দিল্লী : জনজীৱনৰ প্ৰতি ভয়ংকৰ ভাবুকি কঢ়িয়াই আনিছে দিল্লীৰ বায়ু প্ৰদূষণে ৷ ৰাজধানী মহানগৰীখনত এতিয়া কেউফালে ধোঁৱাময় পৰিৱেশ ৷ উশাহ ল’বলৈ বিশুদ্ধ বায়ু বিচাৰি হাহাকাৰ দিল্লীবাসীৰ ৷ এই বায়ু প্ৰদূষণে ভাবুকি মাতিছে মানুহৰ স্বাস্থ্যৰ প্ৰতিও ৷
বিশেষজ্ঞসকলে বায়ু প্ৰদূষণৰ স্বাস্থ্যজনিত বিপদৰ বিষয়ে সকীয়াই দিয়াৰ লগতে বিশ্বব্যাপী জৰুৰী ব্যৱস্থা গ্ৰহণৰ আহ্বান জনোৱাৰ সময়তে COP29 ত দিল্লীৰ বিপজ্জনক বায়ুৰ গুণাগুণৰ ওপৰত গুৰুত্ব আৰোপ কৰা হৈছিল ।
ক্লাইমেট ট্ৰেণ্ডছৰ সঞ্চালক আৰতি খোছলাই কয় যে দিল্লীৰ বায়ুৰ গুণাগুণ সূচকাংক (AQI) বিপজ্জনক মাত্ৰাত উপনীত হৈছে ৷ কিছুমান অঞ্চলত প্ৰতি ঘনমিটাৰত ১০০০ মাইক্ৰ’গ্ৰামতকৈ অধিক প্ৰদূষিত কণা ৰেকৰ্ড কৰা হৈছে । তেওঁ কয় যে প্ৰদূষিত কণা বহু উৎসৰ পৰা আহে যেনে ক’লা কাৰ্বন, অ’জন, জীৱাশ্ম ইন্ধন জ্বলোৱা আৰু পামৰ জুই । আমাক এনে সমাধানৰ প্ৰয়োজন যিয়ে এই সকলোবোৰৰ সৈতে মোকাবিলা কৰিব পাৰে ।
খোছলাই এই কথাও আঙুলিয়াই দিয়ে যে লা নীনাৰ বতৰৰ পদ্ধতিয়ে বতাহৰ গতি কম কৰাত বায়ুত প্ৰদূষকক আৱদ্ধ কৰি ৰাখিছে ৷ যাৰ ফলত পৰিস্থিতি আৰু বেয়া হৈ পৰিছে । তেওঁ কয়, "আমি বিশ্বৰ ডাঙৰ ডাঙৰ বিষয়সমূহৰ ওপৰত আলোচনা কৰি থকাৰ সময়ত লাখ লাখ লোকৰ স্বাস্থ্য বিপদত পৰিছে । আমি দ্ৰুতভাৱে কাম কৰিব লাগিব ।"
গ্ল’বেল ক্লাইমেট এণ্ড হেল্থ এলায়েন্সৰ উপাধ্যক্ষ কৰ্টনী হাৱাৰ্ডে কানাডাৰ পৰা লাভ কৰা অভিজ্ঞতা প্ৰকাশ কৰে, য’ত ২০২৩ চনত বনজুইৰ বাবে ৭০ শতাংশ জনসাধাৰণে ঠাই এৰিবলগীয়া হৈছিল । "আমাৰ দৰে ধনী দেশৰ বাবেও ই ব্যয়বহুল আছিল । এনে দুৰ্যোগৰ সৈতে মোকাবিলা কৰিবলৈ দৰিদ্ৰ দেশসমূহক আৰ্থিক সহায়ৰ প্ৰয়োজন ।" কৰ্টনী হাৱাৰ্ডে কয় ৷
বৃহৎ নিগমসমূহক গধুৰ ৰাজসাহায্য দিয়াৰ পিছতো স্বাস্থ্যসেৱাৰ বাবে ধনৰ অভাৱৰ কথাও হাৱাৰ্ডে সমালোচনা কৰে । তেওঁ কয়, "আমি বিশাল লাভজনক নিগমসমূহক ১ ট্ৰিলিয়ন মাৰ্কিন ডলাৰ দিছো, কিন্তু আমি কওঁ যে স্বাস্থ্যসেৱাৰ বাবে কোনো ধন নাই । আমি সকলোকে সুৰক্ষা দিবলৈ স্বাস্থ্যসেৱাৰ বাবে ধন দিব লাগিব ।"
ব্ৰিথ মংগোলিয়াৰ সহ-প্ৰতিষ্ঠাপক এনখুন ব্যাম্বাডৰ্জে তেওঁৰ দেশৰ বায়ু প্ৰদূষণৰ ভয়াৱহ সমস্যাৰ ওপৰত আলোকপাত কৰে । তেওঁ কয়, "চহৰত বাস কৰা শিশুৰ হাওঁফাওঁৰ ক্ষমতা গ্ৰাম্য অঞ্চলৰ শিশুতকৈ ৪০ শতাংশ কম । আমি উশাহত গ্ৰহণ কৰা বায়ুয়ে আমাৰ সন্তানৰ ভৱিষ্যতৰ ক্ষতি কৰিছে ।’’
শেহতীয়াকৈ লাভ কৰা তথ্য অনুসৰি, দিল্লীৰ অন্য শ্ৰেণীবোৰৰ লেখীয়াকৈ দশম আৰু দ্বাদশ শ্ৰেণীৰো স্কুল বন্ধ ঘোষণা কৰিছে ৷ সকলো শ্ৰেণীৰে অনলাইন পাঠদান হ’ব বুলি দিল্লী চৰকাৰে ঘোষণা কৰিছে ৷
