বজাই ৰাখিলে ভালতকৈ বেছি বেয়াহে হ’ব ৷ যিয়ে দম্পতীটোৰ জীৱনৰ প্ৰগতিতো বাধা প্ৰদান কৰিব ৷ ন্যায়াধীশ ৰাজবিজয় ৰাঘৱন আৰু পি এম মনোজক লৈ গঠিত এক খণ্ড বিচাৰপীঠে বিবাহ বিচ্ছেদৰ আবেদন নাকচ কৰি পাৰিবাৰিক আদালতৰ আদেশ বাতিল কৰিছিল । অৱশ্যে এই ৰায়দান কৰিছে কেৰালা উচ্চ ন্যায়ালয়ে ৷
