গুৱাহাটী: মণিপুৰত শেহতীয়াকৈ সংঘটিত হিংসাত্মক ঘটনাৰ পৰিপ্ৰেক্ষিতত ৰাজ্যখনৰ পাঁচখনকৈ জিলাৰ ছখন আৰক্ষী থানাৰ অধীনৰ এলেকালৈ সম্প্ৰসাৰণ কৰা হৈছে সশস্ত্ৰ বাহিনীৰ বিশেষ ক্ষমতা আইন ('আফস্পা') । কেন্দ্ৰীয় গৃহ মন্ত্ৰণালয়ৰ এক জাননীত বৃহস্পতিবাৰে প্ৰকাশ কৰা হয় এই কথা । কেন্দ্ৰীয় চৰকাৰে আইন-শৃংখলা পৰিস্থিতিৰ মোকাবিলা কৰিবলৈ ৰাজ্যখনলৈ অতিৰিক্ত কেন্দ্ৰীয় বাহিনীৰ ২০ টা কোম্পানী প্ৰেৰণ কৰাৰ সিদ্ধান্ত লোৱাৰ এদিন পিছতে মণিপুৰৰ ছযখন আৰক্ষী থানা অঞ্চললৈ 'আফস্পা' (AFSPA) সম্প্ৰসাৰণৰ জাননী প্ৰকাশ কৰে ।
বৃহস্পতিবাৰে কেন্দ্ৰীয় গৃহ মন্ত্ৰণালয়ে জাননীত প্ৰকাশ কৰে যে ইম্ফল পশ্চিম জিলাৰ চেকমাই আৰু লামচাং আৰক্ষী থানা অঞ্চল, ইম্ফল পূব জিলাৰ লামলাই আৰক্ষী থানা এলেকা, জিৰিবাম জিলাৰ জিৰিবাম আৰক্ষী থানা এলেকা, কাংপোকপি জিলাৰ লেইমাখং অঞ্চল আৰু বিষ্ণুপুৰ জিলাৰ মইৰাং আৰক্ষী থানা অঞ্চলত 'আফস্পা' জাৰি কৰা হৈছে ।
জাননীখনত কোৱা হয় যে নিৰাপত্তা পৰিস্থিতি বজাই ৰাখিবলৈ আৰু এই অঞ্চলবোৰত বিদ্ৰোহী গোটবোৰৰ কাৰ্যকলাপ নিয়ন্ত্ৰণ কৰিবলৈ নিৰাপত্তা বাহিনীৰ দ্বাৰা সুসমন্বিত অভিযান চলাবলৈ 'আফস্পা' আৰোপ কৰা হৈছে । 'আফস্পা' জাৰি কৰাৰ পিছত, মণিপুৰৰ ওপৰোক্ত ছয়খন আৰক্ষী থানাৰ অধিকাৰ ক্ষেত্ৰত থকা এলেকাবোৰক সশস্ত্ৰ বাহিনী বিশেষ ক্ষমতা আইন ১৯৫৮ৰ ধাৰা ৩-ৰ অধীনত 'অশান্ত অঞ্চল' হিচাপে ঘোষণা কৰা হয় আৰু 'আফস্পা' ২০২৫ ৰ ৩১ মাৰ্চলৈকে অব্যাহত ৰখা হ'ব ।
জাননীত আৰু কোৱা হৈছে যে মণিপুৰৰ নিৰাপত্তা পৰিস্থিতিৰ পৰ্যালোচনাত প্ৰকাশ পাইছে যে জাতিগত হিংসাৰ মাজত পৰিস্থিতি অস্থিৰ হৈ আছে আৰু বিষ্ণুপুৰ-চুৰাচান্দপুৰ, ইম্ফল পূব-কাংপোকপি-ইম্ফল পশ্চিম আৰু জিৰিবাম জিলাত জঘন্য হিংসাত্মক কাৰ্যত বিদ্ৰোহী গোট জড়িত থকাৰ কেইবাটাও প্ৰমাণ পোৱা গৈছে ।
উল্লেখ কৰিব পাৰি যে জিৰিবাম মণিপুৰত হিংসাৰ শেহতীয়া কেন্দ্ৰবিন্দু হৈ পৰিছে আৰু মেইটেই আৰু কুকি জনগোষ্ঠীৰ মাজত হিংসাত্মক ঘটনা সংঘটিত হৈছে । বৃহস্পতিবাৰে জিৰিবামত একাংশ সশস্ত্ৰ দুৰ্বৃত্তই এগৰাকী কুকি মহিলাক হত্যা কৰি কমেও দহটা ঘৰত জুই লগাই দিয়াৰ সময়তে আন একাংশ সশস্ত্ৰ দুৰ্বৃত্তই বিষ্ণুপুৰ জিলাত এগৰাকী মহিলাক হত্যা কৰে ।
সোমবাৰে জিৰিবাম জিলাত নিয়োজিত চি আৰ পি এফে দহজন সশস্ত্ৰ দুৰ্বৃত্তক হত্যা কৰে, যিসকলে তেওঁলোকৰ মতে চি আৰ পি এফ শিবিৰ আৰু এটা কেন্দ্ৰত আক্ৰমণ কৰিবলৈ আহিছিল, য'ত কিছুমান স্থানচ্যুত লোকক আশ্ৰয় দিয়া হৈছিল । কুকি আৰু মাৰ সংগঠনে অৱশ্যে মৃত ১০ জন যুৱকক দুৰ্বৃত্ত বুলি নহয়, 'গাঁও স্বেচ্ছাসেৱক' বুলি অভিহিত কৰে আৰু মঙলবাৰে পুৱাৰে পৰা সকলো পাহাৰীয়া অঞ্চল বন্ধ ৰখাৰ আহ্বান জনায় । সন্দেহযুক্ত দুৰ্বৃত্তই বুধবাৰে পুৱা ৩৭ নং ৰাষ্ট্ৰীয় ঘাইপথত অত্যাৱশ্যকীয় সামগ্ৰী কঢ়িয়াই অনা দুখন ট্ৰাকতো অগ্নিসংযোগ কৰে যাৰ ফলত অঞ্চলটোত নতুন উত্তেজনাৰ সৃষ্টি হয় ।
