لکھنؤ: یوپی اسمبلی کا سرمائی اجلاس شروع ہو گیا ہے۔ کانپور کے سیسماؤ اسمبلی حلقہ سے نومنتخب ایم ایل اے نسیم سولنکی نے اسمبلی میں شامل ہونے کا اپنا تجربہ بتاتے ہوئے کہا کہ آج جب میں پہلی بار اسمبلی میں آئی تو مجھے تھوڑی بے چینی محسوس ہوئی، لیکن یہاں مجھے اپنے ساتھی رکن اسمبلی سے بہت کچھ سیکھنے کو ملا۔ میری پوری کوشش ہوگی کہ ایوان میں اپنے علاقے کے لوگوں کی آواز بلند کروں۔
ای ٹی وی بھارت سے بات کرتے ہوئے ایم ایل اے نسیم سولنکی نے کہا کہ آج میں نے اسمبلی میں اپنی نئی ذمہ داریاں اور تجربات شیئر کیے۔ اب تک گھر کی ذمہ داری تھی لیکن اب علاقے کے لوگوں کی ذمہ داری ہے۔ یہ بہت بڑی ذمہ داری ہے، جسے پوری ایمانداری اور محنت سے نبھاوں گی۔
اپنے شوہر عرفان سولنکی کی غیر موجودگی کا ذکر کرتے ہوئے انہوں نے کہا کہ وہ انہیں بہت یاد کر رہی ہیں۔ اسمبلی میں ان کے لیے آواز ضرور اٹھائی جائے گی۔ ہمارا 30 سال پرانا سیاسی خاندان ہے۔ میرے سسر اور شوہر ایم ایل اے رہ چکے ہیں۔ ان سے بہت کچھ سیکھنے کا موقع ملا ہے۔