اللہ نے صدقة الفطر غریب مساکین کے لیے ہی بنایا ہے: مولانا عمران رحیمی - Ramadan 2024

Zakat or Fitr: مظفرنگر میں واقع مسجد لیاقت چوڑی گلی کے امام مولانا عمران رحیمی نے کہا کہ رمضان المبارک کے آخری ایام جاری ہیں۔ یہ ایام اللہ تبارک و تعالی کی طرف سے ایک خصوصی انعام ہیں۔ ان ایام میں اللہ تبارک و تعالی اپنے تمام بندوں کے گناہوں کو معاف فرما دیتے ہیں۔

مظفرنگر: مولانا عمران رحیمی نے ای ٹی وی اردو سے خاص بات چیت میں کہا کی صدقۃ الفطر اسلام کے ارکان میں سے ایک اہم رکن ہے۔ اس کو اللہ تبارک و تعالی نے ہر ایک صاحب مال مومن پر فرض کیا ہے کہ وہ اپنے مال میں سے ڈھائی فیصد زکوۃ ادا کرے اور رمضان المبارک کے مہینے میں نماز عید الفطر سے پہلے صدقۃ الفطر ادا کرے۔ اس لیے کہ اللہ تبارک و تعالی نے یہ صدقۃ الفطر غریب اور مساکین کا حق بنایا ہے۔اگر دوسرے لفظ میں کہا جائے تو یہ بھی کوئی مبالغہ نہیں ہوگا کہ صدقۃ الفطر غرباء اور مساکین کی وہ عیدی ہے۔ اس لیے کہ عید کی نماز سے پہلے وقت رہتے ہوئے وہ صدقۃ الفطر غریب اور مساکین کے گھر پہنچ جائے۔

ان کا کہنا ہے کہ ان کو یہ احساس نہ ہو کہ ایک مالدار انسان اور ایک صاحب ثروت ایک پیسے والا اپنے گھر میں اچھے کھانے بنا رہا ہے۔ میں ایک غریب اور مسکین ہونے کے باوجود اتنا لاچار ہو کہ میں اپنے بچوں کے لیے اچھا کھانا نہیں بنا سکتا۔ اس لیے یہ نظام اسلام کا خوبصورت اور بہترین نظام ہے ۔اللہ تبارک و تعالی نے کہا کہ اپنی عید کی نماز سے پہلے اپ غریب اور مساکینوں کے لیے چولہا گرم کرنے کا انتظام کر دیں اور جو آپ کے اوپر صدقۃ الفطر کی شکل میں واجب ہے۔