নেশ্যনেল ডেস্ক, 9 আগষ্ট : বিজ্ঞান-প্ৰযুক্তিৰ বৰ্ধিত ব্যৱহাৰৰ মাজত যুৱচামৰ মাজত বৃদ্ধি পাইছে অনলাইনত চাকৰিৰ সন্ধান কৰাৰ প্ৰৱণতা ৷ যাৰ বাবে তেওঁলোকে ব্যৱহাৰ কৰে বিভিন্ন চাকৰি সংক্ৰান্তীয় প’ৰ্টেল আৰু এপ ৷
পিছে আজিকালি অধিক সক্ৰিয় হৈ পৰা চাইবাৰ অপৰাধীসকলে টাৰ্গেট কৰি লৈছে যুৱচামক ৷ ইণ্টাৰনেটৰ জৰিয়তে সক্ৰিয় হৈ চাইবাৰ প্ৰৱঞ্চকসকলে চাকৰি প্ৰত্যাশীৰ পৰা সংগ্ৰহ কৰি গৈছে ধন ৷ চাকৰিৰ প’ৰ্টেলত চাইবাৰ প্ৰৱঞ্চকসকলে ভুৱা প্ৰফাইল সৃষ্টি কৰি চাকৰি বিচাৰি থকা যুৱক-যুৱতীসকলক প্ৰতাৰণা কৰাৰ সংখ্যা ক্ৰমাৎ বৃদ্ধি পাবলৈ ধৰিছে ৷ এনে পৰিস্থিতিত কিছু সাৱধানতা অৱলম্বন কৰি হাত সাৰিব পাৰি চাইবাৰ প্ৰৱঞ্চনাৰ পৰা ৷
চাইবাৰ প্ৰৱঞ্চকসকলে এনেদৰে কৰে প্ৰৱঞ্চনা :
চাইবাৰ প্ৰৱঞ্চকসকলে চাকৰিৰ প’ৰ্টেল আৰু এপবোৰত ভুৱা প্ৰফাইল সৃষ্টি কৰি লক্ষ্য কৰি লয় চাকৰি সন্ধানী যুৱক-যুৱতীসকলক ৷ তেওঁলোকে এনেধৰণৰ প্ৰফাইলৰ সৈতে যুৱচামক চাকৰি প্ৰদান কৰাৰ অজুহাতত মেছেজৰ জৰিয়তে যোগাযোগ কৰে । মোটা অংকৰ দৰমহাৰ অজুহাতত প্ৰৱঞ্চকসকলে প্ৰাৰ্থীৰ ব্যক্তিগত তথ্য গ্ৰহণ কৰি পঞ্জীয়নৰ নামত দাবী কৰে ধন ।
পঞ্জীয়নৰ নামত দাবী কৰে ধন :
তথ্য় অনুসৰি, ৰাজস্থানৰ জয়পুৰৰ এগৰাকী যুৱতীয়ে দীৰ্ঘদিনৰে পৰা বিচাৰি আছিল এটা ভাল চাকৰি । ইয়াৰ বাবে তেওঁ এটা এপ্পত পোষ্ট কৰিছিল । ইয়াৰ পিছতে যুৱতীগৰাকীয়ে লাভ কৰিছিল এটা কোম্পানীৰ পৰা চাকৰিৰ প্ৰস্তাৱ ৷ কোম্পানীটোৱে নিজৰ প্ৰফাইলত শ্বেয়াৰ কৰিছিল কিছুসংখ্যক ফটো আৰু ভিডিঅ’ ।
তাৰ পিছত তেওঁ পঞ্জীয়নৰ নামত জমা দিয়ে দুই হাজাৰ টকা ৷ এই ধন জমা দিয়াৰ কিছুসময়ৰ পিছতে সেই কোম্পানীটোৰ প্ৰফাইল নিৰ্দিষ্ট এপটোৰ পৰা নাইকিয়া হৈ যায় ৷ ইয়াকে দেখি হতবাক হৈ পৰে যুৱতীগৰাকী ৷
ধন জমা দিয়াৰ পিছতে প্ৰৱঞ্চনা :
এজন যুৱকে অনলাইনৰ জৰিয়তে এটা চাকৰি সন্ধান এপৰ পৰা পাইছিল চাকৰিৰ প্ৰস্তাৱ ৷ যুৱকজনক দিয়া হৈছিল মাৰ্কেটিং মেনেজাৰৰ পদ ৷ কোম্পানীটোৰ এইচ আৰ (HR) হিচাপে আত্মপ্ৰকাশ কৰি চাইবাৰ প্ৰৱঞ্চকে বেংক একাউণ্টকে ধৰি অন্যান্য তথ্যসমূহ বিচাৰিছিল যুৱকজনৰ পৰা ৷
লগতে পঞ্জীয়নৰ নামত দাবী কৰিছিল তিনি হাজাৰ টকা । মোটা অংকৰ দৰমহাৰ লোভত যুৱকজনে জমা দিছিল তিনি হাজাৰ টকা ৷ ইয়াৰ পিছতে যুৱকজনে চাইবাৰ অপৰাধীৰ দ্বাৰা প্ৰৱঞ্চনাৰ বলি হোৱা বুলি জানিব পাৰে ৷
