নেশ্যনেল ডেস্ক, ১২ মাৰ্চ : লোকসভা নিৰ্বাচনৰ ঠিক পূৰ্বে চৰকাৰে দেশত নাগৰিকত্ব সংশোধনী আইন (CAA) বলৱৎ কৰিছে । যাক লৈ ব্যাপক প্ৰতিক্ৰিয়াৰ সৃষ্টি হৈছে । ই আগন্তুক নিৰ্বাচনৰ গতিও নিৰ্ধাৰণ কৰা দেখা গৈছে ।
CAA শেহতীয়াভাৱে বিজেপিৰ বাবে সংখ্যাগৰিষ্ঠ ভোটাৰৰ সমৰ্থনৰ বাবে এক গুৰুত্বপূৰ্ণ প্ৰস্তাৱ হৈ আহিছে যদিও এই পদক্ষেপৰ পিচত চৰকাৰ বিৰোধী দলসমূহৰ পৰা বিভিন্ন ধৰণৰ বাধাৰ সন্মুখীন হোৱাৰ সম্ভাৱনা আছে । লোকসভা নিৰ্বাচনৰ পূৰ্বে চিএএৰ হেঁচাৰ বাবে চৰকাৰৰ বিৰুদ্ধে সকলো বিৰোধীয়ে একত্ৰিতভাৱে প্ৰতিবাদ কৰাৰ সম্ভাৱনা আছে ।
ইফালে বিৰোধীৰ প্ৰতিবাদৰ মাজতে সংসদত ২০১৯ চনৰ ডিচেম্বৰত CAA উত্থাপন হৈছিল । এই অধিসূচনাই কেন্দ্ৰীয় চৰকাৰক ২০১৪ চনৰ ৩১ ডিচেম্বৰৰ পূৰ্বে ধৰ্মীয় অত্যাচাৰৰ বলি হৈ বাংলাদেশ, পাকিস্তান আৰু আফগানিস্তানৰ পৰা অহা অ-মুছলমান প্ৰব্ৰজনকাৰীসকলক নাগৰিকত্ব প্ৰদান কৰিবলৈ অনুমতি দিব ।
গৃহ মন্ত্ৰালয়ৰ এগৰাকী মুখপাত্ৰৰ মতে যোগ্য ব্যক্তিসকলে সম্পূৰ্ণ অনলাইন পদ্ধতিৰে আবেদন দাখিল কৰিব পাৰিব । আবেদনকাৰীসকলৰ পৰা আন কোনো নথিপত্ৰ বিচৰা নহ'ব বুলিও বিষয়াজনে উল্লেখ কৰিছে । কেন্দ্ৰই সংখ্যালঘুসকলক আশ্বাস দিবলৈ চেষ্টা কৰিছে যে কাৰো নাগৰিকত্ব কাঢ়ি লোৱা নহ'ব । কিন্তু এটা অংশৰ মাজত আশংকা আছে ।
একে সময়তে, বিৰোধী শাসিত ৰাজ্যসমূহৰ মুখ্যমন্ত্ৰীসকলে তেওঁলোকৰ ৰাজ্যসমূহত CAA কাৰ্যকৰী নকৰিবলৈ দিয়া নহ'ব বুলি হুংকাৰ দিছে । এনে পৰিস্থিতিত দেশৰ ৰাজনীতি উত্তাল হোৱাৰ সম্ভাৱনা আছে । বিশেষকৈ CAA-ৰ অধিসূচনাই অসম আৰু পশ্চিমবংগত লোকসভা নিৰ্বাচনত কেনেধৰণৰ প্ৰভাৱ পেলাব ?
