عیدالفطر کے موقعے پر مسلمانوں کے لیے خاص ہدایات - Reaction On EID Namaz

Reaction On EID Namaz In Lucknow اسلامک سینٹر اف انڈیا فرنگی محل کی جانب سے عید الفطر کے تعلق سے ایڈوائزری جاری کی گئی ہے جس میں خاص طور پر کہا گیا ہے کہ سبھی مسلمان عید کی نماز سے قبل صدقۃ الفطر ادا کر دیں تاکہ غریب مسلم مفلس اور ضرورت مندوں کو ان کا حق پہنچ جائے اور عید کی خوشیوں میں وہ بھی شامل ہو سکیں۔

لکھنو: ای ٹی وی بھارت سے خاص بات چیت کرتے ہوئے مولانا خالد رشید فرنگی محلی نے کہا کہ عید الفطر کے متعلق تمام تر تیاریاں مکمل کر لی گئی ہیں۔ لکھنؤ پولیس انتظامیہ کے ساتھ میٹنگ ہوئی ہے۔ اس میں واضح طور پہ کہا گیا ہے کہ سکیورٹی کے پختہ انتظامات کیے گئے ہیں۔ ساتھ ہی مونسپل کارپوریشن اور ضلع انتظامیہ کے ساتھ بھی میٹنگ ہوئی۔ اس میں بجلی پانی صاف صفائی پر زور دیا گیا ہے۔

انہوں نے کہا کہ میں ریاست بھر کے مسلمانوں سے اپیل کرتا ہوں کہ عید الفطر کی نماز سڑک پر ادا نہ کریں۔ اس سے آنے جانے والوں کو پریشانیوں کا سامنا رہے گا۔ لہذا ضلع انتظامیہ کی مدد کریں اور کسی قسم کا خلفشار برپا نہ ہو۔ انہوں نے مزید کہا کہ عید الفطر انعام کا دن ہوتا ہے لہذا فلسطین کے مظلوموں کے لیے بھی دعا کریں اور یہ دعا کریں کہ فلسطین اور اسرائیل کے بیچ جاری جنگ کا خاتمہ ہو۔

انہوں نے مزید بتایا کہ آج عیش باغ عیدگاہ میں چاند دیکھنے کا بھی اہتمام کیا گیا ہے اور امید کی جا رہی ہے کہ 11 اپریل کو عید الفطر کی نماز ادا کی جائے گی۔ انہوں نے مزید اپیل کی کہ عید الفطر کی نماز عید گاہ کے کیمپس میں ہی ادا کریں تاکہ آنے جانے والوں کو کسی قسم کی پریشانی نہ پیش آئے۔