گیا: عید قرباں کے دوسرے دن بھی پرامن ماحول میں قربانی کا اہتمام - Second day of Eid al Adha

Second day of Eid al-Adha in Gaya گیا میں دوسرے دن بھی پرامن ماحول میں احتیاط کے ساتھ قربانی کے فریضے کی ادائیگی کا سلسلہ جاری ہے۔ گیا کے مسلم اکثریتی محلوں میں قربانی دوسرے دن بھی بڑے اہتمام کے ساتھ ہوتی ہے۔ غریب، مسکین اور بے سہارا تک قربانی کے تبرک کو پہنچانے کی کوشش انفرادی اور اجتماعی طور پر بھی ہے۔

گیا: بہار کے ضلع گیا میں عید الاضحیٰ کے دوسرے دن بھی پرامن ماحول میں قربانی کا سلسلہ جاری ہے۔ 18جون کی صبح بعد نماز فجر سے قربانی کا سلسلہ شروع ہوگیا ہے۔ اس دوران آج بھی انتظامیہ اور پولیس کی طرف سے پختہ انتظامات کیے گئے ہیں۔ ضلع میں تین دنوں کے لیے مخصوص مقامات پر پولیس جوانوں کی تعیناتی کی گئی تھی۔ میونسپل کارپوریشن کے صفائی اہلکار اپنی گاڑیوں کے ساتھ مسلم محلوں میں موجود ہیں اور جانوروں کے باقیات کو اٹھانے میں مصروف ہیں۔

ڈی ایم ڈاکٹر تیاگ راجن نے بتایا کہ دوسرے دن بھی کارپوریشن کو صفائی کا خیال رکھنے کی ہدایت دی گئی ہے۔ ضلع میں قربانی سے متعلق کہیں کوئی پریشانی نہیں ہے۔ سبھی جگہوں پر ماحول پرامن ہے۔ چونکہ بہار میں اکثریتی فرقے کا بھی دوروزه تہوار منایا جارہا ہے اور اس کے پیش نظر بھی پولیس کی تعیناتی جگہ جگہ پر کی گئی ہے تاکہ پرامن ماحول میں دونوں تہوار ختم ہوں۔

وہیں دوسرے دن بھی مسلم محلوں میں قربانی کے بعد ضرورت مندوں کے درمیان گوشت تقسیم کرنے کا سلسلہ جاری ہے۔ کانگریس کے رہنماء عمیر احمد خان نے بتایا کہ شہر کا سب سے بڑا مسلم محلہ نیو کریم گنج، کریم گنج، علی گنج وغیرہ میں خالی جگہوں پر قربانی کے جانوروں کی باقیات کو دفن کرنے کا انتظام کیا گیا ہے۔ کھلے میں قربانی برسوں سے نہیں کی جا رہی ہے بلکہ مکمل احتیاط کے ساتھ قربانی کے فریضہ کو ادا کیا جا رہا ہے اوراس بار بھی اسی عمل کو اپنایا جارہا ہے۔