নিউজ ডেস্ক, ১৫ আগষ্ট : বুধবাৰে জম্মু বিভাগৰ ডোডা জিলাত সন্ত্ৰাসবাদীৰ সৈতে সংঘৰ্ষৰ সময়ত শ্বহীদ হয় সেনাৰ কেপ্টেইন দীপক সিং । তেওঁক শ্ৰদ্ধাঞ্জলি জনাবৰ বাবে বৃহস্পতিবাৰে পুৱা জম্মুৰ এয়াৰফ'ৰ্চ ষ্টেচনত এই অনুষ্ঠানৰ আয়োজন কৰা হয় ।
এক গাম্ভীৰ্যপূৰ্ণ পুষ্পাঞ্জলি অৰ্পণ অনুষ্ঠানত জি অ' চি হোৱাইট নাইট ক'ৰ্পছৰ লেফটেনেণ্ট জেনেৰেল নবীন সচদেৱে ভাৰতীয় সেনাৰ হৈ জীৱনৰ সৰ্বোচ্চ ত্যাগ কৰা কেপ্টেইন দীপক সিঙক অন্তিম সন্মান জনোৱাৰ উদ্দেশ্যে সেনাৰ সৰ্বোচ্চ পৰ্যায়ৰ শ্ৰদ্ধাঞ্জলি জনোৱা হয় ।
In a solemn wreath-laying ceremony, #GOC #WhiteKnightCorps laid a wreath to pay homage to #Braveheart Capt Deepak who made the supreme sacrifice in the highest traditions of #IndianArmy.
— White Knight Corps (@Whiteknight_IA) August 15, 2024
His sacrifice will never be forgotten. @adgpi@NorthernComd_IA pic.twitter.com/MiFZY5o0wZ
অনুষ্ঠানত উপস্থিত থকা জম্মুৰ সংমণ্ডলীয় আয়ুক্ত ৰমেশ কুমাৰ আৰু অতিৰিক্ত আৰক্ষী সঞ্চালক প্ৰধান (এ ডি জি পি) আনন্দ জৈনেও শ্বহীদ জোৱানগৰাকীক শ্ৰদ্ধাঞ্জলি জ্ঞাপন কৰে ।
"এক গাম্ভীৰ্যপূৰ্ণ শ্ৰদ্ধাঞ্জলি অনুষ্ঠানত ভাৰতীয় সেনাৰ জি অ' চি হোৱাইট নাইট ক'ৰ্পছৰ সৰ্বোচ্চ পৰম্পৰাত নিয়মত দেশৰ বাবে সৰ্বোচ্চ বলিদান দিয়া কেপ্টেইন দীপক সিঙক শ্ৰদ্ধাঞ্জলি জ্ঞাপন কৰা হয় । তেওঁৰ ত্যাগক কেতিয়াও পাহৰিব নোৱাৰি ।" সেনাৰ হোৱাইট নাইট ক'ৰ্পছে অফিচিয়েল এক্স হেণ্ডেলৰ এটা পোষ্টত কয় ।
উল্লেখ্য যে বুধবাৰে জম্মু-কাশ্মীৰৰ ডোডা জিলাত সন্ত্ৰাসবাদীৰ সৈতে সংঘৰ্ষৰ সময়ত কেপ্টেইন দীপক সিং নিহত হয় । বৃহস্পতিবাৰে সেনাপ্ৰধান আৰু ভাৰতীয় সেনাৰ সকলো পদবীৰ সৰ্বাধিনায়ক জেনেৰেল উপেন্দ্ৰ দ্বিবেদীয়ে কেপ্টেইন দীপক সিঙৰ সৰ্বোচ্চ ত্যাগক অভিবাদন জনায় । লগতে জম্মু-কাশ্মীৰত কৰ্তব্যৰত অৱস্থাত প্ৰাণ আহুতি দিয়া বীৰ সৈনিকগৰাকীৰ শোকসন্তপ্ত পৰিয়াললৈ গভীৰ সমবেদনা জ্ঞাপন কৰে ।
জম্মু-কাশ্মীৰৰ পাটনিটপৰ বিখ্যাত পৰ্যটন পাহাৰীয়া ৰিজ'ৰ্টৰ সৈতে সংলগ্ন ডোডা জিলাৰ আছাৰ অঞ্চলত সংঘটিত গুলীয়াগুলীত সেনাৰ কেপ্টেইন আৰু এজন সন্ত্ৰাসবাদী নিহত হয় । এই সংঘৰ্ষৰ পিচত কেপ্টেইন দীপক সিং আঘাতপ্ৰাপ্ত হয় আৰু তাৰ পিচত মৃত্যুবৰণ কৰে । সূত্ৰ অনুসৰি, কেপ্টেইন সিঙে সন্মুখৰ পৰা সেনা দলটোক নেতৃত্ব দি থকাৰ সময়তে বন্দুকৰ গুলীত আঘাতপ্ৰাপ্ত হয় । তেওঁক এখন চিকিৎসালয়লৈ স্থানান্তৰ কৰা হয় যদিও তাতেই তেওঁ শেষ নিশ্বাস ত্যাগ কৰে ।
আনহাতে, সন্ত্ৰাসবাদীৰ সৈতে সংঘটিত সংঘৰ্ষত হিৰনি গাঁৱৰ এজন নাগৰিকো আহত হয় বুলি সূত্ৰত প্ৰকাশ । নিৰাপত্তাৰক্ষীয়ে এনকাউণ্টাৰ স্থানৰ পৰা এটা এম ৪ ৰাইফল আৰু এটা একে ৪৭ জব্দ কৰে । ইফালে সন্ত্ৰাসবাদীৰ সন্ধানত ডোডাত তৃতীয়দিনাও তালাচী অভিযান অব্যাহত আছে ।
