তেজপুৰ: মণিপুৰৰ শেহতীয়া হিংসাত্মক ঘটনাৰ পাছত তৎপৰ হৈ পৰিছে নতুন দিল্লী ৷ কেন্দ্ৰীয় গৃহমন্ত্ৰী অমিত শ্বাহৰ নেতৃত্বত মণিপুৰৰ হিংসাত্মক ঘটনাৰ বাবে এক জৰুৰী বৈঠক সোমবাৰে অনুষ্ঠিত হয় । উক্ত বৈঠকত মণিপুৰলৈ চি এ পি এফৰ 50 টা অতিৰিক্ত কোম্পানী প্ৰেৰণৰ সিদ্ধান্ত লোৱা হৈছে ৷ তাৰ মাজতে দিব খুজিছো মণিপুৰৰ ৰাজনীতিৰ এক খবৰ ৷
মেঘালয়ৰ মুখ্যমন্ত্ৰী কনৰাড চাংমাৰ নেচনেল পিপ'লছ পাৰ্টী চমুকৈ এন পি পি দলে মণিপুৰত বিজেপি চৰকাৰৰ পৰা সমৰ্থন প্ৰত্যাহাৰ কৰাৰ পাছতে শাসকীয় বিজেপি দলৰ নেতা-সদস্যয়ো সামূহিক পদত্যাগ কৰা দেখা গৈছে । মণিপুৰৰ জিৰিবাম জিলাত সোমবাৰে মুঠ ৮ জন মণ্ডলৰ সদস্যই বিজেপি দলৰ পৰা পদত্যাগ কৰিছে ।
দেওবাৰে সন্ধিয়া মেঘালয়ৰ মুখ্যমন্ত্ৰী তথা এন পি পি দলৰ ৰাষ্ট্ৰীয় সভাপতি কনৰাড চাংমাই মণিপুৰৰ চৰকাৰৰ পৰা নিজৰ দলৰ সমৰ্থন প্ৰত্যাহাৰ কৰি বিজেপিৰ ৰাষ্ট্ৰীয় সভাপতি জগত প্ৰসাদ নাড্ডালৈ পত্ৰ প্ৰেৰণ কৰে ৷ ইয়াৰ পাছতে মণিপুৰত এন বীৰেন সিং চৰকাৰৰ ৭ গৰাকী বিধায়ক হ্রাস পায় । আনহাতে মণিপুৰত বিজেপি দলৰ কেবাখনো গুৰুত্বপূৰ্ণ বৈঠক আজি পুৱাৰ পৰা অনুষ্ঠিত হোৱা বুলি জানিব পৰা গৈছে ।
উল্লেখ্য যে জিৰিবামত যোৱা ১১ নৱেম্বৰ সোমবাৰে চি আৰ পি এফৰ গুলীত নিহত হৈছিল ১০ জন কুকি জনগোষ্ঠীৰ যুৱক ৷ মণিপুৰ চৰকাৰে দাবী কৰিছিল যে নিহত এই ১০ যুৱক সন্দেহজনক কুকি উগ্ৰপন্থী গোটৰ সদস্য ৷ ইফালে, আটাইকেইজনৰ মৰণোত্তৰ পৰীক্ষা অসমৰ শিলচৰ মেডিকেল কলেজ হাস্পতালত সম্পন্ন হয় ৷
লগতে পঢ়ক: মণিপুৰলৈ আহি আছে চি এ পি এফৰ ৫০ টা অতিৰিক্ত কোম্পানী: কেন্দ্ৰই ল'লে গুৰুত্বপূৰ্ণ সিদ্ধান্ত
শনিবাৰে এই ১০জন যুৱকৰ মৃতদেহ জিৰিবামলৈ লৈ যোৱাৰ বাবে প্ৰস্তুত হৈছিল মণিপুৰ চৰকাৰ ৷ মাছিমপুৰৰ পৰা হেলিকপ্টাৰেৰে মৃতদেহকেইটা জিৰিবামলৈ লৈ যোৱাৰ পৰিকল্পনা কৰিছিল মণিপুৰ চৰকাৰে ৷ সেই সময়তেই একাংশ লোকে এক উত্তপ্ত পৰিস্থিতিৰ সৃষ্টি কৰি আৰক্ষীক আক্ৰমণৰ লক্ষ্য কৰি লয় যদিও পৰৱৰ্তী সময়ত পৰিস্থিতি নিয়ন্ত্ৰণ কৰে ।
এই ঘটনাৰ পাছত মণিপুৰত পুনৰ উত্তপ্ত পৰিস্থিতিৰ উদ্ভৱ হয় । উত্তেজিত জনতাই মণিপুৰৰ বিধায়কৰ গৃহত আক্ৰমণ চলায় ৷ বৰ্তমানলৈকে মুঠ ১৪ জন বিধায়কৰ বাসগৃহত স্থানীয় ৰাইজে আক্ৰমণ কৰে ৷ আজি জিৰিবামত এজন বিধায়কৰ বাসগৃহত উত্তেজিত লোকে আক্ৰমণ চলায় । একে সময়তে জিৰিবামত পুনৰ গুলীছালনা সংঘটিত হয় । জিৰিবাম অঞ্চলত বিজেপি, কংগ্ৰেছ সকলো ৰাজনৈতিক দলৰ কাৰ্যালয় ক্ষুব্ধ ৰাইজে জ্বলাই প্ৰতিবাদ সাব্যস্ত কৰিছে ।
আনহাতে মণিপুৰৰ শেহতীয়া তিনিটা ঘটনাৰ গোচৰ NIA লৈ হস্তান্তৰ কৰা হৈছে বুলি এক চৰকাৰী সূত্ৰত জানিব পৰা গৈছে । নতুন দিল্লীত কংগ্ৰেছৰ জেষ্ঠ নেতা জয়ৰাম ৰমেশৰ নেতৃত্বত মণিপুৰ প্ৰদেশ কংগ্ৰেছৰ সভাপতি কেইশাম মেঘাচন্দ্ৰ সিঙে এক সংবাদ মেল অনুষ্ঠিত কৰি মণিপুৰ চৰকাৰ সম্পূৰ্ণ ৰূপে বিফল হোৱা বুলি দাবী কৰে । তেওঁ কয় যে বৰ্তমান মণিপুৰত প্ৰশাসন যন্ত্ৰ সম্পূৰ্ণ বিকল হৈ পৰিছে আৰু বিজেপিৰ ডাবল ইঞ্জিন চৰকাৰৰ ব্যৰ্থতা পৰিস্ফুট হৈছে ।
লগতে পঢ়ক: বিজেপি শাসিত মণিপুৰৰ চৰকাৰৰ প্ৰতি সমৰ্থন প্ৰত্যাহাৰ এন পি পিৰ
