ممبئی میں بلدیہ گڈھے بھرنے میں ناکام - Brihanmumbai Municipal Corporation

ممبئی، گڑھوں کا شہر بن گیا ہے 69 دنوں میں سڑکوں پر 15000 گڈھے ہیں اور حیرانی اس بات کی ہے کہ بی ایم سی کو روزانہ 213 شکایتیں مل رہی ہے ممبئی میں مذہبی تہواروں کے دوران سڑکوں پر گڈھوں کا مسئلہ جاری رہ سکتا ہے۔ بی ایم سی نے گڈھوں کو بھرنے کے لیے 250 کروڑ روپے خرچ کیے لیکن مسئلہ برقرار ہے۔ وزیر اعلیٰ اور بی ایم سی کمشنر کی کوششوں کے باوجود وقت پر گڑھے نہیں بھرے گئے۔ حالانکہ لاپرواہی کی وجہ سے کئی انجینئر کو نوٹس بھی دی گئی ہے۔

ممبئی : ہر برس کی طرح رواں برس بھی ممبئی شہر میں مذہبی تہواروں کے سبب سڑکوں پر پڑے گڈھوں کے درمیان ہو رہے ہیں بی ایم سی انتظامیہ نے ممبئی اور مہاراشٹر کے سب سے بڑے مذہبی تہوار گنیش اتسو کے لیے تیاریاں شروع کر دی ہیں۔ گنیش اتسو 7 ستمبر سے 16 ستمبر کے درمیان منایا جائے گا۔ بڑے بڑے پنڈالوں میں گنپتی کی آمد شروع ہو گئی ہے۔ کانگریس نے حال ہی میں الزام لگایا تھا کہ ممبئی کی سڑکوں پر 25 ہزار سے زیادہ گڈھے ہیں جب کہ بی ایم سی انتظامیہ کا کہنا ہے کہ سڑکوں پر گڈھے بھرے جا رہے ہیں۔
بی ایم سی سڑکوں پر گڑھے بھرنے پر 250 کروڑ روپے خرچ کر رہی ہے لیکن بی ایم سی کے تمام دعووں کے باوجود ممبئی کی سڑکوں پر گڈھے ہیں جنہیں نہیں بھرا جا رہا۔ بلدیہ کے ایک اہلکار نے بتایا کہ یکم جون سے 8 جولائی 2024 تک، یعنی 69 دنوں میں، بی ایم سی کو ممبئی کی سڑکوں پر گڑھوں کی کل 14691 شکایتیں موصول ہوئی ہیں۔ بی ایم سی کو روزانہ گڈھوں کی 213 شکایات موصول ہوئی ہیں۔ ان میں سے 1428 گڈھے بھرے جا چکے ہیں۔
بی ایم سی کمشنر بھوشن گگرانی نے حال ہی میں روڈ ڈپارٹمنٹ کو ہدایت دی تھی کہ گنیش کی آمد اور وسرجن کے راستے کا خاص خیال رکھا جائے اور سڑک کو گڑھے سے پاک بنایا جائے۔ تمام 25 وارڈز کے اسسٹنٹ کمشنر، چیف انجینئر اور دیگر افسران مختلف سڑکوں کا معائنہ کریں۔ اس کے باوجود گڑھے بھرنے پر کوئی توجہ نہیں دی جارہی۔ تمام انجینئر سڑکوں کا ٹھیک سے معائنہ نہیں کرتے۔ بی ایم سی نے لاپرواہی کے الزام میں اب تک 22 انجینئروں کو وجہ بتاؤ نوٹس دیا ہے۔

بی ایم سی کے اعداد و شمار کے مطابق، سب سے زیادہ 819 گڑھے کی شکایات اندھیری ویسٹ وارڈ سے موصول ہوئی ہیں۔ اسی وقت، بی ایم سی کو ملاڈ میں 603 گڑھے، دھاراوی، دادر اور ماہم میں 572 گڑھے، پریل، شیوڈی میں 561 گڑھے اور کرلا، ساکیناکا علاقے میں 520 گڑھوں کی شکایت ملی ہے۔ اسی طرح، بی ایم سی کو ایسٹرن ایکسپریس ہائی وے پر 3005 اور ویسٹرن ایکسپریس ہائی وے پر 3159 گڑھوں کی شکایات موصول ہوئی ہیں۔ بی ایم سی کا دعویٰ ہے کہ ان میں سے زیادہ تر کو 24 گھنٹوں کے اندر بھر دیا گیا ہے۔