অসমত প্ৰতিবাদ
জম্মু-কাশ্মীৰৰ পিচত অসমত সৰ্বাধিক মুছলমান আছে । মুঠ ৩.১২ কোটি জনসংখ্যাৰ ৩৪ শতাংশ মুছলমান । সোমবাৰে CAA-ৰ অধিসূচনা জাৰি কৰাৰ পিচতে ৰাজ্যখনত প্ৰতিবাদ আৰম্ভ হৈছে ।
ইয়াৰ পূৰ্বে গৃহ মন্ত্ৰীয়ে CAA বলৱৎ কৰাৰ ঘোষণা কৰাৰ পিচতে অসমত প্ৰতিবাদ আৰম্ভ হৈছে । সদৌ অসম ছাত্ৰ সন্থাকে ধৰি বিভিন্ন দল-সংগঠনে এই আইনৰ বিৰুদ্ধে তীব্ৰ প্ৰতিবাদ সাব্যস্ত কৰিছে । কংগ্ৰেছৰ নেতৃত্বত ৰাজ্যখনত গঠন হোৱা বিৰোধী ঐক্য মঞ্চইও এই আইনৰ তীব্ৰ বিৰোধিতা কৰিছে ।
সদৌ অসম ছাত্ৰ সন্থাৰ মুখ্য উপদেষ্টা ড৹ সমুজ্জল কুমাৰ ভট্টাচাৰ্যই ইতিমধ্যে ৰাজ্যত সত্যাগ্ৰহ আন্দোলনৰ হুংকাৰ দিছে । এনইএছঅ'ই সমগ্ৰ উত্তৰ-পূৰ্বাঞ্চলত আন্দোলন অব্যাহত ৰাখিব বুলিও ঘোষণা কৰিছে । ইফালে ইয়াৰ বিৰুদ্ধে আইনী যুঁজো অব্যাহত ৰাখিব বুলি আছুৰ মুখ্য উপদেষ্টাগৰাকীয়ে উল্লেখ কৰিছে । একেদৰে পুনৰ ২০১৪ চনৰ ৩১ ডিচেম্বৰলৈকে অহা বিদেশীৰ বোজা আৰোপ কৰিবলৈ চেষ্টা কৰা হৈছে আৰু ই কোনো কাৰণতে গ্ৰহণযোগ্য নহয় বুলি আছুৱে উল্লেখ কৰিছে ।
অসম বিধান সভাৰ বিৰোধী দলপতি দেৱব্ৰত শইকীয়াইও বিজেপি চৰকাৰৰ বিৰুদ্ধে বিভিন্ন ধৰণৰ মন্তব্য কৰিছে । তেওঁ দাবী কৰা মতে বিজেপিয়ে পুনৰ অসমবাসীৰ সৈতে বিশ্বাসঘাতকতা কৰিছে । বিজেপি দলে অসম চুক্তি উলংঘা কৰাৰো অভিযোগ কৰিছে শইকীয়াই । বিৰোধী দলৰ নেতাগৰাকীয়ে ঘোষণা কৰা মতে কংগ্ৰেছ দলেও চিএএৰ বিৰুদ্ধে এক শক্তিশালী আন্দোলন আৰম্ভ কৰিব ।
অসমৰ অন্যতম আঞ্চলিক ৰাজনৈতিক দল অসম জাতীয় পৰিষদৰ সভাপতি লুৰীণজ্যোতি গগৈৰ মতে চৰকাৰে অসমবাসীৰ প্ৰতি যথেষ্ট অন্যায় কৰি CAA জাপি দিছে । অসমৰ জনসাধাৰণৰ ভাষা, সংস্কৃতি, ৰাজনৈতিক ভৱিষ্যত, ভাষিক, সাংস্কৃতিক আৰু অৰ্থনৈতিক ভৱিষ্যত দূৰ কৰি এই বৰ্ণবাদী আইন অসমৰ ওপৰত জাপি দিছে । ইফালে, CAA ৰ বিৰুদ্ধে প্ৰতিবাদ সাব্যস্ত কৰিবলৈ অসমত 'সৰ্বত্মাক হৰতাল'ৰ আহ্বান জনোৱা ৰাজনৈতিক দলসমূহক গুৱাহাটী আৰক্ষীয়ে আইনী জাননী প্ৰদান কৰিছে ।
