নিউজ ডেস্ক, ২৮ আগষ্ট : চাইবাৰ জালিয়াতি এতিয়া চৌদিশে সংঘটিত হ'বলৈ ধৰিছে । কেৱল সাধাৰণ নাগৰিকেই নহয়, উচ্চ পৰ্যায়ৰ বিষয়ালৈকে চাইবাৰ আক্ৰমণৰ কবলত পৰিছে । আনহাতে, চাইবাৰ জালিয়াতিৰ কবলত পৰি নিজৰ সাঁচতীয়া ধন হেৰুৱালগীয়া হৈছে বহুতে । এইক্ষেত্ৰত সাধাৰণ বেংক গ্ৰাহকৰ পৰা আৰম্ভ কৰি বেংকৰ বিষয়ালৈকে চাইবাৰ অপৰাধীৰ চিকাৰ হৈছে ।
এনেধৰণৰ বহু চাইবাৰ প্ৰৱঞ্চনাৰ ঘটনা এতিয়া য'তে ত'তে সংঘটিত হ'বলৈ ধৰিছে । কিন্তু দিল্লীত এনে এটা চাইবাৰ প্ৰৱঞ্চনাৰ ঘটনা সংঘটিত হৈছে, যাৰ বিষয়ে জানিলে আপুনি হতবাক হৈ পৰিব । কিয়নো এইবাৰ চাইবাৰ অপৰাধীয়ে চাইবাৰ প্ৰৱঞ্চনাৰ বাবে ব্যৱহাৰ কৰিছে ভাৰতৰ মুখ্য ন্যায়াধীশৰ নাম ।
দেশৰ মুখ্য ন্যায়াধীশ ডি ৱাই চন্দ্ৰচূড়ৰ নাম ব্যৱহাৰ কৰি এইবাৰ প্ৰৱঞ্চনাৰ চেষ্টা কৰা হৈছে । দিল্লী আৰক্ষীৰ চাইবাৰ চেলে এই সন্দৰ্ভত এটা গোচৰ ৰুজু কৰিছে । লগতে ঘটনা সন্দৰ্ভত কঠোৰ পদক্ষেপ গ্ৰহণৰ প্ৰস্তুতি আৰম্ভ কৰিছে ।
মঙলবাৰে এজন ব্যক্তিয়ে ছ'চিয়েল মিডিয়াত মেছেজ কৰি কয়, "হেল্ল', মই ভাৰতৰ মুখ্য ন্যায়াধীশ (চি জে আই) । কলেজিয়ামৰ সৈতে মোৰ এক গুৰুত্বপূৰ্ণ বৈঠক আছে । মই কনাণ্ট প্লেচত আবদ্ধ হৈ আছো । আপুনি মোক এখন কেবৰ বাবে ৫০০ টকা পঠিয়াব পাৰিবনে ? উচ্চতম ন্যায়ালয়ত উপস্থিত হোৱাৰ পিচতে মই এই পইচা ঘূৰাই দিম ।"
মেছেজটোৰ শেষত ইয়াকো কোৱা হৈছে যে এই মেছেজটো কোনটো ডিভাইচৰ পৰা প্ৰেৰণ কৰা হৈছে । তাত লিখিছে প্ৰেৰণ কৰা ডিভাইচটোৰ নাম 'আইপেডৰ পৰা প্ৰেৰণ কৰা হৈছে ৷' ইতিমধ্যে ঘটনা সন্দৰ্ভত উচ্চতম ন্যায়ালয়ে চাইবাৰ জালিয়াতিৰ অভিযোগ দাখিল কৰিছে ।
উল্লেখ্য যে বিভিন্ন সময়ত চৰকাৰৰ তৰফৰ পৰা চাইবাৰ প্ৰৱঞ্চকৰ কবলত নপৰিবলৈ নাগৰিকসকলক সকীয়াই দি অহা হৈছে । ইতিমধ্যে চাইবাৰ প্ৰৱঞ্চনা সন্দৰ্ভত আদালততো ৰুজু হৈ আছে বহু গোচৰ । আদালতৰ তৰফৰ পৰাও এই বিষয়ত সাৱধান হ'বলৈ কোৱা হৈছে । কিন্তু এইবাৰ খোদ দেশৰ মুখ্য ন্য়ায়াধীশৰ নামত চাইবাৰ প্ৰৱঞ্চনাৰ এই ঘটনাই সকলোকে আচৰিত কৰি তুলিছে ।
