ممبئی: مہاراشٹرا شیوسینا (یو بی ٹی) پارٹی کے رکن پارلیمنٹ سنجے راوت نے اتوار کو کہا کہ دعوت نامہ موصول ہونے کے باوجود ادھو ٹھاکرے نے 22 جنوری کو ایودھیا میں رام مندر کی پران پرتشٹھا تقریب میں شرکت نہ کرنے کے متبادل کا انتخاب کیا ہے۔ راوت نے میڈیا کو بتایا کہ ہفتہ کو یو بی ٹی سینا کے سربراہ کو اسپیڈ پوسٹ کے ذریعے دعوت نامہ موصول ہوا۔ اس کے باوجود ٹھاکرے ایودھیا تقریب میں شرکت نہیں کریں گے۔ ان کا ناسک کے دیہی علاقے بھاگور میں ویر ساورکر کی جائے پیدائش پر جانے کا پروگرام ہے۔ اس کے علاوہ، وہ شام کو شری کالارام مندر اور گوڈا گھاٹ پر آرتی کریں گے۔
مزید پڑھیں: رام مندر افتتاح: یوپی میں الرٹ، لکھنؤ میں دفعہ 144 نافذ
بائیس جنوری کو ممتا بنرجی یکجہتی مارچ نکالیں گی، مسجد، چرچ، گرودوارہ بھی جائیں گی
راوت نے رام مندر تحریک میں شیوسینا کے بانی بالاصاحب ٹھاکرے کے اہم رول پر زور دیتے ہوئے ناسک کی تاریخی اہمیت کو اجاگر کیا۔ بالاصاحب کے یوم پیدائش کے موقع پر 23 جنوری کو ناسک میں ہونے والے پارٹی کنونشن کے دوران اہم قرارداد پاس ہونے کی امید ہے۔ شیو سینا (یو بی ٹی) 23 جنوری کو ناسک میں ایک کیمپ اور ریلی سے اپنی سیاسی مہم شروع کرنے کا ارادہ رکھتی ہے۔ ادھو ٹھاکرے پنچوٹی میں کالا رام مندر جائیں گے، جسے ون واس کے دوران بھگوان رام کے مقام کے طور پر جانا جاتا ہے۔ ٹھاکرے نے 22 جنوری کو اپنی پارٹی کے پروجیکٹوں کا اعلان کرتے ہوئے کہا ’’میں ایک رام بھکت ہوں، ایک محب وطن ہوں، اندھ بھکت نہیں ہوں۔ رام مندر کی تعمیر میرے والد کا خواب تھا۔'' واضح رہے 22 جنوری کو ایودھیا میں وزیر اعظم نریندر مودی رام مندر کا افتتاح کریں گے۔
یو این آئی