মমতা চৰকাৰৰ হুংকাৰ
২০১১ চনৰ লোকপিয়ল অনুসৰি পশ্চিমবংগত মুঠ জনসংখ্যাৰ ২৭.০১ শতাংশ মুছলমান । মুছলমানসকল ৰাজ্যখনৰ মুঠ ২৩ খন জিলাৰ ভিতৰত ৬ খনত বিস্তৃত হৈ আছে । ইয়াৰ উপৰিও, পূব বৰ্ধমান আৰু হাওৰাতো মুছলমানৰ জনসংখ্যা যথেষ্ট ।
ৰাজ্যখনত নাদিয়া, উত্তৰ আৰু দক্ষিণ ২৪ পৰগণা জিলাৰ কমেও ৪ খন লোকসভা আসনত আৰু ৩০-৪০ খন বিধানসভা আসনত মুছলমান ভোটাৰৰ আধিপত্য আছে । বিজেপিয়ে দৃষ্টি ৰখা লোকসভাৰ কেইবাখনো আসনত প্ৰভাৱ পৰাৰ সম্ভাৱনা আছে ।
নাগৰিকত্ব সংশোধনী আইন ৰূপায়ণৰ উপৰিও পৰিচয়ৰ ৰাজনীতি আৰু আঞ্চলিক উন্নয়ন এই নিৰ্বাচনত নিৰ্ণায়ক কাৰক হিচাপে দেখা দিছে । কিয়নো তিক্ত প্ৰতিদ্বন্দ্বী টিএমচি আৰু বিজেপিয়ে স্থানীয় সমস্যা সমাধানৰ লক্ষ্যৰে কেইবাটাও প্ৰতিশ্ৰুতিৰে মুছলমান সম্প্ৰদায়ক আকৰ্ষিত কৰিবলৈ সকলো প্ৰচেষ্টা চলাইছে ।
মুৰ্শিদাবাদ, মালদা, দক্ষিণ ২৪-পৰগণা, উত্তৰ ২৪-পৰগণা, বীৰভূম আৰু উত্তৰ দিনাজপুৰত মুছলমান ভোট যিকোনো দলৰ বাবে এক নিৰ্ণায়ক কাৰক । এই ৬ খন জিলাত মুছলমান মুঠ জনসংখ্যাৰ ৪২.০৪ শতাংশ ।
ইফালে পশ্চিমবংগৰ মুখ্যমন্ত্ৰী মমতা বেনাৰ্জীয়ে CAA অধিসূচনা জাৰি কৰাক লৈ কেন্দ্ৰক তীব্ৰ সমালোচনা কৰিছে । ৰাজ্য চৰকাৰে মানুহৰ বিৰুদ্ধে বৈষম্যমূলক আচৰণ কৰা যিকোনো বস্তুৰ বিৰোধিতা কৰিব বুলিও মুখ্যমন্ত্ৰীয়ে হুংকাৰ দিছে । যদি ই কোনো ব্যক্তিৰ নাগৰিকত্বৰ প্ৰতি ভাবুকি সৃষ্টি কৰে তেন্তে বংগ চৰকাৰে যিকোনো নিয়মৰ তীব্ৰ বিৰোধিতা কৰিব বুলি মুখ্যমন্ত্ৰীগৰাকীয়ে সকীয়াই দিছে ।
পশ্চিমবংগত CAA আৰু NRC ক অনুমতি দিয়া নহ'ব আৰু ইয়াৰ বিৰুদ্ধে তৃণমূল কংগ্ৰেছে তীব্ৰ প্ৰতিবাদ কৰিব বুলি মমতা বেনাৰ্জীয়ে উল্লেখ কৰিছে । তেওঁৰ মতে CAA আৰু এনআৰচিৰ বিষয়টো বংগ আৰু সমগ্ৰ উত্তৰ-পূৰ্বাঞ্চলৰ বাবে অত্যন্ত সংবেদনশীল । নিৰ্বাচনৰ পূৰ্বে মমতা বেনাৰ্জী চৰকাৰে কোনো অস্থিৰতা নিবিচাৰে ।
লগতে পঢ়ক :অসমৰ মানুহে কেতিয়াও এই আইন মানি লোৱা নাছিল আৰু মানি নলয় : লুৰীণজ্যোতি গগৈ
