নেশ্যনেল ডেস্ক, 24 মাৰ্চ : জইছ-ই-মহম্মদৰ জড়িত সন্ত্ৰাসবাদী জম্মু-কাশ্মীৰ আৰক্ষীৰ জিম্মাত ৷ জানিব পৰা মতে, নিয়মীয়া তালাচী অভিযান চলায় থকাৰ সময়তে শনিবাৰৰ নিশা জৈছ-ই-মহম্মদৰ জড়িত সন্ত্ৰাসবাদী মডুলক জম্মু-কাশ্মীৰ আৰক্ষী কৰায়ত্ত কৰিবলৈ সক্ষম হয় বুলি দাবী কৰে ৷
ইয়াৰোপৰি, নিষিদ্ধ সন্ত্ৰাসবাদী সংগঠন জৈছ-ই-মহম্মদৰ সৈতে জড়িত আন চাৰিজন সন্ত্ৰাসবাদী সহযোগীক আৰক্ষীয়ে গ্ৰেপ্তাৰ কৰিছে । আৰক্ষীৰ বিবৃতি অনুসৰি শ্ৰীনগৰ আৰক্ষী, 50 আৰ আৰ, ভেলী কিউ আৰ টি আৰু 29 বিলিয়ন চি আৰ পি এফৰ কৰ্মীৰে গঠিত কেনিহামা অঞ্চলত নৌগাম আৰক্ষী থানাৰ অধীনস্থ যৌথ চলমান বাহন চেক পোষ্ট (এম ভি চি পি) ত সন্ধিয়াৰ সময়ত চলা অভিযানত কৰায়ত্ত কৰা হয় এই সন্ত্ৰাসবাদীকেইজনক ।
নিয়মীয়া তালাচী অভিযানৰ সময়ত এখন বগা ৰঙৰ অল্ট’ বাহনৰ প্ৰতি সন্দেহ ওপজে আৰু যৌথ অভিযানকাৰী দলটোৱে বাহনখনত অভিযান চলায় । পৰৱৰ্তী সময়ত বাহনখনত থকা মহম্মদ ইয়াছিন ভাট, শ্বেৰাজ আহমদ ৰাথেৰ, গুলাম হাছান খাণ্ডে আৰু ইমটিয়াজ আহমদ ভাট নামৰ চাৰিজনক আটক কৰা হয় । শ্ৰীনগৰ আৰু ইয়াৰ আশে-পাশে থকা বিভিন্ন স্থানীয় অঞ্চলৰ পৰা সন্ত্ৰাসবাদীকেইজন আহিছে বুলি জানিব পৰা গৈছে ।
বিবৃতিটোত আৰু উল্লেখ কৰা হৈছে যে আটক কৰা লোককেইজনৰ হাতৰ পৰা বিভিন্ন আপত্তিজনক সামগ্ৰী, অস্ত্ৰ-শস্ত্ৰ, আৰু গোলাবাৰুদ উদ্ধাৰ কৰা হৈছে । জব্দ কৰা সামগ্ৰীসমূহৰ ভিতৰত আছে তিনিটা মেগজিনসহ এটা এ কে 56 ৰাইফল, 7.62 x 39 মিমি গোলাবাৰুদ 75 জাঁই, দুটা মেগজিনসহ এটা গ্লক পিষ্টল, 9 মিমি গোলাবাৰুদ 26 জাঁই, আৰু ছটা চাইনিজ গ্ৰেনেড । প্ৰাথমিক তদন্তত নিষিদ্ধ সংগঠন জেএমৰ সৈতে তেওঁলোকৰ সম্পৰ্ক নিশ্চিত কৰা হৈছে ।
ইফালে, অবৈধ কাৰ্যকলাপ (প্ৰতিৰোধ) আইন (ইউএপিএ)ৰ ধাৰা 18, 23, 39, অস্ত্ৰ আইনৰ ধাৰা 7/25, আৰু ভাৰতীয় দণ্ডবিধিৰ (আই পি চি) 120 বিৰ অধীনত গোচৰ (এফআইআৰ নং 31/2024) পঞ্জীয়ন কৰি আৰক্ষীয়ে নৌগাম থানাত আইনী প্ৰক্ৰিয়া আৰম্ভ কৰিছে । ঘটনা সন্দৰ্ভত তদন্ত অব্যাহত আছে ।
লগতে পঢ়ক: ৫ বছৰৰ বাবে বৃদ্ধি জামাত-ই-ইছলামীৰ ওপৰত নিষেধাজ্ঞা
