اپوزیشن کی سیاسی پارٹیوں نے اسٹرانگ روم کی نگرانی کے لیے بنائے نگرانی کیمپ مظفر نگر:مظفر نگر ضلع میں پہلے مرحلہ کی ووٹنگ کے بعد 11 امیدواروں کی قسمت کا فیصلہ ای وی ایم میں قید ہوکر نوین منڈی کے مقام پر اسٹرانگ روم پر سخت حفاظتی پہرے میں ہیں۔ لیکن سماج وادی پارٹی کے اتحاد کے امیدوار ہریندر ملک اور بی ایس پی کے امیدوار مظفر نگر سے دارا سنگھ اور بجنور سے چودھری وجیندر سنگھ نے ووٹوں کی منصفانہ گنتی ہونے تک اپنے اپنے کارکنوں اور عہدے داروں کی ایک ٹیم بنائی ہے۔ جو 24 گھنٹے ای وی ایم اسٹرانگ روم کی نگرانی کر رہی ہے۔ جب ای ٹی وی بھارت اردو کی ٹیم نے رات کے وقت مظفر نگر کے ککڑا روڈ نوین منڈی میں بنائے گئے اس اسٹرانگ روم کے آس پاس بنائے گئے اپوزیشن کی سیاسی جماعتوں کے نگرانی کیمپ میں موجود لوگوں سے بات کی تو انہوں نے بتایا کہ ہم نے اسٹرانگ روم کی نگرانی کے لیے کیمپ بنا رکھے ہیں۔
یہ بھی پڑھیں:
مدھیہ پردیش میں پوسٹل بیلٹ باکس کھولنے کا ویڈیو وائرل ہونے کے بعد کانگرس کا احتجاج
ایک طرف سماج وادی کا نگرانی کیمپ ہے تو دوسری جانب بی ایس پی کا نگرانی کیمپ ہے۔ ہم دن رات ای وی ایم کی نگرانی کر رہے ہیں۔ انہوں نے بتایا کہ ضلع انتظامیہ کی جانب سے سکیورٹی کے معقول بندوبست کیے گئے ہیں۔ کیمرے لگے ہوئے ہیں۔ فورس بھی اندر اور باہر موجود ہے۔ لیکن ہمیں پھر بھی اندیشہ ہے کہ کوئی باہری آدمی آ کر اسٹرانگ روم میں رکھی مشینوں سے چھیڑ چھاڑ نہ کر دے۔
انہوں نے بتایا کہ کیونکہ ہمیں ضلع انتظامیہ پر پورا اعتماد ہے۔ لیکن حکومت پر نہیں۔ یہی وجہ ہے کہ ہم نگرانی کیمپ لگا کر اسٹرانگ روم کی نگرانی کر رہے ہیں۔ دوپہر میں ڈیوٹی کسی اور کی ہوتی ہے تو رات میں کسی اور کی۔ اس طرح سے ہم 24 گھنٹے نگرانی کیمپ سے اسٹرانگ روم کی نگرانی کرتے ہیں۔ انہوں نے کہا کہ ہمارے بڑے بزرگ کہتے ہیں اور ہم نے سنا بھی ہے کہ اپنے سامان کی خود حفاظت کریں۔ تو یہی وجہ ہے کہ ہم بھی اپنے سامان کی خود حفاظت میں لگے ہوئے ہیں۔
