میرٹھ ہاپوڑ پارلیمانی حلقہ کے لیے ایس پی کی جانب سے سنیتا ورما کے نام پر مہر - Lok Sabha election 2024

SP Candidate In Meerut سماجوادی پارٹی نے تیسری مرتبہ میرٹھ ہاپوڑ پارلیمانی حلقے کے لیے نئے امیدوار کے اعلان کے ساتھ ہی آج نامزدگی کے آخری دن سابق مئیر میرٹھ سنیتا ورما نے اپنا پرچہ نامزدگی درج کرایا۔

میڑٹھ:پارلیمانی انتخابات 2024 کی دوسرے مرحلے میں آج میرٹھ ہاپوڑ پارلیمانی حلقہ کے لیے سماجوادی پارٹی کے امیدوار کے طور پر سنیتا ورما نے اپنا پرچہ نامزدگی داخل کیا۔ واضح رہے کہ سیاسی رسہ کشی کی وجہ سے سماجوادی پارٹی نے پہلے بھانو پرتاپ سنگھ کو امیدوار بنایا تھا، اس کے بعد سردھنہ سے اسمبلی رکن اتل پردھان کے نام سے گزشتہ روز پرچہ نامزدگی درج کرائی گئی مگر آج ایک بار پھر سے ٹکٹ میں بدلاؤ کرتے ہوئے سماجوادی پارٹی نے امیدوار کو بدل دیا ہے۔

اب میرٹھ ہاپوڑ پارلیمانی حلقہ سے سماجوادی پارٹی کی امیدوار سنیتا ورما کے نام کو فائنل کرتے ہوئے انہوں نے آج نامزدگی کے آخری دن اپنا پرچہ نامزدگی داخل کیا۔ اس موقعے پر سماجوادی پارٹی میرٹھ کے تمام لیڈران موجود رہے۔ شہر اسمبلی رکن رفیق انصاری اور سابق وزیر شاہد منظور کے بیٹے نوازش کے علاوہ کانگریس اور عام آدمی پارٹی کے ساتھ اتحاد کے تمام لیڈران موجود رہے۔

اس دوران سنیتا ورما نے میڈیا سے گفتگو کرتے ہوئے کہا کہ انہوں نے مئیر رہتے ہوئے بہت سے ترقیاتی کام کرائے ہیں۔ انہی کی بنیاد پر وہ ایک بار پھر سے میرٹھ کی عوام سے ووٹ مانگ رہی ہیں۔ وہ میرٹھ میں تمام رکے ہوئے کاموں کو پورا کریں گی اور شہر میں امن اور بھائی چارے کا ماحول قائم کریں گی۔